Azərbaycan ordusunun Moskvanın dəstəyi və himayəsi ilə yaradılmış və fəaliyyət göstərmiş 32 illik separatçı-terrorçu rejimin cəmi 23 saata məhv edilməsi ilə nəticələnmiş lokal əməliyyatından və Yuxarı Qarabağda münaqişə tərəfi sayılan hayların böyük əksəriyyətinin ərazini könüllü(!) şəkildə tərk etməsindən sonra Rusiyanın “sülhməramlı” sayılan kontingentinin hələ də torpaqlarımızda qalması xalqın əksər hissəsini narahat edən məsələlərdən biridir...

 

*** ***

 

Əslində isə “sülhməramlı”lar təhlükə “aysberq”inin üzdə görünən hissəsidir. Çünki gerçəklikdə real təhlükə ölkənin əsas strateji əhəmiyyətli sahələrində şəbəkələşmiş “5-ci kalon”lardan, kəşfiyyat və agentura şəbəkələrindən gəlir. Əlbəttə, Azərbaycanda yalnız Rusiyanın deyil, ABŞ-nin də, İranın da, Avropa ölkələrinin də, İsrailin də “5-ci kalon”u var. Və onların hər birinin milli dövlətçilik maraqlarımıza özünəməxsus zərərləri var. Lakin, yəqin ki,  anlayan heç kəs etiraz etməz ki, ölkəmizdə ən geniş, ən güclü şəkildə şəbəkələşmiş “5-ci kalon”, kəşfiyyat, agentura məhz Rusiyaya məxsusdur. Özü də bu imperiyanın “sülhməramlı” adlanan hərbi kontingenti cəmi 3 ildir buradadırsa, onun kəşfiyyat, agentura şəbəkələri artıq 300 ilə yaxındır ki, Azərbaycanda kök atıb... Və həmin şəbəkələr hansısa hərbi, strateji obyektlərin fotolarını çəkib satan bir neçə gənc, qız və qadından yox, ağlımıza gələn və gəlməyən yüksək çinli fiqurlardan, onların çoxsaylı əlaltılarından, çuğullarından ibarətdir... 

 

Biz bu amili bir dəfə -1991-1992-ci illərdə - müstəqilliyimizi bərpa etdiyimiz ilk dövrdə unutduq; əsas gücümüzü, enerjimizi sovet-rus ordusunun ərazimizdən çıxarılmasına yönəltdik, əvəzində öz işini bu günədək görən Moskvanın “KQB”-“QRU” kəşfiyyat, agentura şəbəkələri, demək olar ki, tam toxunulmaz durumda Azərbaycanda qaldı... 

 

*** ***

 

1992-1993-cü illərdəki AXC hakimiyyəti fəxrlə deyirdi ki, biz Güney Qafqazda ilk olaraq Rusiya qoşunlarını ərazimizdən çıxardıq...

 

*** ***

 

Bu haqda bir neçə dəfə yazmışam. Yenə də deməyi lazım bilirəm. 1994-cü ildə Kələkidə mərhum eks-prezident Əbülfəz Elçibəylə jurnalist kimi görüşümdə də dedim ki, bəy, Rusiya qoşunlarını Azərbaycandan Qafqazda ilk olaraq çıxarmağımızla fəxr edirik, fəqət, Rusiya qoşunlarını çıxardıq, amma əvəzində “KQB” arxivlərini açmadıq və nəticədə başda hər biri bir orduya bərabər generalları olmaqla imperiya kəşfiyyatı Vətənimizdə qaldı və fəaliyyətini davam etdirdi... Və əslində torpaqlarımızın işğalını da, ölkədə bu gün də heç cür canımızı qurtara bilmədiyimiz dəhşətli korrupsiya-bürokratiya, inhisar-monopoliya, cinayət şəbəkəsinin formalaşmasını da həmin kəşfiyyyat, agentura təşkil etdi...

