Ötən gecə Ukrayna paytaxtı Rusiya tərəfindən ballistik və qanadlı raketlərlə novbəti hava hücumuna məruz qalıb. Bütün raketlər məhv edilib, lakin raketlərin qalıqları binaları zədələyib, uşaqlar həlak olub.

 

Moderator.az xəbər verir ki, bu barədə Kiyev şəhərinin hərbi administrasiyası məlumat verib. Məlumatı "slovoidilo.ua" nəşri yayıb.

 

"Yayın ilk günü. Uşaqların Beynəlxalq Müdafiəsi Günü. Raşistlər isə paytaxta növbəti hücum edir və yenidən ölüm saçır! Ukrayna uşaqlarını qətlə yetirirlər", - administrasiya rəhbəri Sergey Popko qeyd edib.

 

Kiyev və Kiyev vilayəti ərazisində hava həyəcanı bir saat 14 dəqiqə davam edib. İlkin olaraq rusiyalı hərbçilər region tərəfə raketləri təyyarələrdən deyil, yer mənzilli operativ-taktiki raket komplekslərindən buraxıb.

 

Səhər tezdən raket qalıqlarının paytaxtın Dnepr vı Desnyansk rayonlarında düşməsi səbəbindən dağıntılar barədə məlumatlar yayılıb, poliklinika və yaxınlıqdakı çoxmərtəbəli binanın zədələndiyi deyilir.

 

İlkin məlumata görə, üç nəfər həlak olub, daha 14 nəfər yaralanıb. Həlak olanlar arasında  11 və 5-6 yaşlı uşaqlar da var.

 

Ukrayna Silahlı Qüvvələri Baş Qərargahının səhər məlumatında deyilir ki, hava hücumundan müdafiə qüvvə və vasitələri ilə 10 raketin hamısı məhv edilib.

 

Ötən sutka ərzində Rusiya ordusu cəmi üç raket və 29 aviasiya zərbəsi endirib, yaylım atəşli reaktiv sistemlərindən Ukrayna qoşunlarının mövqeləri və yaşayış məntəqələri 49 dəfə atəşlərə məruz qalıb.

 

Ukraynada Rusiyanın hərbi  təcavüzü nəticəsində mayın 30-a olan məlumata görə artıq 483 uşaq qətlə yetirilib.

 

Bu barədə Ukrayna Baş Prokurorluğu ofisinin mətbuat xidməti məlumat verib.

 

Qeyd edilir ki, daha 989 uşaq müxtəlif ağırlıq dərəcəsində yara alıb. Zərərçəkən uşaqların ümumi sayı 1472 nəfərdir.

 

"Bu rəqəmlər son deyil. Döyüş əməliyyatlarının aparıldığı, müvəqqəti işğal edilmiş və azad edilmiş yerlərdə onların müəyyən edilməsi üzrə iş davam etdirilir", - məlumatda deyilir.

 

Ofisin məlumatında deyilir ki, uşaqların ən çox zərər çəkdiyi rayonlar Donetsk, Xarkov, Kiyev, Xerson, Zaporojye, Nikolayev, Dnepropetrovsk, Çerniqov, Luqansk vilayətləridir.

 

Mayın 29-da Dnepropetrovsk vilayətinin Pokrovskoye qəsəbəsinin atəşə tutulması nəticəsində 11 yaşlı oğlan yaralanıb.

 

Elə həmin gün Xarkov vilayətinin Kovşarovka qəsəbəsinin raket atəşinə tutulması nəticəsində 15 yaşlı oğlan yaralanıb.

 

Mayın 27-də isə Çerniqov vilayətini Çaykino kəndinin atəşə tutulması nəticəsində 14 yaşlı qız uşağı xəsarət alıb.

 

Xatırladaq ki, rusiyalılar Donbasda Konstantinovka məntəqəsini yaylım atəşli raket sistemləri ilə atəşə tutması nəticəsində həlak olanlar arasında bir körpə də olub.

 

Həmçinin Kramatorskun atəşə tutulması nəticəsində xəsarət alan qız uşağı xəstəxanada dünyasını dəyişib.