Dünən Nəsimi
Rayon Məhkəməsində hakim Emin Mehdiyevin sədrliyi ilə Milli Şuranın üzvü,
məhbus hüquqşünas Qurban Məmmədovun cinayət işi üzrə məhkəmə prosesi keçirildi.
Prosesdə ittiham tərəfinin şahidləri
ifadə verdi. İş üzrə zərərçəkmiş şəxs qismində tanınan Pərviz Abbasovun həyat
yoldaşı Sahilə Abbasova ifadəsində bildirdi ki, Qurban Məmmədov travmatologiya
xəstəxanasında ərinə bildirib ki, polisə səhv məlumat versin. “Dedi ki, polis
soruşsa, deyərsən ki, tanımadığım «Mercedess» markalı avtomobil vurub qaçdı. O,
bütün xəstəxana xərclərini ödəyəcəyini, işləmədiyi müddətdə isə hər gün üçün 20
manat verəcəyini bildirdi”. Əlavə etdi ki, kameradan narahat olma, hər şeyi
özüm həll edəcəyəm”. S.Abbasova əlavə etdi ki, həqiqətən də Qurban Məmmədov
xərclərini ödəyib və dekabr ayınadək hər 15 gündən bir onlara 300 manat verib. “Bundan
sonra isə Pərviz ona zəng edəndə dedi ki, gedib işləsin, daha pul verməyəcək,
onun problemi deyil” - deyə şahid vurğuladı.
Dövlət ittihamçısı və Qurban Məmmədov şahidə suallar
ünvanlayıblar. Qurban Məmmədov ondan Pərviz Abbasova polisə yalan məlumat
verməklə bağlı təklifi nə zaman harda etdiyini soruşdu. Şahid bildirdi ki, əri
əməliyyat olunub palataya köçürüldükdən sonra Qurban Məmmədov palatada ona
polisə məlumatı başqa formada verməyi təklif edib.
Qurban
Məmmədov məhkəməyə müraciətlə bildirdi ki, Pərviz Abbasova xəstəxanada əvvəlcə
ilkin tibbi yardım göstərilib, daha sonra rentgen olunub və əməliyyata ehtiyac
olduğu aşkarlandığı üçün 1 gün sonra əməliyyat olunub. “Şahid guya mənim polisə
yanlış məlumat verməyimlə bağlı təklifi əməliyyatdan sonra - palatada etdiyini
deyir. Halbuki ona kimi həm ilk tibbi yardım, həm rentgen, həm də əməliyyat
zamanı nə baş verdiyi soruşulub və onun dedikləri barədə qeydlər aparılaraq,
polisə məlumat verilib. Əgər mən ona təklifi palatada etmişəmsə, deməli o
mərhələyə qədər zərərçəkmiş şəxs tibbi personala doğru məlumat verib “ - deyən
təqsirləndirilən şəxs məhkəmə qarşısında vəsatət qaldırıb:
“Zərərçəkmiş
şəxsə ilkin tibbi yardım göstərmiş tibb bacılarının, rentgenoloqun, həmçinin
əməliyyat aparmış tibbi personalın məhkəməyə şahid qismində dəvət edilərək,
Pərviz Abbasovun hadisə ilə bağlı hansı məlumat verdiyini araşdırmağınızı xahiş
edirəm. Həmçinin Pərviz Abbasov da ifadəsində bildirmişdi ki, guya mən ona
təklif edəndə palatada tək olub. Halbuki mən ondan palatada dəfələrlə hadisənin
necə baş verdiyi barədə suallar vermişəm və buna həmin palatada yatan xəstələr
də şahiddir. Ona görə də, həmin vaxt palatada olan şahidlərin xəstəxana
vasitəsilə müəyyənləşdirilərək məhkəməyə dəvət edilmələrini xahiş edirəm”.
Daha
sonra şahid qismində Pərviz Abbasovun anası Ədilə Məmmədova ifadə verib. O da
oxşar ifadə verərək, Qurban Məmmədovun pul təklifi qarşılığında polisə yalan
məlumat verməyi təklif etdiyini, sonradan pulu verməyi dayandırdığı üçün
şikayət etdiklərini bildirdi.
Qurban
Məmmədob ondan harada işlədiyini soruşdu. Ədilə Məmmədova Nəsimi rayon 20-ci
polis bölməsində xadimə işlədiyini dedi. Digər suala cavab olaraq əlavə etdi
ki, bölmənin rəisi olmuş Sahib Babayevin də otağının təmizliyi ilə məşğul olub.
