Moderator.az bir qayda olaraq parlamentdə cəmiyyətin istəklərini, umacaqlarını, bir çox insanın üzləşdiyi problemləri parlament tribunasından səsləndirən millət vəkillərinin çıxışını sinxron olaraq oxucularına təqdim etmək xətti götürüb. Parlamentin dünənki iclasında hər kəsin marağına səbəb olacaq bir çıxış da millət vəkili Qənirə Paşayevadan gəldi, onun fikirlərini eksklüziv olaraq təqdim edirik:

“Bəzi qanunların həyata keçməməsi elə bir problemlər yaradır ki, həmin problemlərlə seçildiyimiz bölgələrə gedən zaman mütləq onu parlamentdə səsləndirməyi bizdən tələb edirlər və əslində bu həm də bizim bir vəzifəmizdir. Yəni o insanların səsini, düşüncələrini səsləndirməliyik. “Tibbi sığorta haqqında” qanun yəqin çox nadir qanunlardandır ki, 15 ildir ki, hələ fəaliyyətə keçmir. Biz bu gün həmin qanuna texniki düzəliş edirik, amma bu gün də hələ bu qanun işləmir və bu qanunun işləmə mexanizmlərinin gələn ildən işləyəcəyi nəzərdə tutulur. Təbii ki, bu çox önəmlidir. Çünki mən şəxsən o millət vəkillərindənəm ki, kənd bölgələrini təmsil edirəm, kəndlərdən gəlirəm, özəlliklə bu qanunun maddələrindən, tərəflərindən biri ondan ibarətdir ki, işsiz, sosial yardım alan  insanların belə icbari tibbi sığortasının olması onların işini xeyli yüngülləşdirə bilərdi. Elə insanlarımız var ki, onlar tibbi yardım əldə etdikləri zaman çox ciddi problemlərlə üzləşirlər. Mən rayondan iki gündür gəlmişəm, Səhiyyə Nazirliyindən bu günə qədər bəlkə də 17-18 xəstənin təcili əməliyyat olunması və ya rayondan gətirilən xəstələrin üzləşdiyi o problemləri aşaraq  xəstəxanalarda yerləşdirilməsini xahiş etmişəm. Təbii ki, bütün bunlar çox ciddi məsələlərdir, ona görə də tibbi sığortanın çox qısa zamanda tətbiqi lazımdır ki, insanların bu istiqamətdə hüquqlarının müdafiəsinə kömək etmiş olsun. 

Eyni zamanda bu qanunun tətbiqi bizdə təbii ki, ciddi tibbi islahatlara da kömək edəcək. Bu qanun son nəticədə həkimlərin də, pasiyentlərin də hüquqlarını müdafiə edəcək. Çünki tibbi sığorta olmadan hansı qanunu qəbul edirsiniz edin, bu sahədə ciddi uğurlu addım atmaq mümkünsüzdür. Ona görə də biz müvafiq orqanları çağırırıq ki, bütün qanunvericilik bazası hazırlanmış, maliyyəsi ayrılmış, siyasi iradə ortaya qoyulmuş  “Tibbi sığorta haqqında” qanunun həyata keçirilməsini təmin etsinlər. Nəticədə bu qanunun işləməsiylə bu sahədə üzləşdiyimiz bir çox problemlər, şikayətlər ciddi şəkildə ortadan qaldırılacaq.

Mən parlamentin sədri Oqtay müəllimə də təşəkkür edirəm ki, o autizm xəstələrinə həssaslıq göstərərək Sosial Siyasət Komitəsinə bu məsələdə qanunvericilik bazası yaradılması göstərişini verdi. Aprelin 2-i Beynəlxalq Autizm Günü idi və bu ay Autizm Ayıdır. Bu xəstəlikdən əziyyət çəkən uşaqların valideynləri də, bu sahədəki problemlərlə məşğul olan təşkilatlar da millət vəkillərinə çoxsaylı müraciətlər göndərirlər, bizimlə gəlib görüşürlər. Onlar çox xahiş edirdilər ki, bununla bağlı məsələyə də diqqət göstərilsin. Necə ki, biz bir müddət öncə dağınıq sklerozla bağlı sənəd qəbul etdik, autizmlə bağlı da belə bir sənəd qəbul edilməsini xahiş edirlər. Onların bir xahişi də var. Mən Sosial Siyasət Komitəsi rəhbərliyindən də xahiş edirəm ki, belə bir həssas qanunun parlamentdəki müzakirəsində həmin təşkilatların da xahişi nəzərə alınaraq onlar da dəvət edilsin. Çünki müəyyən məsələlər var ki, gərək orda öz əksini tapsın. Bu gün elə bir vəziyyət yaranıb ki, heç bir xəstənin sənədlərində autizm adı çıxmadığına görə çaşqınlıq yaranır. Sabah həmin xəstəni xaricə aparanda o sənədlərə xarici mütəxəssislər baxacaq, o zaman bizim tibb işçilərinə çox neqativ şəkildə yanaşacaqlar ki, necə ola bilər, autizm xəstəsi başqa xəstəlik adı altında sənədləşdirilsin. Bu, ölkənin tibb sistemi üçün də çox vacib məsələdir. Ona görə də bu müzakirələrin qısa zamanda aparılması çox vacibdir. Çünki bu xəstəliklə mübarizə aparmaq çox ağırdı və ailələr çox ciddi şəkildə çətinlik çəkir və dövlətin burda yardımlarına ehtiyac var.”