"FIFA DÇ-2026 finalının qiymətlərini rekord həddə qaldırdı: Tramp şokdadır" - KİV-lər

"ABŞ-da keçiriləcək mundialın final biletləri dörd il əvvəlki Qətər turniri ilə müqayisədə təxminən 8 dəfə bahalaşıb..."

ABŞ-də keçiriləcək 2026-cı il futbol üzrə dünya çempionatı hələ başlamadan böyük qalmaqalla gündəmə gəlib.

Moderator.az xəbər verir ki, bu barədə "dailymail.ru" nəşri yazıb.

Mundial finalı üçün rekord qiymətlər

Nəşr yazır ki, FIFA final oyunu üçün biletlərin qiymətini tarixi maksimuma qaldırıb. İyulun 19-da "MetLife" stadionunda keçiriləcək final qarşılaşması üçün meydançaya ən yaxın "birinci kateqoriya" yerlərin qiyməti 32 970 dollara çatıb. Halbuki əvvəllər həmin yerlər 10 990 dollara satılırdı. Hazırda 11 min dollar civarında qiymətə əsasən xüsusi ehtiyaclı şəxslər üçün ayrılmış yerlər təklif olunur.

Azarkeşlər və siyasətçilər etiraz edir

Bahalaşma təkcə finala aid deyil. Yarımfinal oyunları üçün biletlər 2 700-11 000 dollar arasında dəyişir. ABŞ millisinin Paraqvayla açılış oyununun biletləri isə 1 120 dollardan başlayır. FIFA prezidenti Canni İnfantino qiymətləri müdafiə edərək bildirib ki, ABŞ dünyanın ən böyük əyləncə bazarıdır və futbol da bu bazarın qaydalarına uyğun qiymətləndirilməlidir.

O qeyd edib ki, əgər FIFA qiymətləri aşağı saxlasaydı, biletlər yenidən satış platformalarında daha baha qiymətə satılacaqdı. Bununla belə, ABŞ konqresmenləri FIFA-nı qeyri-şəffaf qiymət siyasətində və süni bilet qıtlığı yaratmaqda ittiham edirlər.

Trampın reaksiyası və yeni rekordlar

Mövzuya ABŞ prezidenti Donald Tramp da münasibət bildirib. O, qiymətləri "şokedici" adlandıraraq açılış oyununa görə hətta 1000 dollar ödəməyə hazır olmadığını deyib. Bu arada FIFA-nın rəsmi təkrar satış platformasında daha da inanılmaz rəqəmlər ortaya çıxıb. Stadionun ən yuxarı hissəsində yerləşən bir biletin qiyməti 11,5 milyon dollar olaraq göstərilib.

Ekspertlər qeyd edirlər ki, hazırda DÇ-2026 finalı üçün orta bilet qiyməti təxminən 13 min dollardır. Müqayisə üçün, 2022-ci ildə Qətərdə keçirilən mundialın finalında orta qiymət cəmi 1600 dollar idi. Beləliklə, dünya futbolunun ən böyük turniri hələ başlamadan maliyyə qalmaqalına çevrilib. FIFA qiymət siyasətini bazar qaydaları ilə izah etsə də, həm siyasətçilər, həm də azarkeşlər mundialın getdikcə adi tamaşaçı üçün əlçatmaz olduğunu bildirirlər.