İsraildə Qəzza sektoruna nəzarət edən HƏMAS-a qarşı hərbi əməliyyatların dayandırılmasına etiraz olaraq nümayişkarənə şəkildə istefa verən müdafiə naziri, Azərbaycanın yaxın dostu Aviqdor Liberman mətbuat konfransı keçirib. Liberman nazir postunu və hökuməti tərk etdiyini bildirib.

“Siz mənim istefamın səbəblərini düz tapmışınız”-Liberman mətbuat konfransında jurnalistlərə müraciətlə deyib. Bildirib ki, istefasının səbəbi birmənalı olaraq hökumətin terror qarşısında kapitulyasiyasıdır.

Xatırladaq ki, İsraillə Qəzza sektoruna nəzarət edən HƏMAS arasında bir neçə gün əvvəl növbəti eskalasiya başlayıb. İsrail aviasiyası HƏMAS-ın raket zərbələrinə cavab olaraq Qəzza sektoruna aviazərbələr endirib, amma noyabrın 14-də tərəflər atəşkəsə razılaşıblar. HƏMAS bunu “qələbə” kimi təqdim edib.

Keçmiş müdafiə naziri istefasına səbəb olan digər münaqişələr barədə də danışıb. Bunların arasında Qəzza sektoruna Qətərdən 15 milyon dollar nəğd pulun daxil olmasına icazə verilməsi də yer alır. Liberman deyib ki, həmin pullar dərhal Qəzzada terrorçuların ailələrinə paylanıb.

Keçmiş müdafiə naziri istefasının və hakim koalisiyanı tərk etməsinin nəticəsi olaraq ölkədə növbədənkənar parlament seçkilərinin qaçılmaz olduğunu deyib. “Biz tezliklə bu seçkilərin vaxtını biləcəyik”-o bildirib.

İsrail hakim koalisiyasındakı mənbələr də Libermanın istefası ilə koalisiyanın dağılacağını və növbədənkənar seçkilərin keçiriləcəyini deyiblər. Habelə koalisiyanın ortağı olan “Yəhudi Evi” fraksiyası Libermandan sonra boşalan müdafiə naziri postunu tələb edir. Bu postu onlara verməyəcəkləri halda koalisiyadan çıxacaqlarını bildirir. Fraksiyanın rəhbəri Şuli Mualem bildirib ki, onların müdafiə naziri postuna namizədləri var-Naftali Bennet. “Əgər Naftali Bennet müdafiə naziri olmasa biz hökuməti tərk edəcəyik”-o bildirib.

HƏMAS isə Libermanın istefasını “Qəzzanın qələbəsi” adlandırıb. Hərəkat bildirir ki, onların “qələbəsi” İsraildə siyasi zəlzələyə səbəb olub.

Baş nazir Benyamin Netanyahunun “Likud” partiyası bildirir ki, Libermanın istefasına görə növbədənkənar seçkilər keçirməyə ehtiyac yoxdur.

***

İsrailin müdafiə naziri, “Evimiz İsrail” partiyasının sədri  Aviqdor Liberman istefaya getdiyini bildirib.

Liberman bunu xüsusi mətbuat konfransında bəyan edib.

O, Knessetdə keçirilən görüşdən sonra jurnalistlərə bildirib ki, istefasına səbəb Qəzza zolağında fələstinlilərə qarşı hərbi əməliyyatların dayandırılmasıdır: "Buraya, həqiqətən, müdafiə naziri vəzifəsindən istefa verdiyimi elan etmək üçün gəlmişəm".

Onun sözlərinə görə, Qəzza sektorunda atəşkəs elan edilməsi və bununla paralel vəziyyəti nizamlamağa cəhd göstərilməsi terror qarşısında təslim olmaqdır.

İsrail KİV-inin məlumatına görə, A.Libermanın istefası növbədənkənar seçkilərin keçirilməsi ehtimalını artıra bilər.

A.Liberman özü isə deyib: "Dövləti bir neçə aylıq iflic eləmək lazım deyil. Ümid edirəm ki, artıq noyabrın 18-dək hamı üçün uyğun olacaq növbədənkənar seçkilərin tarixi razılaşdırılacaq. Qoy hansı siyasətin doğru olmasına seçicilər qərar versinlər".

Qeyd edək ki, Liberman 2016-cı ildən İsrailin müdafiə naziri vəzifəsində çalışıb.(virtualaz.org)