Gecə boyu qarşılıqlı zərbələr: Odessa vuruldu, Rusiyada zavodlar alova büründü - Ukrayna KİV-ləri

Bizi sosial şəbəkələrdən izləyin:

İzmaildə minlərlə insan işıqsız qaldı, Rusiyada isə kimya və sənaye müəssisələrində yanğınlar baş verdi...

Mayın 16-na keçən gecə Rusiya və Ukrayna arasında qarşılıqlı pilotsuz aparat hücumları davam edib. Rusiya ordusu Odessa vilayətinin cənubuna kütləvi dron zərbələri endirib, Ukrayna isə Rusiyanın bir sıra sənaye obyektlərini hədəfə alıb.

Moderator.az xəbər verir ki, bu barədə "rbc.ua" nəşri məlumat yayıb.

İzmaildə yaşayış binaları və liman vuruldu

Rusiya ordusunun əsas zərbələrindən biri Odessa vilayətinin İzmail şəhərinə dəyib. Odessa Vilayət Hərbi Administrasiyasının rəhbəri Oleq Kiper bildirib ki, pilotsuz aparat beşmərtəbəli yaşayış binasına düşüb. Nəticədə binanın fasadı və şüşələri dağılıb, balkonlarda və birinci mərtəbədə yerləşən mağazada yanğın başlayıb. Hücum zamanı liman infrastrukturu da zərər görüb. Anbar və inzibati binalara ziyan dəyib, iki nəfərin yaralandığı açıqlanıb.

İzmail Rayon Dövlət Administrasiyasının məlumatına görə, zədələnmiş elektrik xətləri səbəbindən rayonun 39 yaşayış məntəqəsində enerji təchizatı dayanıb. Hazırda 22 mindən çox abonent işıqsız qalıb. Şəhər meri Andrey Abramçenko bildirib ki, yaşayış evləri ilə yanaşı, 14 saylı İzmail gimnaziyası da hücum nəticəsində zərər görüb.

Rusiyada iki zavodda güclü yanğın

Eyni gecə Ukrayna pilotsuz aparatlarının hücumlarından sonra Rusiyanın iki iri müəssisəsində yanğın baş verib. Stavropol diyarında yerləşən Nevinnomıssk "Azot" kimya zavodunda güclü alov müşahidə olunub. Sosial şəbəkələrdə yayılan görüntülərdə şəhər üzərində parlaq işıq görünür. Bölgə rəhbəri Vladimir Vladimirov Rusiya HHM qüvvələrinin hücumu dəf etdiyini açıqlasa da, yerli sakinlər "bir dənə də atəş səsi eşidilmədiyini" bildiriblər.

Məlumata görə, zavodda partlayıcı maddələrin istehsalında istifadə olunan sirkə və azot turşuları hazırlanır. Müharibə başlayandan bəri müəssisəyə ən azı altıncı dəfə hücum edildiyi deyilir. Bundan başqa, Naberejnıye Çelnıda yerləşən plastik emalı zavodunda da iri yanğın baş verib. Qatı tüstü sütununun kilometrlərlə uzaqdan göründüyü bildirilir.

Moskva və Kiyev yeni hücumlara hazırlaşır

Rusiya Müdafiə Nazirliyi gecə ərzində ölkə ərazisi və ilhaq olunmuş Krım üzərində 138 Ukrayna pilotsuz aparatının vurulduğunu açıqlayıb. Bir gün əvvəl Ukrayna ordusu Ryazandakı iri neft emalı müəssisələrindən birinə zərbə endirib. Hücum nəticəsində üç nəfər ölüb, zavodda güclü yanğın başlayıb. Eyni zamanda Odessa vilayəti son günlər ardıcıl raket və dron hücumlarına məruz qalır. Mayın 15-də bölgəyə endirilən kombinə edilmiş zərbələr nəticəsində azı 10 nəfər yaralanıb.