“Ulu babam Aşıq Ələsgər 1821-ci ildə Göyçə mahalının Ağkilsə kəndində Novruz bayramı günü dünyaya göz açıb. Mənim babam Talıb kişi də aşıq olub. Bu günlərdə dədə Ələsgərin 200 illik yubileyi ilə bağlı ölkə başçımızın sərəncamı bütün qohumları, o cümlədən Ələsgər sevərlərin hər birini sevindirdi. Mən ölkə başçımız cənab İlham  Əliyevə öz təşəkkürümü bildirirəm. Bu yubiley vasitəsilə bir daha aşıq Ələsgərin şeriyyatı xatırlanacaq, yenidən gənc nəsillərimizə təqdim olunacaq. Dövlət hər zaman aşıq sənətinin və xüsusilə də aşıq Ələsgərin qeydinə qalıb, hər zaman ona, yaradıcılığına qiymət verib. Belə ki, 1972-ci ildə ulu öndər Heydər Əliyevin sərəncamı ilə Göyçə mahalında  Ələsgərin büstü qoyuldu və orada təntənəli yubiley keçirildi. Ümumiyyətlə aşıq sənəti YUNESKO-nun Qeyri maddi-mədəni irs siyahısına salındı, dünya səviyyəsində hörmətli vitse prezidentimiz Mehriban Əliyeva sayəsində daha da ucaldı”

 

Bunu Moderator.az-a açıqlamasında Aşıq Ələsgərin nəticəsi, “Dədə Ələsgər ocağı” ictimai birliyinin sədri Xətai Ələsgərli deyib. Ustad aşığın nəticəsi daha sonra əlavə edib.

 

“Babam aşıq Talıb Aşıq Ələsgərin kiçik oğlu idi, həm də aşıqlıq edirdi. Babamın həyat yoldaşı, bizim Zinyət nənəmiz Ələsgərin həm qardaşı qızı idi, həm də gəlini. Onlar hər zaman dədə Ələsgər haqqında söhbətlər edirdilər, biz də bu söhbətləri yadımızda saxlayırdıq. Hətta son dövrlərdə çıxan atamın kitablarında da bu haqda yazılıb. Dədə Ələsgər təkcə gözəllərə dediyi gözəlləmələrlə yadda qalmayıb, onun iç dünyası tamam başqadır. Dədə Ələsgərin savadı olmasa da iti hafizəsi olub. Hətta elə olub ki, bir toyda 5-6 şeir qoşub, onların hər birini yaddaşında saxlayıb. Günümüzədək gəlib çatan şeirləri də məhz dildən-dilə ötürülənlərdir. Mənim babam aşıq Talıb da təhsil almamışdı, yaza bilmirdi, amma bütün şeirləri əzbər bilirdi” deyə ustad aşığın nəticəsi bildirib.

 

Nəticəsi Aşıq Ələsgərin məzarının Göyçə mahalından Bakıya köçürülməsi məsələsinə də aydınlıq gətirib.

 

“Əslində bunu Aşıqlar birliyinin sədri Məhərrəm Qasımlı demişdi, amma biz əsla buna razılıq verə bilmərik, ümumiyyətlə olmaz. Çünki biz Göyçə mahalına, o torpaqlara qayıdacağıq. Oralar bizim torpaqlardır, biz oradan məcburiyyət qarşısında qaçıb gəlmişik, məzarımızı bura gətirəsi deyilik ki. Biz ümidlə yaşayırıq ki, ora qayıdacağıq. Biz məzarı Bakıya gətirə bilmərik, buna haqqımız da yoxdur, Aşıq Ələsgərin ruhunu incidə bilmərik. Bunu bizə nə Allah, nə də dədə Ələsgərin ruhu bağışlayar. Dədə Ələsgərin ruhu bizi ora aparacaq, məzarını da orada bərpa edəcəyik. Buna həqiqətən də inanıram” deyə aşığın nəticəsi bildirib.

 

Xətai Ələsgərli Moderator.az vasitəsilə ulu babası ilə bağlı istəklərini də dilə gətirib.

 

“Biz ailəsi olaraq çox istərdik ki, Bakı şəhərinin mərkəzi küçələrindən birinə Aşıq Ələsgərin adı verilsin, ulu babamın şəhərdə heykəli yoxdur, ona heykəl qoyulsun. Onun adına heç bir mədəniyyət ocağı,  muzey də yoxdur. Bir mədəniyyət ocağı da Aşıq Ələsgərin adı ilə bağlı olsun. Onu da deyim ki, vaxtilə gəmilərdən biri Aşıq Ələsgərin adını daşıyırdı, sonra nədənsə həmin gəmini görmədik, fikirləşdik ki, daha istifadəyə yararlı deyil. Yenidən onun adına bir gəminin olmasını çox istərdik. Bu nəinki bizim ulu babamıza, ümumilikdə aşıq sənətinə verilən bir dəyərdir” deyə Xətai Ələsgərli bildirib.