“Minsk qrupunun “növbətçi bəyanat” xarakterli açıqlaması Azərbaycanı qane etmir və edə də bilməz”

Azərbaycan ordusunun 27 sentyabr tarixndən başlayan əks-hücum əməliyyatı uğurla davam edir.

Moderator.az olaraq Azərbaycan Gözdən Əlillər Cəmiyyətinin sədri Səmyar Abdullayevlə söhbətimizdə, ordumuzun qələbələri ilə yanaşı, cəmiyyətin baş verənlərə münasibətini, xalqın orduya dəstək arzusunu və s. kimi məsələləri şərh etməyə çalışdıq.

-Səmyar bəy, artıq altıncı gündür ki, orduzumun apardığı uğurlu əks-hücum əməliyyatı davam edir, bir sıra yüksəkliklər və yaşayış məntəqələri düşməndən azad edilib. Sizcə bu günə qədər baş verənlər Azərbaycan ordusunun gücü, döyüş əzmi haqqında nə deyir?

-Azərbaycan Silahlı Qüvvələrinin düşmən təxribatlarına cavab olaraq başlatdığı uğurlu əks-hücum əməliyyatları  sadəcə ölkəmizdə deyil, dünyanın harasında yaşamasından asılı olmayaraq, hər bir soydaşımız tərəfindən böyük həyəcan və sevinclə izlənməkədədir. Azərbaycan ordusunun cəmi bir neçə günün içərisində düşmənin yüzlərlə zirehli texnikasını, artilleriya qurğusunu, tankını və s. məhv etməsi, bir sıra yaşayış məntəqələrini və yüksəklikləri işğaldan azad etməsi Silahlı Qüvvələrimizin qüdrətindən, onun yenilməzliyindən xəbər verir. Altı günlük müharibənin təhlili göstərir ki, ali baş komandanın rəhbərliyi altında Azərbaycan ordusunun güclənməsi, onun maddi-texniki bazasının möhkəmlənməsi, peşəkarlığının artırılması, döyüş əzminin yüksəlməsi baxımından böyük işlər görülüb və bu gün görülən işlər öz bəhrəsini verməkdədir. Əminəm ki, yaxın vaxtlarda ordumuzun hücumu öz məntiqi sonluğuna çatacaq və işğal edilmiş bütün torpaqlarımız azad ediləcəkdir. Bu, hər bir azərbaycanlının arzusu və məqsədidir.

-Bu günlərdə Minsk qrupunun həmsədrləri müharibə tərəflərinə müraciət edərək atəşə dayandırmağa, problemin sülh yolu ilə həlli məqsədi ilə danışıqları bərpa etməyə səslədi. Sizcə Minsk qrupunun işğalçı Ermənistaan təzyiq göstərmək əvəzinə, tərəfləri sülhə səsləməsi, yenə də ümumi, mövcud reallıqla uzlaşmayan bəyanatla çıxış etməsi nə dərəcədə məntiqlidir?

-Hesab edirəm ki, Minsk qrupunun bu bəyanatı onun bir daha işğalçı ilə işğala məruz qalana fərq qoymadığını göstərir. Bu bəyanat göstərir ki, Minsk qrupu münaqişənin həllində deyil, onun indiki vəziyyətdə qalmasında maraqlıdır. Əgər belə olmasaydı, o zaman Minsk qrupu BMT-nin Qarabağala bağlı 4 qətnaməsinin icrasına nail olmaq üçün bu illər ərzində Ermənistana təzyiq göstərər, onun ölkəmizə qarşı təxribatlarının qarşısının alınması istiqamətində əməli addımlar atardı. Lakin biz bunca illər ərzində Minsk qrupunun problemin həli ilə bağlı hər hansı əməli-praktik addım atamsına şahid olmadıq.

Hesab edirəm ki, Minsk qrupunun bu bəyanatı adıçəkilən qurumun “növbətçi bəyanat” xarakterli növbəti açıqlamasından başqa bir şey deyil və Azərbaycan problemin hərbi müstəvidə həlli istiqamətindəki səylərini davam etdirməlidir.

Onu da xatırladım ki, Azərbaycan Respublikasının prezidenti cənab İlham Əliyev dəfələrlə bütün beynəlxalq təşkilatları Ermənistanın təxribatçı hərəkətləri haqqında məlumatlandırmış, açıq şəkildə bəyan etmişdi ki, işğalçı dövlət yeni müharibəyə hazırlaşır. Ölkə başçısı beynəlxalq qurumları, dünyanın aparıcı dövlətlərini bu müharibəyə əngəl olmağa səsləmişdi. Lakin təəssüflər olsun ki, Azərbaycanın bu çağırışına lazımi reaksiya verilmədi. Belə olan halda Azərbaycanın özünü, öz haqq işini şanlı ordusunun gücü hesabına müdafiə etməsi təbiidir və bu, beynəlxalq hüquqla da təsbit edilən bir haqdır.

