“Kamil Cəlilov niyə televiziya ekranlarında görünmür?!İnanın, məndən camaat tez-tez soruşur ki, niyə televiziyada görünmürsünüz? Bu sualın cavabını mən də bilmirəm! Niyə mən televiziya kanallarına dəvət olunmuram?! Niyə əvvəlki konsertlərimin, ifalarımın video-görüntüləri yayımlanmır?! Mən heç özüm üçün də demirəm, bu, camaatın istəyidir. Məndən tez-tez xəbər alırlar. Bəs, camaatın ehtiyacını niyə təmin etmirlər?!”

“Mənə bu gün xaricdən də zənglər gəlir. Hamısı da cavabını bilmədiyim bu sualı mənə ünvanlayırlar! Əvvəllər belə deyildi. Haqqımda verilişlər, sənədli filmlər çəkilərdi, ifalarım tez-tez səsləndirilərdi. Yeni kitabım çıxıb-“Kamilin sənət dünyası”. Orada da bu barədə məlumatlar var. Bu saymazyanalıq mənə qarşı deyil e, mən onsuz da öz işimi görmüşəm. Bu, xalqa qarşıdır. Mən o ifaları xalq üçün etmişəm. Bəs, niyə vermirlər, televiziya kanalları niyə göstərmirlər?!

Mən dünyadan köçüb gedəndən sonra başlayacaqlar  yada salmağa, xatırlamağa. Bəy tərifi başlayacaq e, “ay belə gəldi, elə yaratdı”. Onlar kimə lazımdı?!  Bu ayın 29-da 80 yaşım tamam olur. Mən bu gün xidmət etmək istəyirəm. Qaboy alətində məndən başqa solo ifa edən yoxdu. Ona görə də televiziya kanalları mənim bu gün də işləyib-yaratmağıma maraqlı olmalıdırlar”.