"İsrailin gücünün üç əsas sütunu dağılır: ölkəni təhlükəli gələcək gözləyir" - "Foreign Policy"

Bizi sosial şəbəkələrdən izləyin:

"Çoxcəbhəli müharibə ordunu, iqtisadiyyatı və ABŞ dəstəyini sınağa çəkir..."

İsrail uzunmüddətli və çoxcəbhəli müharibə səbəbindən strateji dalana düşmək riski ilə üz-üzədir.

Moderator.az xəbər verir ki, bu barədə ABŞ-ın "Foreign Policy" nəşri yazıb.

Müharibənin qiyməti və strateji dalan

Məqalədə qeyd olunur ki, ölkənin gücü üç əsas dayağa söykənir: hərbi resurslar, iqtisadi dayanıqlıq və ABŞ-ın dəstəyi. Bu üç istiqamətin hər biri artıq ciddi təzyiq altındadır.

Benyamin Netanyahu müharibəni böyük uğur kimi təqdim etsə də, qarşıya qoyulan əsas hədəflər, xüsusilə İranın hərbi və nüvə potensialının tam zərərsizləşdirilməsi reallaşmayıb.

İran rejimi hakimiyyətdə qalır, raket və dron imkanlarını qoruyur, üstəlik, Hörmüz boğazını bağlama qabiliyyətini nümayiş etdirib. "Hizbullah" da gözlənildiyindən daha davamlı müqavimət göstərir.

Ordu və iqtisadiyyat: resurslar tükənir

İsrail ordusu taktiki baxımdan müəyyən uğurlar qazansa da, bu, böyük resurs itkisi hesabına başa gəlib. Uzunmüddətli döyüşlər, geniş cəbhə xətti və kadr çatışmazlığı ordunu zəiflədir. Ehtiyat qüvvələr uzun müddət səfərbər olunur, hətta rəhbərlik daxilində belə ordunun imkanlarının tükənə biləcəyi ilə bağlı xəbərdarlıqlar səslənir.

İqtisadiyyat isə hələlik dayanıqlılığını qorusa da, bu sabitlik getdikcə sarsılır. Müharibələrin maliyyələşdirilməsi dövlət borcunu artırır və yaxın illərdə hərbi xərclərin daha da yüksələcəyi gözlənilir. Bu isə ya vergilərin artması, ya da sosial xərclərin azalması deməkdir.

ABŞ dəstəyi və qeyri-müəyyən gələcək

İsrail üçün ən vacib sütunlardan biri olan ABŞ dəstəyi də əvvəlki kimi sabit görünmür. Donald Tramp dövründə əməkdaşlıq yüksək səviyyəyə çatsa da, müharibələrin siyasi nəticələri Vaşinqtonda münasibətləri dəyişə bilər.

ABŞ cəmiyyətində İsrailə münasibət pisləşir və bu meyl həm demokratlar, həm də respublikaçılar arasında güclənir. Bu isə gələcəkdə İsrailin siyasi manevr imkanlarını məhdudlaşdıra bilər.

Nəticə etibarilə, İsrail hərbi üstünlüyünü qorusa da, resursların tükənməsi və beynəlxalq dəstəyin zəifləməsi fonunda onu uzun və qeyri-müəyyən müharibələr dövrü gözləyə bilər.