Bəzi məlumatlara görə, 2,5 milyard dollarlıq sərvətə malik olan Ruben Vardanyanın sentyabrın 27-də Azərbaycan dövlət sərhədində həbs edilərək Bakıya gətirilməsindən  və Azərbaycan Respublikası CM-nin hələlik 3 maddəsi ilə barəsində 4 aylıq həbs qətiimkan təddbiri seçilməsindən sonra bir sıra suallar meydana çıxdı:

 

1. Azərbaycan Respublikasının Yuxarı Qarabağ torpağına qanunsuz şəkildə, özü də Rusiya vətəndaşı kimi daxil olandan bəri “Putinin milyarder desant”ı kimi tanınan, dövlət başçısı İlham Əliyevin də barəsində “Moskvanın çox aydın gündəliklə göndərdiyi, ciblərində rus xalqından oğurladığı milyardlarla pula sahib” ifadəsini işlətdiyi  R.Vardanyanı ərazimizdəki Rusiya “sülhməramlı”ları aradan çıxarıb heç barəsində ağzına gələni danışdığı Paşinyandan ehtiyat etdiyi Ermənistana deyil, Rusiyanın özünə, yaxud lap İrana qaçıra bilməzdimi? Sonra da Azərbaycan tərəfinə deyərdilər ki, bizim Vardanyandan xəbərimiz yoxdur; yəqin, yaralıların, meyitlərin arasında aradan çıxıb...

 

2. Lap Moskva onu taleyin ümidinə buraxıbsa belə, o boyda sərvətə və buna uyğun ağıla malik Vardanyan  özü Xocalı aeroportundan ağır vəziyyətdə olan köçkünləri, yaxud Xankəndindəki benzin çəni partlayışından sonra yaralıları daşıyan Rusiya helikopter heyətlərindən birinə 15-20 min dollar verib ağır yaralı xərəyində Ermənistana gedib, oradan da İrana-filana qaça bilməzdimi?..  

 

3. O boyda sərvətə və buna uyğun ağıla malik Vardanyan öncədən özü üçün ehtiyat tədbir olaraq saxta kimlik və maska təşkil edərək Azərbaycan sərhədindən “qanuni” şəkildə keçə bilməzdimi?

 

4. Keçmiş sovet məkanındakı əksər oliqarxların, yəni qeyri-leqal milyarderlərin, o cümlədən Putinin “pullarını “yumağa” ağlı yetən Ruben öncədən sərhəddə həbs ediləcəyini bilə-bilə nədən Laçın sərhəd-nəzarət məntəqəsinə təşrif buyurdu?

  

Bəs bu sulların cavabları haqda faktlar və məntiqlə düşünəndə Ruben Vardanyanın həbsi ətrafında hansı təəssüratlar yaranır?..

 

Əgər Rusiya Vardanyanı himayə etməkdən, onun həm Azərbaycan, həm də Ermənistan tərəfinin təqiblərindən qaçışını təşkil etməkdən vaz keçibsə, belə çıxır ki, guya əvvəldən Moskvanın Vardanyanın Qarabağ və Ermənistanla bağlı planlarıyla heç bir bağlantısı olmayıb və Putinin bu milyarder pul “yuyan”ı Azərbaycan torpaqlarının hayklar yaşayan hissəsinə öz təşəbbüsü ilə gəlib və erməni lobbisi, yaxud digər beynəlxalq güclərin təlimatıyla özünün hansısa siyasi planları olub... Lakin Vardanyanın birbaşa Rusiya prezidenti V.Putinlə və keçmiş baş nazir və prezident D.Medvedevlə çirkli əlaqələri olması haqdakı məlumatlar və ən başlıcası, Prezident İlham Əliyevin 2022-ci ilin noyabrında Avropa İttifaqının Şərq Tərəfdaşlığı üzrə xüsusi elçisi Dirk Schuebellə görüşündə onun barəsində söylədiyi fikirlər Kremlin Putinin milyarder “dostu”nu taleyin ümidinə buraxaraq Azərbaycan hüquq-mühafizə orqanlarının əlinə keçməsinə şərait yaradacağını inanılmaz edir... 

 

Deməli, Vardanyanın Azərbaycan-Ermənistan dövlət sərhədində həbs edilərək Bakıya gətirilməsi belə təəssürat yaradır ki, guya  ya Rusiyanın Vardanyan layihəsi, yəni onu Qarabağa gətirib, orada fəallaşdırıb, daha da məşhurlaşdırıb İrəvana transfer edərək devriləcək Paşinyanın yerinə keçirmək planı ya olmayıb, ya da Vardanyan ssenaridən kənara çıxdığına görə yarımçıq dayandırılıb. Lakin faktlar və məntiq bunu demir. Ən azı, dövlət başçısı İlham Əliyev dəqiq bilmədiyi məsələ haqda danışmaz... 

 

Yəni Moskvanın Vardanyan haqqında “aydın planı” olubsa, onu belə asanlıqla rəsmi Bakıya təslim olmasına imkan verərmi? Xeyr...

