Livanın cənubundakı Bint Cbeil şəhəri mühasirəyə alınıb

İsrail qüvvələri Livanın cənubundakı Bint Cbeyl şəhərinin mühasirəsini başa çatdırıb.

Moderator.az xəbər verir ki, bu barədə İsrail Müdafiə Qüvvələrinin Şimal Komandanlığının komandanı general-mayor Rafi Milo məlumat verib.

"Hərbçilərlə əməliyyat görüşü keçirib. Eyni zamanda, İsrail Müdafiə Qüvvələrinin qoşunları Livanın cənubunda bütün cəbhə xətti boyunca əməliyyatlar aparır və Hizbullahın terrorçu infrastrukturunu məhv edir. Biz ölkənin şimal bölgələrində təhdidləri aradan qaldırmaq və sakinlərin təhlükəsizliyini təmin etmək üçün qətiyyətli hərəkət etməyə davam edəcəyik", - deyə Milo qeyd edib.

Bint Cbeyl İsrail ilə sərhəddən 4 kilometr şimalda yerləşir və Hizbullahın cənubi Livandakı ən vacib qalalarından biri hesab olunur. 2006-cı ilin yayında baş verən İkinci Livan müharibəsi zamanı İsrail ordusu şəhər uğrunda Hizbullah qüvvələri ilə şiddətli döyüşlər aparsa da, sonda onu ələ keçirə bilmədi.

İsrail tərəfi Livan ərazisindəki əməliyyatları "müdafiə üçün irəli" şüarı altında həyata keçirir. Məqsəd, şimali İsrail yaşayış məntəqələrini atəşdən qorumaq üçün cənubi Livanda Litani çayının cənubunda bufer zonası yaratmaqdır.