Bəhs etdiyimiz etiraz aksiyalarında heç bir şiddətdən istifadə olunmayıb, lakin bu etirazlar ölkənin həyatına təsir etməklə yanaşı, tarixdə önəmli yer tutmağı da bacarıb.

10) Mahatma Qandinin bir ovuc duzu

1928-də Hindistana bir il içində dominion statusu verilməsi təklifinə müsbət cavab verilməyəndən sonra Hindistan Milli Konqresi müstəqillik elan etdi və 12 mart 1930-cu ildə Qandi və 78 yoldaşı məşhur "Duz yürüşü"nə çıxdı. 388 kilometrlik məsafəni piyada gedərək 24 günə Hind okeanına çatan 61 yaşlı Qandi 6 apreldə ingilis polislərinin qarşısında suya girdi və bir ovuc duz çıxardı. Beləliklə, bir hindlinin duz çıxarması ilə bağlı qəbul edilmiş yasağı pozdu. Bunu görən minlərlə kəndli duz çıxarmaq üçün sahilə axın etdi. Daha sonra Qandi və 60 min adam həbsə atıldı, amma qanun işlənməz hala gəldi. 

9) Tank önündə təkbaşına

5 iyun 1989-cu ildə Çində tələbələrin başladığı demokratikləşmə hərəkatını yatırtmaq üçün Tiananmen meydanına tanklar göndərilib. Gənc bir tələbə isə irəliləyən tankların qarşısında təkbaşına dayanıb. Daha sonra meydandan aparılan etirazçının sağ qalıb-qalmaması ilə bağlı hələ də bir xəbər bilinmir. Onun kimliyi də bilinmədiyi üçün "Naməlum etirazçı" kimi adlandırılır.

8) İrqçiliyi çökdürən qadın

1 dekabr 1955-ci ildə Roza Parks adlı qaradərili qadın qanuna uyğun olaraq bir ağdəriliyə yer verməli olduğu halda bunu etmədiyi üçün həbs olunub. Bundan sonra Martin Lüter Kinq avtobus boykotu elan edib və bu dinc etiraz aksiyası 382 gün çəkib, Kinq həbs olunub. Boykot Amerika Ali Məhkəməsinin əyalətlərarası avtobuslarda və digər nəqliyyat vasitələrində bu ayrı-seçkiliyin ləğv edilməsinə qədər davam edib. 

7) Atletlərin aksiyası

1968-ci ildə Meksika olimpiya oyunlarında 200 metr üzrə qaçışı qaradərili atlet Tommi Smit birinci, ağdərili Peter Norman ikinci, qaradərili Con Karlos üçüncü olaraq tamamlayır. Bəzi iddialara görə, iki qaradərili atletin, bəzilərinə görə isə Normanın təklifi ilə mükafatlandırmada milli marş oxunan zaman Amerikanın qaradərililərə qarşı siyasətinə etiraz olaraq iki qaradərili atlet qara əlcək geyib əllərini havaya qaldırıblar. Norman isə sinəsinə "İnsan haqları üçün olimpiya layihəsi hərəkatı" emblemini taxıb.  

6) Süngüdə çiçək

Vyetnam müharibəsi zaman ABŞ-da edilən bu etiraz üsulu daha sonra bütün dünyaya yayılaraq məhşurlaşıb. Belə ki, 17 aprel 1965-ci ildə Vaşinqtondakı etirazda bir gənc əsgərlərin süngüsünə çiçək taxıb. Bəsit amma güclü mesaj verən bu hərəkət 70-ci illərdəki bir çox etirazlarda təkrarlanıb. 

5) Nyu-Yorkda səssiz yürüş

1917-ci ildə ABŞ-ın St.Luis şəhərində gerçəkləşən kütləvi olaylarda 250-dən çox qaradərili irqçi dəstələr tərəfindən linç edildi. Bu cinayətlərə etiraz edən on minə yaxın qaradərili işçi Nyu-Yorkda səssiz yürüş təşkil eləyib. Bu səssiz yürüş bəzi dəyişikliklərin ilk xəbərçisi olub. 

4) Xalqdan kömək istəyən spiker

1990-cı ildə Estoniya parlamentinin SSRİ əleyhinə qəbul etdiyi qərardan sonra minlərlə etnik rus paytaxt Tallindəki parlament binasını mühasirəyə alıb. Nə sovet əsgərlərinin, nə də polislərin qorumadığı bina yandırılmağa çalışıb. Buna görə Estoniya Ali Sovetinin sədri radio ilə xalqa müraciət edib və "Əziz xalqımız, mühasirə altındayıq, xahiş edirik bizə kömək edin" deyib. Anonsdan 5 dəqiqə sonra bütün Tallin küçəyə axışıb və mühasirədəki parlament binasını ətrafına toplaşıb. Sayca ruslardan çox olan estonlar hər hansı bir şiddətdən istifadə etməyərək bir ağızdan mahnı oxumağa başlayıb. Estonların getdikcə çoxaldığını görən ruslar parlament binasından çəkiliblər. 

3) Rels üzərində oturma aksiyası

Nüvə tullantılarının ətraf mühitə ziyan vurmasının əleyhinə aksiyalar təşkil etmiş etirazçıların daha bir aksiyası Almaniyada gerçəkləşib. Fransadan gətirilən nüvə tullantılarının Almaniyanın Gorleben şəhəri yaxınlığında bir depoya aparılmasına etiraz edən adamlar 2004-cü ildə relslərin üzərində oturaraq bir qatarın gedişini dayandırıb. Bütün dünyaya yayılan bu etiraz nüvə tullantılarına qarşı mübarizədə əhəmiyyətli hadisələrdən sayılır. 

2) Çılpaq qızlar

21-ci əsrdə qadın hüquqlarının müdafiəsinə aid etirazlardan danışarkən Femenin adını çəkməmək olmaz. Ukraynalı bu feminist qrup müxtəlif dinc etirazlarla diqqət çəkməyə nail olublar. Bu etirazların sırasına Ukraynada seks turizminin əleyhinə olanlardan tutmuş,  dünyanın müxtəlif yerlərindəki qadınların haqlarının qorunmasına qədər müxtəlif aksiyalar daxildir. 

1) Duran adam

Türkiyədə, Taksim meydanındakı etirazlar zamanı bütün dünyada Duran Adam kimi tanınan şəxs onlarla etirazın ilhamvericisi olub. Taksim metrosundan çıxdıqdan sonra Atatürk Kültür Mərkəzinə qarşı səssizcə duraraq gözləyən Erdem Gündüz uzun bir müddətdən sonra polisin diqqətini çəkib və nəhayət, polis bölməsinə aparılıb. Lakin onun bu etirazı Türkiyənin və dünyanın müxtəlif yerlərində minlərlə adam tərəfindən təkrarlanıb.