Moderator.az 93-cü ilin iyun qiyamına səbəb olan bir sıra müəmmalı məqamları Milli Qvardiyanın komandiri polkovnik Əzizağa Süleymanovun diliylə oxuculara təqdim edir”¦

“Alay komandiri Elmar Hüseynovla Polis rəisi arasında deyəsən müəyyən razılıq əldə edilmişdi. Gəncədə olduğumuz gündən bir gün sonra onları şəhərdən kənar bir yerdə qonaqlığa dəvət etmişdilər. Ağızucu mənə də təklif etmişdilər ki, istəyirsən sən də gedək. Mən xidməti yoxlamanı bəhanə edərək imtina etmişdim,  Elmar Hüseynov və alay komandirinin arxa cəbhə üzrə müavini Sabir Kərimov birlikdə getmişdilər. Axşamüstü Milli Qvardiyanın qərargah rəisi Tariyel Nəsirovun arxasınca Elmar Hüseynovun xidməti maşını gəlmişdi. Nəsirov ilk öncə getmək istəmirdi, sonradan fikrini dəyişərək mənə xidmətlə bağlı müəyyən göstərişlər verib, onların olduğu yerə getmişdi. Bu gündən başlayaraq hər gün onlar birlikdə kiminsə dəvəti ilə harasa gedirdilər. Mən ilk vaxtlar bunu təbii qəbul edirdim. Bilirdim ki, hər iki şəxs bu zonaya yaxın ərazidə anadan olublar. Lakin getdikcə qonaqlıq məclislərinə başları elə qarışmışdı ki, Milli Qvardiyanın şəxsi heyətinin Gəncəyə hansı məqsədlə gəldiyi demək olar ki, onlar tərəfindən unudulmuşdu. Elmar Hüseynov Tariyel Nəsirovun yumşaq damarını tapıb, onu da ələ ala bilmişdi. Elmar Hüseynov tərəfindən belə qonaqlıqlara cəlb edilən Tariyel Nəsirov təklif olunan dəvətləri üzdə könülsüz qəbul etsə də, müəyyən şəxslər tərəfindən onlara təşkil olunan ziyafətlərdə birgə  iştirak edirdi. Onların qonaqlıq məclisləri artıq Gəncə ətrafından kənarda təşkil edilirdi. Milli Qvardiyanın  Gəncədəki bu məsul şəxsləri, Gədəbəy, Tovuz,  Daşkəsən istiqamətində sanki gəzintiyə gəlmişdirlər. 

        Mən  Alayın şəxsi heyətini  hər gün xidmətlə əlaqədar  təlimatllandırır, komandirlərin iş fəaliyyətlərinə nəzarət edirdim. Gəncə şəhərində və Gəncəətrafı yollarda apardığımız patrul xidməti ilə əlaqədar olaraq, komandirlər mənə postlarda saxlanılan şübhə doğuran şəxslər barəsində gündəlik məlumatlar verirdilər. Gəncə şəhərinə Sürət Hüseynovun yanına tez-tez gələn adamlar arasında Rəhim Qazıyev və  Nemət Pənahov da var idi. Əsasən Rəhim Qazıyevin Gəncə şəhərinə hər gəlişi postlarda duran qvardiyaçılarla münaqişəsiz ötüşmürdi. Komandirlərin mənə verdiyi məlumata əsasən Rəhim Qazıyev  dövlət rəhbərlərinin ünvanına təhqiramiz ifadələr işlədir, qvardiyaçıları hədələmədən belə çəkinmirdi. Mən bu barədə rəhbərliyə məlumat verəndə göstəriş verirdilər ki, dövlət rəhbərliyi tərəfindən Rəhimin hərəkətlərinə baş qoşmamağı məsləhət görürlər. 

