“Mən on beş il idi ticarətlə məşğul olurdum, əvvəllər hər şey yaxşı idi. ”Binə" bazarında işləyirdik. Tural da mənimlə çalışırdı. Sonradan yer haqqını, gömrük rüsumunu qaldırdılar. Biz artıq qazanc əldə edə bilmirdik. 2007-ci ildə Tural məndən ayrılıb, metronun “Neftçilər” stansiyasının yaxınlığında “Çempion” adlı klub açdı, çay evi kimi fəaliyyət göstərirdi. On nəfərə yaxın işçisi vardı. Turalı tez-tez polis idarələrinə çağırıb, hədələyirdilər. Deyirdilər ki, çay evini bağlamasan ora narkotik atıb səni həbs etdirəcəyik". Bu sözləri “Azadlıq”a hazırda xaricdə müalicə alan AXCP Gənclər Komitəsinin üzvü, keçmiş vicdan məhbusu Tural Həsənzadənin atası Natiq Həsənov deyir.
Bıçaqlanma, cərimə və...
Onun sözlərinə görə, oğlu ona edilən təzyiqlərə baxmayaraq çay evini işlədirdi: “2008-ci ilin yay ayları idi. Vergilər Nazirliyi MTN-lə birgə əməliyyat keçirdilər və çay evinin bütün işçilərini həbs etdilər. Işçiləri buraxıb Turalı saxladılar. Bir dəfə də ”Banditizm"in işçiləri evimizə gəldilər və Turalı apardılar. 5 min manat verərək onu oradan çıxarda bildik. Məqsədləri bu idi ki, Tural çay evinin fəaliyyətini dayandırsın, ətrafında olan gənclərin ora yığışmasına mane olmağa çalışırdılar. Bütün bunlara baxmayaraq Tural öz işində idi və fəaliyyətini davam etdirirdi".
Natiq Həsənovun fikrincə, Turalın ətrafında olan insanların gözünü qorxutmaq üçün oğluna Cinayət Məcəlləsinin 213-cü maddəsiylə cinayət işi açaraq 49 min manat cərimələdilər. Əslində, bu qədər cərimə olunacaq bir iş yox idi. Bu pulu ödəməyə imkanımız çatmadığından Cəlilabad rayonunda olan mülkümüzü banka kredit qoyduq. “Texnikabank”ın Cəlilabad filialından 50 min manata qol çəkdik, bizə 44 min manat pul verdilər. Pulun qalanını əlavə edib Nizami Rayon Məhkəməsinə cəriməni ödədik".
Tural Həsənzadə bütün bu olanlardan sonra da çay evini işlədirdi. 2009-cu ilin mart ayının 18-də onu bıçaqlayırlar. Atası olayı belə təsvir edir: “Tanımadığı şəxslər tərəfindən Tural ürəyinə yaxın nahiyədən bıçaqlanır. Səhəri gün polislər xəstəxanaya gəldi. Dedilər ki, guya Tural polislərlə dava edib, üstəlik, bir əməkdaşı da bıçaqlayıb. Cinayət Məcəlləsinin 221.3-cü maddəsiylə cinayət işi qaldırdılar. Yarası ciddi olduğundan zamində saxladılar. Iki dəfə məhkəmə prosesi keçirildi, üçüncüsündə onu həbs etdilər. 2009-cu ilin oktyabrın 13-də Turala 7 il iş verdilər. Apelyasiya Məhkəməsinə 10 min manat ödədik, işi 4 ilə endirdilər və onu kalona köçürtdülər”.
Tural Həsənzadə məhbəsdə olan zaman “Hepatit C” xəstəliyinə yoluxur. Ailəsi pul verərək onu zaminə çıxarır.
O, bir müddət müalicə alandan sonra 2012-ci ilin yanvarında Ismayıllıya dəstək aksiyasında, həmin ilin martında isə “Əsgər ölümlərinə son!” mitinqlərində iştirak etdiyinə görə yenidən həbs olunur və üzərində olan şərti cəza məhbəs həyatı ilə əvəz olunur və sona qədər cəzasını çəkir.
Atası oğlunun işinə görə bankdan götürdüyü krediti bir müddət vaxtı-vaxtında ödəyir.
Natiq Həsənov deyir ki, banka olan ümumi borcun üçdə birini vaxtı-vaxtında ödəmişdilər: “Təxminən 16-17 min manat ödədik. Iki-üç ay krediti verməyə imkanımız çatmadı. Bizə bankdan dedilər ki, nə qədərə gücünüz çatır ödəyin, sizin borc hesabınızdan silinəcək. Mən də imkanım daxilində krediti ödəyirdim. Elə ay olurdu ki, 300-400, elə ayda 700-800 manat kredit ödəyirdim. Bu cür uzun müddət banka kredit ödədik. Beləliklə, bizim ödədiyimiz məbləğ 33 min manata çatdı. Banka təxminən 24 min manat ödəməli idik. Ancaq bir müddət keçəndən sonra bizə dedilər ki, sizin banka 40 min manatdan çox borcunuz qalıb. Halbuki, bu belə deyildi. Sən demə, bizə edilən təklifdən sonra ödədiyimiz 16-17 min manat məbləği hesaba almadılar. Mən onlara ödədiyim məbləğin qəbzlərini göstərdim, xeyri olmadı, istədiklərini etdilər. Biz Bakıda yaşadığımızdan Cəlilabaddakı mülkümüzdə başqa adam yaşayırdı. Bir növ gözətçilik edirdilər. Bir günün içərisində bankın rəhbərliyinin göstərişi ilə hüquq mühafizə orqanlarının əməkdaşları evə gələrək müsadirə etdilər. Mənzildə yaşayan ailəni bayıra atdılar. Evin bütün əşyalarını küçəyə tökdülər və hamısı oğurlandı. Birincisi, mənim mənzilimi müsadirə etməyə ixtiyarları yox idi, ikincisi də, müsadirə olunurdusa, bizə xəbər etməli idilər. Ancaq heç bir bildiriş almamışdıq. Müsadirə olunan gün xəbər tutduq ki, bank işçiləri hüquq mühafizə orqanları əməkdaşları ilə birlikdə evimizə gəlib əşyaları boşaldırlar. Bununla bağlı aidiyyəti qurumlara, o cümlədən məhkəmələrə üz tutduq, ancaq heç bir xeyri olmadı”.
Tural Həsənzadə həbsdən çıxandan sonra da siyasi fəaliyyətini davam etdirir. Və bu da ailəsinə baha başa gəlir. Hazırda o, xaricdə müalicəsini davam etdirir, ata mülkləri qanunsuz olaraq əllərindən alınıb, qardaşı Toğrul Həsənlini, Turalın özünü bacısı uşaqlarıyla təhdid edirlər