Qurban
Məmmədov bildirdi ki, cinayət işinə səbəb olan hadisə məhz 20-ci polis
bölməsinin ərazisində baş verib. “Mən iki dəfə o bölmədə olmuşam və rəisin
otağında Ədilə Məmmədovanın əlində süpürgə təmizlik apardığını görmüşəm. Həmin
vaxt bölmənin rəisi olan Sahib Məmmədov mənə bildirdi ki, Pərviz Abbasov
səninlə başqa bir maşının arasında qalıb. Rəis əlavə etdi ki, digər maşını tapmaq
mümkün deyil, ortada da şikayətçi yoxdur, gəl bu məsələni həll edək. Mən də
dedim ki, necə bilirsiniz elə edin, mən də qol çəkim. Sonra da müstəntiq məni
çağırdı ki, pul ver ekspertdən rəy alaq. Mən də bildirdim ki, günahım olmadığı
halda, niyə pul verməliyəm”. Qurban Məmmədov əlavə etdi ki, sonradan bu barədə
prokurorluğa şikayət edib. Prokurorluqda başlayan araşdırma zamanı rəis Sahib
Babayev ifadə verib ki, mən Ədilə Məmmədovanı tanımıram və bölmədə belə adam
işləmir. “İndi şahid Ədilə Məmmədova bölmədə xadimə işlədiyini təsdiq etdi və
Sahib Babayevin prokurorluq orqanına yalan ifadə verməsi sübut olundu”. Daha
sonra təqsirləndirilən şəxs növbəti vəsatətlə çıxış etdi. “Sahib Babayevin
yalan ifadə verməsinin səbəbinin araşdırılması, həmçinin yol-nəqliyyat hadisəsi
ilə bağlı 4 şahidin hansı əməliyyat tədbirləri ilə müəyyən edilməsinə açıqlıq
gətirməsi üçün şahid qismində məhkəməyə dəvət etməyinizi xahiş edirəm. Çünki
şahidlərin yalançı olduğu məlumdur. Onlardan biri hadisənin saat
14.00-da,digəri isə 15.00-da baş verdiyini deyir. Halbuki hadisə saat 12.20-də
baş verib” - deyə Q.Məmmədov bildirdi.
Daha
sonra Q.Məmmədov şahid Ədilə Məmmədovaya sual verərək, Pərviz Abbasova
hədə-qorxu gəlib-gəlmədiyini soruşdu. Şahid isə belə bir halla rastlaşmadığını
bildirdi. Q.Məmmədov növbəti vəsatətlə çıxış etdi: “Mənə qarşı Cinayət
Məcəlləsinin 299-cu maddəsinə əsasən ittiham irəli sürülüb ki, guya mən
zərərçəkmişi və şahidi hədə-qorxu yolu ilə ələ almışam. Halbuki nə zərərçəkmiş,
nə də şahid ifadələrində bu ittiham təsdiqini tapmır. Buna görə də, barəmdə
seçilmiş həbs qətimkan tədbirinin dəyişdirilməsini xahiş edirəm” - tələb etdi. O
həmçinin hadisə yerinə baxış keçirilməsi və hadisənin baş verməsi ilə bağlı
məhkəmə ekspertinin keçirilməsi barədə də vəsatət qaldırıb.
Qurban
Məmmədovun verdiyi vəsatətlərdən yalnız biri - həbs-qətimkan tədbirinin
dəyişdirilməsi barədə vəsatət müzakirəyə çıxarılıb. Prokuror vəsatətə etiraz
edib və təmin edilməməsini istəyib. Müşavirə üçün fasilə verən hakim,
qayıtdıqdan sonra vəsatətin təmin edilməməsi ilə bağlı qərarı elan etdi. Digər
vəsatətlərə isə 23 oktyabra təyin edilmiş növbəti prosesdə baxılacaq.
Qeyd
edək ki, Qurban Məmmədova qarşı ötən ilin sentyabr ayında baş vermiş avtoqəza
ilə bağlı olaraq, Cinayət Məcəlləsinin 263.1-ci (Yol hərəkəti və nəqliyyat
vasitələrinin istismarı qaydalarını pozma) maddəsi ilə cinayət işi açılıb və bu
il iyunun 4-də barəsində həbs-qətimkan tədbiri seçilib. Daha sonra isə ona
qarşı Cinayət Məcəlləsinin 299.1-ci (Şahidin, zərərçəkmiş şəxsin yalan ifadə verməsi
məqsədi ilə və ya ekspertin yalan rəy və ya yalan ifadə verməsi məqsədi ilə,
habelə tərcüməçinin yanlış tərcümə etməsi məqsədi ilə onları pulla ələ alma)
maddəsi ilə yeni ittiham elan edilib.
Qurban
Məmmədov həbsini siyasi sifariş olduğunu bəyan edərək, Milli Şurada aktiv
siyasi fəaliyyəti, radikal çıxışları ilə əlaqələndir.