 

*** ***

 

Hələ 2000-ci ildə rəhmətlik Mirzə Xəzər Amerikanın “Azadlıq” radiosundakı çıxışında, sözsüz ki, Mərkəzi Kəşfiyyat İdarəsinin məlumatlarına əsasən söyləmişdi ki, Azərbaycanda təxminən 80 min Rusiya agenti var. O dövrdə ölkəmizin əhalisi təxm. 8 milyon idi. Elə o vaxtkı yazılarımdan birində demişdim ki, bu hesabla Azərbaycanın hər 100 sakinindən biri Rusiya agentidir. Və həmin məntiqlə hesablasaq, belə çıxır ki, bu gün ölkəmizdə 100 minə yaxın Rusiya agenti var ki, bu da elə Azərbaycan Silahlı Qüvvələrinin, az qala, hazırki aktiv kadr sayına bərabərdir. Əslində bu, böyük gücdür... Odur ki, Ukraynaya təcavüzündən sonra “Rusiya zəifləyib”, “Rusiya tezliklə çökəcək, məhv olacaq” kimi yanlış tezislərə uyub bu imperiyanın gücünü, özü də ölkəmizdəki gücünü, anadolular demiş, küçümsəmək olmaz. Amma bu o demək deyil ki, biz Rusiya qarşısında tam baş əyməli, onun vassalı olmalı, onun bütün diqtə etdiklərini sözsüz yerinə yetirməli və onun işğalçı siyasətinə, o cümlədən ölkəmizdəki gizli-açıq düşmən fəaliyyətinə qarşı mübarizə aparmalı deyilik... 

 

*** ***

 

Söhbətimizin əsas mövzusu kimi onu da nəzərdən qaçırmayaq ki, siyasi qarşıdurmaların, eləcə də müharibələrin taleyini çox zaman üzdə görünən hərbi qüvvələr, ordular yox, məhz gizli kəşfiyyat və agenturalar həll edir. Bəzən düşmən güclər ən güclü sayılan, son savaşlardan qalib çıxmış ordunun başına yerləşdirilmiş 4-5 güclü agent vasitəsilə həmin ordunu da, onun mənsub olduğu ölkəni də qısa müddətdə çökürdərək məğlub bir duruma gətirə bilər...

 

*** ***

 

Elə bu deyilənlər baxımından Ukraynada hərbi-siyasi bataqlıqda çabalayan Rusiya hazırda bütün postosvet, postsosialist məkanlarında, xüsusən də Güney Qafqaz və Mərkəzi Asiyada öz  “5-ci kalon” və agenturalarını, nəyin bahasına olursa-olsun, qorumağa çalışır...

 

*** ***

 

Bu gün də Rusiyanın “5-ci kalon”undan diqqəti yayındıran ən böyük amillərdən biri məhz Qarabağda hələ də qalan “sülhməramlı” adı altındakı hərbi kontingenti və onun bu günədək atdığı addımlardır... Əslində 19-20 sentyabr əməliyyatı zamanı və ondan sonra “sülhməramlı”lar başda Ruben Vardanyan, Araik Arutyunyan olmaqla Xankəndindəki separatçı-terrorçu rejimin bir çox keçmiş və indiki liderlərinin qaçmasına şərait yaratmamaqla Bakıdakı artıq həbsləri cəmiyyət tərəfindən tələb edilən və gözlənilən ən fəal “5-ci kalon”, agentura nümayəndələrinin cəzalandırılmasından diqqəti yayındırdı...

 

*** ***

 

Və biz Rusiyanın Azərbaycandakı təsir gücünün o zaman zəiflədiyini deyə bilərik ki, Vardanyanların, Araiklərin, Saakyanların, Qukasyanların, Babayanların oturduğu həbsxanada, elə həmin “5-ci kalon” və agenturalara bağlı qruplar tərəfindən şərlənmiş və şərlənəcək, günahı, cinayəti olsa da belə,  Vətən, dövlət qarşısında korrupsioner başçı və nazirlərdən qat-qat az suçu olan hansısa milli ruhlu ziyalı, siyasətçi və ya jurnalistlər yox, on illərlə ölkəni, xalqı korrupsiya, monopoliya şəbəkəsinə calamış, xalqımıza, ordumuza qarşı Tərtər qətliamını və digər cinayətləri törətmiş əsas imperiya rezident və agentləri də əyləşsin və vaxtı yetişincə layiqincə cəzalandırılsın... 

 

Biz inanırıq ki, müstəqil(!), milli(!) dövlətimiz, onun kəşfiyyatı, xüsusi xidmət orqanları qardaş Türkiyənin də müvafiq qurumlarının dəstəyi ilə gec-tez buna da nail olacaq. Nəticədə imperiyanın "sülhməramlı" adlanan ordusu da, onun "5-ci kalon"u və agenturası da Vətənimizi birdəfəlik tərk edəcək...

 

Sultan Laçın