Bunu Moderator.az-a açıqlamasında bu gün doğum günü olan Vətən müharibəsi şəhidimiz kapitan Rəşad Abdullayevin həyat yoldaşı Gülnar xanım deyib. O, şəhid həyat yoldaşıyla bağlı xatirələrini bizimlə bölüşüb:

“2020-ci ilin bu günü Rəşad təlimdə idi, saat 12-ni keçən kimi təbrik elədim, sağ-salamat gəl sənə hədiyyəm var dedim, tort bişirəcəm sənə, evdə təbrik edəcəm. Ona hədiyyə almağı özümə borc bilmişəm həmişə. Sənə hədiyyəm var deyəndə səbirsizliklə “nə almısan?” dedi. Dedim ki, sürprizdir, dözmürdü, özü görüntülü zəng vururdu ki, hədiyyəni göstərim, amma göstərmədim və evə gələndə dedim. 

 

Mən Rəşada geyim almışdım, gəldikdə ilk qapıdan girən kimi “bəs mənim hədiyyəm” deyəndə verdim. Həm çox sevindi, əyninə geyindi, özünə güzgüdə baxdı, bir az fikrə gedib dedi ki, “mənə niyə payız geyimi almısan, bəlkə mən payıza çıxmadım”. O nə sözdü dedim,  “fikrimi yayındırmaq üçün zarafat edirəm dedi. Həmişə Rəşadın doğum günündə tortu özüm hazırlayardım, onu sevə-sevə edirdim.  

Rəşad sentiyabrın 16-da təlimdən qayıtdı. Əmisi xəstə idi, yatırdı. Rəşad həddən artıq əmisinə bağlı idi, son nəfəsinə çatmaq istəyirdi. Təlimdən evə gələn kimi tort da heç gözünə görsənmədi, biz tez yola çıxdıq, heç 32 yaşını evdə qeyd edə bilmədik. İki həftə sonra Rəşadın ömürlük yaşını qeyd etmək şansımızı itirdik. Hər ad günündə onu təbrikdə belə bir söz deyirdim ki, sağ olsun, qaynanam sənin kimi oğul dünyaya gətirib, bizi bir edib. Mən Rəşadı sentyabr ayı tapmışdım, elə bu ayda da onu itirdim. Ayın 8-i bizim toy günümüz idi, 6 gün sonra isə doğum günü. Əvvəl sentyabrın gəlişini çox sevirdim, axı Rəşadı həmin ay tapmışdım, amma indi bu aya çox nifrətim var.  Çünki bu ay Rəşadı məndən aldı. Hammız öləcəyik, amma Rəşad kimi seçilməyəcəyik. Rəşad da Allahın seçdiyidi, həyatını fəxrlə yaşayıb fəxrlə dəyişən insandı. Rəşad mənim üçün fəxrdir, Rəşadın adı altında xanımı olaraq mənim adımın çəkilməsi. Əvvəl Rəşad xanımı ilə gəlir deyirdilər, indi isə şəhid Rəşadın xanımı Gülnar gəlir deyirlər. Düzdür, çox çətindir, Rəşadı bu gün uşaqları təbrik eləmək istəsə də, edə bilmir. Əminəm ki, Rəşad cismən olmasa da, ruhən bizimlədir və mən onun ruhunu salamlayıram. Dəyişməyən doğum günün mübarək olsun, Cənabım”.