-Bu günlərdə sadə vətəndaşlardan tutmuş iri şirkətlərə qədər bir çox fərd və qurum ordumuza dəstək məqsədi ilə Silahlı Qüvvələrə Yardım Fonduna vəsaitlər köçürməkdədir. Getdikcə genişlənməkdə olan bu tendensiyanı necə dəyərləndirirsiniz?

-Vətəndaşlarımızın, o cümlədən özəl və dövlət qurumlarının, müxtəlif şirkət və müəssisələrin Silahlı Qüvvələrin Yardım Fonduna müəyyən vəsaitlər köçürməklə Azərbaycan ordusuna dəstək vermələrini, ordumuzun qələbələrində pay sahibi olmağa çalışmalarını müsbət qimətləndirirəm. Hesab edirəm ki, bu, insnalarımızın yüksək vətənpərvərlik şüurundan, dövlətçilik əzmindən, orduya olan sevgisindən irəli gəlir və istənilən halda alqışlanmalıdır.

Bildiyiniz kimi, Azərbaycan ordusunun təchizatı dövlətimiz tərəfindən yüksək səviyyədə həyata keçirilir və bu baxımdan Silahlı Qüvvələrimizdə hər hansı çətinlik mövcud deyil. Başqa sözlə desək, orduya dəstək məqsədi ilə atılan bu addımlar ordunun bu cür dəstəyə ehtiyacı olması ilə bağlı deyil. Sadəcə olaraq, müharibənin getdiyi indiki zamanda hər bir azərbaycanlı Azərbaycan ordusuna dəstək verməyi, ona maddi və ya mənəvi baxımdan dayaq durmağı, ordu ilə həmrəylik sərgiləməyi özünə borc hesab edir. Silahlı Qüvvələrə Yardım Fonduna edilən müraciətlər də məhz bununla bağlıdır və mən vətəndaşlarımızın bu təşəbbüsünü dəstəkləyirəm.

Habelə hesab edirəm ki, iri şirkətlər, biznes qurumları, istehsalat müəssisələri, iş adamlarımız bu məsələdə aktiv olmalı, imkan daxilində orduya dəstək verməklə qələbəmizi yaxınlaşdırmalıdır. Mən bütün iş adamlarımızı bu prosesdə fəal olmağa səsləyirəm. Bu gün Silahlı Qüvvələrə Yardım Fonduna hər hansı məbləğdə vəsait köçürən, ordumuza dəstək olan hər kəs bilməlidir ki, tarix onların bu xidmətini əsla unutmayacaq.

-Səmyar bəy, Azərbaycan ordusunun döyüş əzmi ortadadır və düşmən ordusuna qısa zamanda böyük zərbələrin vurulması bu əzmin göstəricisidir. Bəs Azərbaycan xalqının mübarizə əzmi, əhval-ruhiyyəsi haqqında nə deyə bilərsiniz?

-Düşünürəm ki, Silahlı Qüvvələər Yardım Fonduna edilən müraciətlərin kütləviləşməsi, minlərlə insanın hərbi əməliyyatlarda könüllü şəkildə iştirak etmək istəyi ilə bağlı Səfərbərlik və Hərbi Xidmətə Çağırış üzrə Dövlət Xidmətinə müraciət etməsi, hərbi əməliyyatların sona qədər davam etdirilməsi qətiyyətinin sosial sifariş kimi meydana çıxması xalqımızın mübarizə əzminin hansı səviyyədə olması sualına ən yaxşı cavabdır.

Bu gün Azərbaycan ordusundakı döyüş əzmi eyniylə Azərbaycan cəmiyyətində müşahidə olunmaqdadır. Bir nəfər kimi ordumuzun yanında yer alan xalqımız ali baş komandanın rəhbərliyi altında keçirilən hərbi əməliyyatların sona qədər davam etdirilməsini, işğaldakı bütün torpaqlarımızın son qarışna qədər azad olunmasını istəyir və bunun üçün hər cür fədakarlığa hazırdır.

Inanıram ki, ordumuzun əks-hücum əməliyyatları yaxın müddətdə işğaldakı bütün ərazilərimizin azadlığı ilə nəticələnəcək və xalqımız bu tarixi zəfəri öz tarixi torpaqlarında – Şuşada, Xankəndində böyük təntənə ilə qeyd edəcək.

Yaşasın Azərbaycan ordusu! Yaşasın Azərbaycan xalqı!

Seymur ƏLİYEV