Heç birimiz hüquq-mühafizə orqanlarının əməkdaşları tərəfindən saxlanılmaq  halından   sığortalanmamışıq. 

Polis tərəfindən saxlanılarkən özünüzü necə aparmalısınız?

Belə bir vəziyyətdə  necə etməlisiniz ki,  davranışınız,sözləriniz,hərəkətləriniz sizə ziyan vurmasın?

Saxlanılan hər bir vətəndaş bu suallarla qarşılaşır   və  həmin sualların cavabını vaxtında  öyrənmədiyinə görə təəssüflənir.

 

DİQQƏT! Unutmayın ki, Azərbaycan Respublikası  Konstitusiyasının 66-cı maddəsinə uyğun olaraq, özünüzə və yaxınlarınıza qarşı ifadə verməmək, yəni izahat və ifadələrdən imtina etmək hüququnuz var. 

 

Dərhal hərəkət  etməyə və özünüzü müdafiə etməyə çalışmayın! Heç bir sənəd təqdim etməyin və heç bir sənədi imzalamayın! Şahidlərin və şübhəlilərin dairəsini genişləndirməyin. Vəkildən hüquqi yardım almadan təqdim etdiyiniz hər bir şahid, fərqinə varmadan sizə qarşı ifadə verəcək!

 

Hüquq-mühafizə orqanlarının əməkdaşları məhz stressli vəziyyətdə olduğunuz, vəziyyətə nəzarət etmədiyiniz və məlumatı dəyərləndirmədiyiniz məqamda sizdən  izahat və ifadə almağa çalışırlar. Siz yalnız  etibar etdiyiniz vəkillə məsləhətləşdikdən sonra ifadə verə bilərsiniz.

 

Əgər siz şübhəli və ya təqsirləndirilən şəxs qismində dindirilirsinizsə, vəkil tutmaq üçün vaxt tələb etmək hüququnuz var. Özünüz vəkil tutmaq istəsəniz,  sizə dövlət hesabına təyin edilmiş vəkilin xidmətlərindən imtina etmək hüququnuz da var. Müstəntiq bu vaxtı  sizə verməyə  borcludur. Əgər sizin artıq öz vəkiliniz varsa, onun dəvət olunmasını tələb edin və digər müdafiəçilərlə işləməyə razı olmayın.

 

 

Polis əməkdaşlarının bütün tələblərinə əməl edin - onlar sizin təqsirinizi və ya təqsirsizliyinizi qiymətləndirmirlər, sadəcə olaraq öz işlərini görürlər - sizi saxlamaq  tapşırığını yerinə yetirirlər. Müqavimət göstərməyin, vəziyyət daha da pisləşə bilər. Səmimiyyətinizi qoruyun.

Saxlanmağınızın səbəbini öyrənin. Bunu sizə izah etməlidirlər.Əgər izah etmirlərsə, vəkil tələb edin. Vəkillə məsləhətləşmədən  heç bir ifadə verməmək və ya hər hansı sənədə imza atmamaq hüququnuz var. Üstəlik, vəkilsiz hüquq-mühafizə orqanları ilə hər hansı ünsiyyətdən imtina edə bilərsiniz.

Öz vəkiliniz varsa, onu dəvət etməyinizi xahiş edin. Müstəntiq və ya əməliyyat müvəkkili bunu etməyə borcludur. 

Müstəntiq sizin müdafiəçinizlə(vəkilinizlə) şəxsi  və konfidensial görüşünüzü təmin etməyə borcludur. Öz vəkiliniz olmasa vəkil tutmağa maddi  imkanınız olmasa belə dövlət hesabına   vəkil tələb etmək hüququnuz var. Vəkilin iştirakı olmadan  ifadə verməmək hüququnuz var. 

 

Əgər günahsızsınızsa, amma sizi etiraf etməyə məcbur edilirsinizsə, ifadə verməkdən imtina edin. Bu yolla, heç olmasa özünüzə zərər verməzsiniz. Yaxınlarınıza vaxt qazandırın və  sizə vəkil tutmaq şansı verin.