19 may tarixində Bakının Binəqədi rayonunda baş verən və 15 nəfər insanın ölümü ilə nəticələnən yanğın faciəsi uzun illərdir ki, qış yuxusunda olan hakimiyyəti bir neçə günlük də olsa hərəkətə gətirib. Yanan binanın küllərinin hələ də paytaxt küçələrində dolaşdığı bir zamanda bir-birinin ardınca iclas və müşavirələr çağıran, 3-5 xırda iş adamını, pensiyaya çıxan 1-2 məmuru həbs etməklə bunca itki faktının məsuliyyətindən yayınmağa çalışan hakimiyyət, bugünlərdə növbəti tamaşaya start verməkdədir.

Yanğından sonra penoplast üzlüklü binaların mühafizəsinin vacibliyinə diqqət çəkən rejim, paytaxtda yanğına həssas üzlüklərlə əhatələnən binaların mühafizəsinə qərar verib. Artıq FHN tərəfindən ölkə paytaxtında 200-dən çox bu cür binanın 24 saat ərzində mühafizəsi həyata keçirilir ki, rayon və bölgələrdəki digər binaların da oxşar şəkildə mühafizəsi planlaşdırılır.

Şübhəsiz, 19 may faciəsindən sonra bu cür binaların mühafizəsinin həyata keçirilməsi, binaların qarşısında “ölüm gözətçilərinin” keşik çəkməsi başadüşüləndir. Baxmayaraq ki, əslində bu addımın özü də kifayət qədər ağrılı və formaldır. Ən azından ona görə ki, istər Xətai, istərsə də Binəqədi rayonundakı göydələnlərdə baş verən faciələr göstərdi ki, penoplast üzlüklü binalarda yanğın ən ayıq-sayıq insanın da haray-həşirindən daha sürətli yayılır. Yəni bu cür binalarda yanğını zamanında aşkarlamaq belə onu önləmək üçün yetərli olmur. Bu baxımdan görünüşü ilə göz oxşayan, keyfiyyəti ilə can alan bu binaların mühafizəsi daha çox insanları psixoloji baxımdan rahatlatmaq və onları yalançı bir güvənlə də olsa məmnun etmək istəyindən irəli gəlir.

Əslində  yanğına həssas üzlüklərlə əhatələnən binaların mühafizəsinin reallaşdırılmasında yeganə müsbət məqam bu addımın yeni iş yerlərinin açılmasına, FHN-nin şəxsi heyətinin artırılması zərurətinə yol açmasıdır. Nə qədər tragikomik görünsə də, əslində penoplast üzlüklü binaların mühafizəsi kütləvi işsizliyin və səfalətin hökm sürdüyü bu məmləkətdə çox az tapılan iş yerlərindən, dolanışıq vasitələrindən biri hesab edilməlidir. Bunu da unutmayaq ki, ölkədə inşa edilən bina və tikililərin ekspertizasız da hər kəsə bəlli olan keyfiyyəti yaxın gələcəkdə yalnız yaşayış binalarının deyil, bütün ictimai bina və obyektlərin mühafizəsinin artırılmasını zəruri edəcək.

Bütövlükdə baş verənlər, Nizami Gəncəvinin Nuşirəvan şah və bayquşlaırn söhbəti” hekayəsini yada salır. Yəqin ki, yaxın gələcəkdə hakimiyyət hər bir yaşayış binası, dövlət qurumları üçün nəzərdə tutulan hər bir obyektin qarşısında bir post qoymalı, hər binaya bir yanğınspndürən maşın təhkim etməli olacaq. Ola bilsin ki, yanğın təhlükəsi ilə yanaşı, xırda bir təkandan yerlə bir olmağa hazır olan binalarımızda uçqun təhlükəsini də önləmək üçün bu binaların zirzəmisinə əlavə dayaq nöqtələri kimi tanklar, kranlar, digər ağır texnikalar yerləşdirilsin.

Bəli, nəhayət ki, hakimiyyət elan etdiyi sosial-iqtisadi rifah siyasətinin ən son və ən başlıca hədəfinə nail oldu. Əvvəlcə təhlükəli bina və obyektlər tikən hökumət, daha sonra bu təhlükəyə çevik müdaxilə dəstələri yaratmaqla işsizlik problemini qəti şəkildə həll etdi. Azərbaycan hökuməti bu möhtəşəm yeniliyi ilə digər ölkələrə də qeyri-adi zəka və təfəkkür nümunəsi göstərmiş oldu.

Doğrudan da, kosmos-elektronika əsrində bütün ölkəni xarabaya döndərib sonra hər xarabalığın üzərində bir və ya bir neçə gözətçi qoymaq dünyanın ən məşhur iqtisadçıları üçün də heyrətamiz bir yenilikdir. Fəqət çətin ki, öz xalqına, öz vətəndaşına və ilk növbədə özünə hörmət edən hər hansı əcnəbi dövlət təmsilçisi xalqa münasibətdə Azərbaycan nümunəsindən istifadə etsin. Bu, hətta ən çirkli vicdana, ən qüsurlu ləyaqətə sahib dövlət məmuru üçün də kifayət qədər ağır yük və həqarət olardı.

Azərbaycanda isə xalqın işə olan tələbatını nəzərə alan hakimiyyət onun bir qismini öldürmək, digər qismini ölüm təhlükəsi ilə üz-üzə qoymaq, başqa bir qismini isə ölüm gözətçisi qismində ölmək ehtimalı olanlara nəzarətçi qoymaqla işsizlik probleminin həllinə nail oldu. Artıq əminlilə demək olar ki, daha bu ölkədə işsizlik problemi olmayacaq. Deməli, artıq bütün xalqı işlə təmin olunmaq münasibəti ilə təbrik etmək olar.

Beləliklə, iş yerin mübarək millət!

Seymur Əliyev

e-mail: [email protected]