“20 Yanvar faciəsini törədənlər məsuliyyətə cəlb edilməlidir”

“20 Yanvar Azərbaycan xalqının qəhrəmanlıq salnaməsidir. Çünki məhz bu tarixdə xalq sovet hökumətinin cinayətkar davranışına öz cəsarəti, mətinliyi ilə meydan oxudu, öz azadlığını hətta həyatı bahasına qorumağa hazır olduğunu nümayiş etdirdi”.

Bunu Moderator.az-a açıqlamasında Respublika Veteranlar Təşkilatının sədr müavini, polkovnik Cəlil Xəlilov bildirib. C.Xəlilovun fikrincə, 20 Yanvar faciəsinin əsas müqəssiri olan Mixail Qorbaçov sovet ordusunu Bakıya yeritməklə, Azərbaycan xalqına qarşı dəhşətli cinayətə yol verib:

“1990-cı ilin 20 yanvar tarixində Qorbaçov hökuməti Bakıya ordu yetitməklə Azərbaycan xalqına xəyanət etdi. Silahsız insanların üzərinə tanklarla, ağır texnika ilə hücum etmək, onları zorakılığa məruz qoymaq əslində faşizmin bir nümunəsi kimi dəyərləndirilməlidir.

Qorbaşov hələ də baş verənlərə görə Azərbaycan xalqından üzr istəməyib. Biz istərdik ki, 20 Yanvar cinayətini törədənlər məsuliyyətə cəlb olunsun. Onlar Azərbaycan xalqından, qətlə yetirdikləri insanların doğmalarından üzr istəsinlər”.

C.Xəlilov ulu öndər Heydər Əliyevin 20 Yanvar faciəsinə çevik münasibətinə də diqqət çəkib, onun bu addımının milli tariximiz baxımından mühüm önəm kəsb etdiyini vurğulayıb:

“Bu hadisəyə ilk qiyməti ümummili lider Heydər Əliyev verdi. O, Azərbaycan nümayəndəliyinə gələrək bu məsələyə siyasi münasibət ortaya qoydu. Bu, həmin vaxt heç də asan məsələ deyildi. Ulu öndər bu addımı ilə həm öz həyatını, həm də ailəsinin həyatını təhlükə qarşısında qoymuş oldu. Bu, ulu öndərin xalqın təhlükəsizliyini öz təhlükəsizliyindən daha üstün tutmasının bariz nümunəsi idi. Biz 20 Yanvar olaylarının ildönümü qeyd etdiyimiz bir zamanda ulu öndərin bu cəsarət və fədakarlığına da diqqət yetirməli, onun tarixi xidmətinin əhəmiyyətini gənc nəslə təbliğ etməliyik”. 

Seymur ƏLİYEV