Moderator.az-a müraciət edən iş adamlarımızın ən çox şikayətləndikləri məsələlərdən biri də qanunsuz yoxlamalarla bağlıdır. Onların bildirdiyinə görə, son zamanlar müxtəlif nazirliklərin əməkdaşlarını yola salmaqdan artıq zinhara gəliblər.
Ən çox şikayət
edilən qurumlardan biri isə Vergilər Nazirliyidir. Öz yazı və müsahiblələrində Vergilər
Nazirliyini müdafiə edən iqtisadçı-ekspert Elçin Qurbanovun bu barədə fikirlərini
öyrəndik:
“Mən heç vaxt ayrıca götürülmüş qurum və ya
nazirliyi müdafiə etmirəm. Sadəcə, məsələyə daha geniş spektrdən baxmağa
çalışır, vergi mühiti barədə məsələyə toxunarkən, onun timsalında digər
orqanların fəaliyyətini də gündəmə gətirirəm. Yoxsa ki, fikrim Vergilər
Nazirliyini süddən çıxmış ağ qaşıq kimi göstərmək deyil. Sözsüz ki, onların da
fəaliyyətində kifayət qədər neqativ hallar var. Bu da ümumi bəlalarımızın bir
uzantısıdır ki, vergi orqanlarında özünü göstərir.
Bilirsinizmi, milli istiqlaliyyətimizin əldə edilməsindən
kifayət qədər zaman keçir. Buna baxmayaraq ictimai həyatda hələ də öz həllini
gözləyən problemlər mövcuddur. Bu çatışmazlıqlar əl-əlxüsus da vergi və gömrük
sistemində daha çox sezilməkdə və bir dövlət kimi bizə baş ucalığa gətirməməkdədir.
Ən azı ona görə ki, xarici qonaqlardan tutmuş, xaricdən Respublikamıza qayıdan
öz vətəndaşlarımıza qədər bütün insanlar gömrük və vergi sisteminin
çatışmazlıqlarını daha aydın hiss edir.
Xırda bir
misalla məsələyə aydınlıq gətirmək istəyirəm. Təsəvvür edin ki, inkişaf etmiş
hansısa ölkəyə istirahət və ya başqa məqsədlə səfər etmisiniz. Orada istifadə
etdiyiniz ticarət və iaşə obyektlərində xüsusi geyimlərdə vergi əməkdaşları
sahibkarlıq subyektində dövrüyyəni izləyir. Nə qədər rahat və komfort şəraitdə
özünüzü hiss edə bilərsiniz? Hələ bəzən də vergi orqanı əməkdaşı ilə nəzarət
kassa aparatının başında minbər kimi dayanan polisə bənzər nümayəndə ilə
sahibkar arasında çəkişməyə şahidlik edirkən. Həqiqətən də bu kimi ənənələr bizdə
var və ölkəmizi nüfuzdan salır. Əvvəla sahibkarlıq subyektlərində xidməti
geyimdə xronometraj və ya audit yoxlamalarının aparılması müştərilər və xarici
qonaqlar üçün diskomfort mühitin meydana gəlməsinə səbəb olur. İkincisi isə
qaçma- tutma oyunlarına son qoyulmalıdır. Geniş sərvətlərə malik olan, sürətlə
inkişaf edən dövlət belə məsələlərdə axsamamalıdır. Daha neçə il gərəkdir ki, bu
çatışmazlıqlar aradan qalxsın?
Hesab edirəm ki, sağlam və şəffaf vergi mühitinin
yaradılması üçün lazımi işlər görülmür. Halbuki Azərbaycan öz mədəniyyəti və
iqtisadi mühiti ilə bütün dünyaya örnək ola bilər. Bunun üçün elə bir iqtisadi
mühit yaradılmalıdır ki, vergi ödəyicilərinin özləri vergiləri ödəməkdə maraqlı
olmalıdırlar. Vergi yoxlamalarının həyata keçirilməsində də həmçinin. Ən azı
ona görə ki, audit yoxlaması ödənişsiz olaraq, dövlət hesabına aparılır.
Bizdə isə əksinə,
sanki cəmiyyət sağlam mənəvi mühitə adaptasiya ola bilmir və ya heç bunu istəmir
də. Korrupsiya və rüşvət kimi hallar məhz bu səbəblərdən meydana gəlir.
Mənə elə gəlir ki, bütün sahələrdə ictimai dəstək
hökmən rol olmalıdır. Cəmiyyətdə vergi sahəsi timsalında bütün ziddiyyətli məqamların
aradan qaldırılması, ideoloji və sağlam vergi mühitinin yaradılması, səmərəlilik
anlayışı, sahibkarlıq fəaliyyətinin stimullaşdırılması, bunlara dair etik
prinsipləri əhatə edən, o cümlədən, qanunvericilik layihəsi kimi zəruri olan məsələlər
müəllifi olduğum “Vergi fəlsəfəsi və onun ideoloji əsasları” kitabında yer alıb.
Bu kitab artıq dərc olunub və müvafiq qurumlara göndərilib. Arzu edərdim ki,
vergi islahatları apararkən mənim kitabımda irəli sürülən tezislərdən də
istifadə olunsun. Kitabda bir sıra ümumi məsələlər və onların həlli yolları
üçün təkliflər də şərh edilir.
Onu da yaxşı bilirəm ki, ictimaiyyət nümayəndəsi
kimi, fiziki və yaxud zehni əməyi ilə hər kəs bacaracağı qədər cəmiyyətə
yararlı olmalıdır. Çünki hər bir şəxsin (qeyri maddi anlamda) dəyəri onun cəmiyyətə
faydalılığı qədərdir.