Bu gün ADP İdarə Heyətinin ölkə həyatının ictimai-siyasi gündəminə dair növbəti toplantısı keçirilib.

 

Toplantı iştirakçıları ilk növbədə Müdafiə Nazirliyində baş verən maliyyə maxinasiyalarına bir daha münasibət bildirib. Partiya yetkililəri orduda baş verən korrupsiya faktlarının, “Tərtər cinayətləri” ilə bağlı aparılan istintaqın vaxtının uzadılması, sabiq Baş Qərargah rəisi N.Sadıqovun bu maxinasiya və korrupsiyada adının hallanmasına baxmayaraq haqqında ciddi tədbir görülməməsini, ölkədə fəaliyyət göstərən “beşinci kalon”un bağlı olduğu Rusiya faktorundan irəli gəldiyini qeyd edib, hakimiyyəti ordumuzda baş verən xoşagəlməz, dövlət üçün utanc gətirən hallara son qoymağa çağırıb və bu cinayətkar şəbəkənin aradan qaldırılması üçün təcili tədbirlər görməyə çağırıb. Bu faktların aradan qaldırılması yollarına diqqət çəkən partiya rəsmiləri ordumuzun “Şuşa bəyannamə”sindən irəli gələn tələblərə uyğunlaşdırılması üçün qardaş Türkiyə orduları ilə vahid komandalıq halına gətirilməsini zəruri hesab edib.

 

İdarə Heyəti ABŞ-la Azərbaycan arasında diplomatik əlaqələrin yaranmasının 30 illiyi ilə bağlı məsələyə münasibət bildirib və bu zaman kəsiyində ölkəmizdə demokratiya və insan haqları məsələsinin həllini tapmamasını məhz ABŞ-ın müstəqillik yolu tutan ölkələrə yetərincə dəstək verməməsi, iqtisadi maraqların demokratiyadan önə çəkilməsi, bir sıra məsələlərdə ikili standartlara yol verməsi kimi faktlarla, həmçinin Rusiyanın regionda apardığı imperiya siyasəti ilə bağlı olduğunu diqqətə çatdırıb və hakimiyyəti xarici siyasətimizin elan olunmuş prioritetlərinə uyğun olaraq Aavroatlantik məkana inteqrasiya yolunda ardıcıl addımlar atmağa çağırıb.

 

İdarə Heyəti Ukrayna ilə Rusiya arasında yaşanan gərginliklərə münasibət bildirib və bu gərginliklərin müharibə fazasına keçməməsi üçün dünya dövlətlərinin birgə səyinin, işğalçı Rusiyaya qarşı daha geniş sanksiyalar tətbiq edilməsinin, dünyada sülhün və təhlükəsizliyin qorunması üçün daha təsirli siyasi, diplomatik vasitələrlə çıxış etməsinin vacibliyini diqqətə çatdırıb və hakimiyyəti bu məsələdə Rusiyanın məkrli siyasətindən ehtiyatlı tədbirlər görməklə Ukraynanın haqq davasında onun yanında olmağa çağırıb.

 

İdarə Heyəti bir neçə TİR sürücüsünün onlara qarşı ədalətsiz mövqeyə, süründürməçiliyə yol verildiyinə görə H.Əliyev prospektinə çıxaraq yolu bağlamasını ölkədə olan monopoliya, rüşvətxorluq, korrupsiya faktı ilə bağlı olduğunu diqqətə çatdırıb və hüquq mühafizə orqanlarını bu işin obyektiv aparılmasına, sürücülərə qarşı göstərilən zorakılıqları təşkil edən qüvvələri cəzalandırmağa, həbs olunan şəxsləri azad etməyə çağırıb.

 

İdarə Heyəti Kəlbəcərdə hərəkət edən hərbi kolonun erməniləır tərəfindən qarşısının alınmasını rus sülhməramlıların üzərinə düşən vəzifənin yerinə yetirməməsi, separatçı qüvvələrə bu və ya digər formada şərait yaratması, 10 noyabr üçtərəfli sazişin tələblərinin pozulması kimi dəyərləndirib və hakimiyyəti rus sülhməramlılarını ərazimizdən çıxarılması istiqamətində addımlar atmaqla, yurisdiksiyamıza daxil olan həmin ərazilərdə antiterror əməliyyatları keçirməyə çağırıb.

 

İdarə Heyəti VİP sədri Ə.Əliyevin, “Tərtər cinayətləri” üzrə araşdırıcı İ.Aslanlının azad edilməsi üçün hakimiyyətə çağırış edib və ölkədə siyasi mənsubiyyətinə və azad fikrə görə insanların haqsız yerə həbs edilməsi ənənəsinə son qoymağın vaxtı çatdığını bildirib.

 

İdarə Heyəti son vaxtlar bir sıra məmurlar barədə törətdiyi cinayətlər barədə dövrü mətbuatda məlumatlar getməsinə baxmayaraq onlar haqqında ciddi tədbirlər görülməməsini yolverilməz hesab edib və Respublika Prokurorluğunu həmin şəxslər barədə tədbirlər görməyə səsləyib.

 

İdarə Heyəti üç Rusiya şirkətinin Füzuli hava limanına həftə ərzində bir neçə reys etməsi məsələsini müzakirə edib və hakimiyyəti bu məsələyə aydınlıq gətirməyə, gətirilən yüklər üzərində nəzarəti təmin etməyə çağırıb.