 

Vardanyanın iplərinin Kremlə bağlı olmasını təsdiqləyən bir məntiq də ondan ibarətdir ki, əksər keçmiş sovet ölkələrində olduğu kimi, Rusiyada da heç bir kəsin xüsusi xidmət orqanlarıyla əməkdaşlıq etməyəcəyi halda milyardların sahibi, yəni oliqarx olması mümkün deyil. Deməli, Vardanyanın fəaliyyəti birbaşa Putin tərəfindən olmasa da,  Rusiya Təhlükəsizlik Şurasının katibi Patruşev, yaxud “FSB” rəhbəri Bortnikov tərəfindən koordinasiya olunur...  

 

Vardanyanın guya Azərbaycan dövlət sərhədini sərbəst keçdiyini iddia etdiyi separatçı rejimin keçmiş qondarma “komandanı” Samvel Babayanın ardınca özünün də belə asan keçəcəyinə inandığı üçün Laçın sərhəd məntəqəsinə gəlməsi versiyası da inandırıcı deyil. Çünki Vardanyan S.Babayanın kim olduğunu, hansı xarakterdə olduğunu bilməmiş deyildi və onun söylədiklərinə inanacaq qədər sadəlöhv də deyil... 

 

Bir sözlə, bütün variantları təhlil edəndə, götür-qoy edəndə belə bir məntiqi cavab alınır ki, Ruben Vardanyan Azərbaycan dövlət sərhədinə həbs ediləcəyini bilə-bilə gəlib... Ya Rusiyanın, Putinin planıyla, yaxud, sadəcə, özü...

 

Bəs nə məqsədlə? Yoxsa Moskvanın Vardanyan layihəsi hələ də davam edir? Bəlkə də Ruben artıq bir sıra şərhçilərin də dediyi kimi, Bakı həbsxanasından bir müddət sonra hansısa yolla qurtulub o vaxtadək Paşinyan devrilməsə də, ən azı xaos girdabında çalxalanan Ermənistana “Qarabağdan gizli yolla xaricə qaçmayan,  özünü xalqının yolunda fəda edən” daha məşhur bir lider kimi gedəcəyinə inanır. Xəbər verildiyi kimi, artıq İrəvanda Vardanyana dəstək mitinqləri başlayıb. Təsəvvür edin ki, bir neçə ay sonra azad Ruben Vardanyan İrəvanın “Azadlıq” meydanına daxil olur və on minlərlə erməninin alqışlarıyla tribunaya qalxır... 

 

Ancaq bir gerçəkliyi də nəzərə almaq lazımdır ki, Ruben Vardanyanın Bakıya gətirilməsi ilə paralel Qarabağdan da İrəvana əksəriyyətinin qəlbi Azərbaycana kin-küdurət, qisas hissi ilə dolu on minlərlə köçkündən ibarət gərilmiş və Ermənistanda böyük xaos yarada biləcək bir hayk kütləsi gedib...  

 

Bəs bu dələduz milyarder hansı güclərin vasitəsilə Azərbaycandakı həbsdən qurtulmaq istəyir.  Əvvəla,  Moskva ilə bağının qopmadığı halda Putinin milyarder “desant”ı elə onun özünün, yaxud Patruşevin nə yolla olursa-olsun onu həbsdən azad etdirəcəyinə inanır. İkincisi, Vardanyan ümid edir ki, Azərbaycan dövlət başçısının bir müddət əvvəl Laçındakı çıxışında Qarabağdakı separatçı liderlərin təslim olacağı halda vəd etdiyi amnistiya ona da şamil ediləcək. Üçüncüsü də ən azı bir dəfə şəkil çəkdirdyi Böyük Britaniya kralı Çarlzın himayəsinə ümidlidir. Britaniya kralının adı bir neçə dövlətin, o cümlədən Ukraynanın qara siyahısında olan, Qərbin sanksiyaları altında qalan çirkaba bulaşmış bir Rusiya oliqarxının çirkli  fiquruna əl bulayacağı inandırıcı görünmür... Sözsüz ki, bir sıra Qərb dövlətləri, həmçinin Ukrayna da Azərbaycan dövlətindən Vardanyanın onlara təslim edilməsini xahiş etmələri də mümkündür... 

 

Bütün hallarda hesab edirik ki, bütün mümkün xarici, beynəlxalq təzyiqlərə rəğmən hələ öncəki illəri, 44 günlük savaş müddətini demirik, son bir ildən çox müddətdə Azərbaycan torpağında oturub dövlətimizin konstitusyon quruluşu əleyhinə, xalqımız əleyhinə, eləcə də qardaş Türkiyəyə qarşı qatı irqçi çıxışlar edən Ruben Vardanyan müstəqil(!) Azərbaycan dövlətinin mövcud qanunvericiliyinə uyğun olaraq ən ağır şəkildə cəzalandırılacaqdır...

 

Sultan Laçın