     Gəncədə Alay komandiri Elmar Hüseynovun yanına Milli Qvardiyanın yerləşdiyi qərargaha bir yaxın qohumu gəlib gedirdi. Bir gün postlarda xidməti yoxlayarkən həmin şəxsin Sürət Hüseynovun qərargahı adlanan hərbi hissədən Elmar Hüseynovun xidməti maşınında çıxdığını görmüşdüm. Bu neçə gün ərzində postlardan mənə verilən məlumata əsasən Sürət Hüseynov bir dəfədə olsun onun qərargahı adlanan hərbi hissəyə gəlməmişdi. Atası ilə bağlı  Gəncədə onun evinə gələn qonaqları qarşılayırdı. Bütün bunları nəzərə alaraq şəxsən mən onun yaşadığı ərazi yaxınlığına post təyin etməmişdim. Milli Qvardiya rəhbərliyi tərəfindən mənə göstəriş verilmişdi ki, Sürət Hüseynova qarşı dövlət tərəfindən heç bir tədbir nəzərdə tutulmayıb. Sürət Hüseynov Milli Qəhrəmandır. Həm də Ali Sovetin deputatıdır. Məqsəd onu hərbi hissədən uzaqlaşdırmaqdır. Odur ki, Milli Qvardiya alayının komandiri Elmar Hüseynovun xidməti maşınının 709 saylı hərbi hissədən çıxmağını görəndə şübhələndim. Maşını idarə edən şəxs Elmar Hüseynovun sürücüsü yox, onun yanına gələn qohumu idi. Gəncədəki operativ dəstənin rəhbəri bölük komandiri Vaqif Mustafayevə bu şəxsin kimliyi haqında təcili məlumat toplamağı tapşırdım. Həmin gün axşama yaxın bu şəxs barədə tam məlumat əldə etmişdik. Öyrənə bilmişdik ki, həmin şəxs Elmar Hüseynovun yaxın qohumu olmaqla bərabər Sürət Hüseynovun  mühafizəçilərindən biri, həm də onun yaxın qohumudur. Mən bu barədə Milli Qvardiyanın qərargah rəisi Tariyel Nəsirova məruzə etdim. Və şübhələndiyimi dedim. O isə mənə göstəriş vermişdi ki, bu barədə heç kimə məlumat vermədən, həmin adam ətrafında müşahidənizi davam etdirin. Elmar Hüseynov faktiki alay komandiri olsa da xidmətə aid olan göstəriş və tapşırıqlar Milli Qvardiya rəhbərliyi tərəfindən demək olar ki, mənə həvalə olunurdu. Hər gün Gəncəyə dövlət rəhbərlərindən kimsə gəlir, İcra hakimiyyətində yerli XC- üzvləri ilə görüşür Sürət Hüseynov və onun tərəfdarlarını zərərsizləşdirmək üçün plan hazırlanırdı, bir yandan da müntəzəm olaraq Sürət Hüseynovla danışıqlar aparırdılar. Milli Qvardiya komandanlığı,  o cümlədən də mən  bilirdik ki, bu danışıqlar baş tutmazsa Sürət Hüseynovun və onun ətrafındakı silahlı adamları zərərsizləşdirilməsi tapşırığı Milli Qvardiyanın şəxsi heyətinə həvalə olunacaq. Odur ki, şəhərdə gündəlik yoxlanış məntəqələrində növbəli post-patrul xidmətini davam etdirməklə yanaşı, şəxsi heyəti hər ehtimala qarşı növbəti dövlət tapşırığının yerinə yetirilməsi üçün hazırlayırdıq.  

 Sürət Hüseynovun atasının ağır durumda olması xəbərini eşidən müəyyən adamlar demək olar ki ölkənin hər yerindən Gəncəyə gəlirdi. Bütün bunları  nəzərə alaraq Milli Qvardiyaçılara göstəriş vermişdim ki, bu ərəfədə  Gəncəyə gələn tanınmış ziyalılar və ziyarətə gələn qonaqlarla  postlarda heç bir konfliktə yol verməsinlər. Bu, ölkə rəhbərliyinin tapşırığı idi. Odur ki, Gəncədə Sürət Hüseynovla bağlı siyasi vəziyyət bir qədər səngimişdi. Gəncə əhalisinin Sürət Hüseynov ailəsinə böyük hörməti vardı. Açıq aşkar bu hiss olunurdu. Onun atası seyid nəslindən olduğu üçün xüsusi hörmət sahibi idi.  Hərdən qvardiyaçılar mənə sual da verirdilər ki, komandir, bu nə məsələdir. Düzü mən özüm də dərindən bu siyasi məsələnin daxilinə tam bələd deyildim. Ancaq bilirdim ki Gəncədə bir qrup deputat və hərbi qulluqçular bir toplantı keçirib hərbi birlik adlı dövlətdən narazıların birliyini yaradıblar. Gəncədə olduğumuz bu günlər ərzində elə bir dövlət əhəmiyyətli hadisələr baş verməsə də biz gündəlik xidmətimizi  davam etdirirdik.