“Rusiya siyasətinin qoca təlxəyi  Vladimir Jirinovski növbəti dəfə Azərbaycanın ünvanına sərsəm fikirlər səsləndirib. "Komsomolskaya pravda" radiosunun “İtoqi s Jirinovskim” proqramının buraxılışında  Rusiya Federasiyasının Rusiya imperiyasının və Sovet İttifaqının bütün ərazisinə qayıtmalı olduğunu bəyan edən Jirinovski, 44 günlük Vətən müharibəsindəki tarixi qələbəmizə, 30 ilə yaxın müddətdə erməni işğalı altında olan torpaqlarımızın   Azərbaycan Ordusu və Ali Baş Komandan, Azərbaycan Prezidenti İlham Əliyevin iradəsi sayəsində azad edilməsinə də kölgə salmağa çalışıb. Qoca təlxək o dərəcədə həyəsızlaşıb və həddini aşıb ki, Azərbaycanın dövlət başçısı, dövlətimiz və xalqımız haqqında məsuliyyətsiz, qərəzli və təhqiramiz, qəbuledilməz fikirlər səsləndirib. Təbiiki, Jirinovskinin bu həyəəasızlığı və siyasi tərbiyəsizliyi hər birimizdə təəssüf hissi ilə bərabər, həm də hiddət hissi yaratdı.  Əgər nəzərə alsaq ki, öz vətənində belə onu heç kim ciddi siyasətçi kimi qəbul etmir və siyasi təlxək adlandırılar,  ona bir məsəllə cavab vermək olar: it hürər, karvan keçər. 

 

Amma indiki məqamda Jirinovskinin fikirlərinə reaksiya bildirməmək də mümkün deyil. Bu dəfə bütün qırmızı xətləri keçən, həm də siyasi əxlaqsızlıq edən Jirinoviski və onun kimilər bilməlidirlər ki, Azərbaycan Prezidenti ilə heç kim bu tonda danışa bilməz və ona dil uzada bilməz. Azərbaycanın Prezidenti  Azərbaycanın özü deməkdir. Ona uzanan  dillər Azərbaycan xalqı tərəfindən qətiyyətlə kəsiləcək”. 

 

Bunu Moderator.az -a Milli Məclisin deputatı Tamam Cəfərova demişdir. 

 

V.Jirinovskinin titullarını bilərəkdən qeyd etmədiyini bildirən millət vəkili deyib ki, bu titullar onun hərəkətlərinə, davranışına və xüsusilə sözüğedən müsahibədə nümayiş etdirdiyi siyasi əxlaqsızlığa uyğun gəlmir. İctimai-siyasi fəaliyyətlə məşğul olan hər bir şəxs dövlətlərarası münasibətlərdə danışarkən ehtiyatlı və diqqətli olmağa məcburdur. 75 yaşlı Jirinovski nə etməli olduğunu, üzərinə düşən siyasi, mənəvi məsuliyyəti fərq etməyə əsaslar verən yaşa və bir özkeçmişə malik olmasına baxmayaraq, hələ də ağıllanmayıb.  Təkçə öz ölkəsində deyil, bütün dünyada Vladimir Jirinovskinin ictimai rəydə uzun illər ərzində formalaşmış məlum bir imici var. Yaşı çox olsa da, Vladimir Jirinovski nəinki özünü ciddi siyasət kimi özünü təsdiq edə bilmədi, heç real müxalifət də ola bilmədi. Saxta müxalifət rolunu oynayan, söyüşkən, jarqon ifadələrdən öz çıxışlarında davamlı istifadə edən Jirinovski normal polemika aparmaq qabiliyyətinə malik deyil. Onun təhqir etmədiyi, söymədiyi siyasətçi, ictimai xadim və veriliş aparıcısı qalmayıb. Onun bu cür davranışları onu göstərir ki, onun çox ciddi psixoloji problemləri var və belə bir insanın Rusiyanın siyasi səhnəsində olması Rusiyanın nüfuzuna çox böyük xələl yetirir.

 

 Millət vəkili bildirib ki, Rusiya ictimaiyyəti də Jirinovskinin əslində ağıldan kəm birisi kimi qəbul edir, ona gülür və ələ salır. O rusiya siyasətində ancaq siyasi təlxək səviyyəsində qalıb, çünki  ciddi siysətçi olmadığı üçün ancaq siyasi təlxək rolunda diqqəti cəlb edə və gündəmdə qala bilib. Onun bütün fəaliyyəti ilk növbədə Rusiyanın imperalist maraqlarını daşıdığı ideyanı təbliğ etməyə, Azərbaycan da daxil olmaqla bütün Cənubi Qafqazı öz təsir zonasında saxlamağa yönəlib. Əslində, Jirinovski və onun kimilər terrorçu missiyasını həyata keçirirlər. Onu da nəzərə almaq lazımdır ki, Jirinovski kimi ağıldan kəm insanlar öz davranışları ilə təkcə hədəf seçdiyi ölkələr üçün təhlükə yaratmır, eyni zamanda Rusiyanın milli maraqların ziddinə fəaliyyət göstərirlər. 

 

Lakin bu gün regionda cərəyan edən proseslərin təhlili göstərir ki, Azərbaycan və Rusiyanın bir çox istiqamətlərdə maraqları üst-üstə düşür. İki ölkənin münasibətlərinin strateji tərəfdaşlıq kimi səciyyələndirilməsi də məhz bunun nəticəsidir. Rusiya və Azərbaycan liderləri arasında çox xoş və dostluq münasibətləri var. Azərbaycan uzun illərdir, müstəqil siyasət yürüdür, regionda qonşu ölkələrlə dostluq münasibətləri qurub. Ordumuz 44 günlük Vətən müharibəsində öz ərazi bütövlüyünü bərpa edib və Rusiyanın sülhməramlı kontingenti də torpaqlarımızda Azərbaycanın razılığı ilə müvəqqəti yerləşdirilib.  Bu cür qeyri-obyektiv, qərəzli yanaşmalarının Azərbaycan-Rusiya münasibətlərinə xələl gətirə bilməyəcəyini vurğulayan millət vəkili qeyd edib ki, Rusiya-Azərbaycan münasibətləri yüksələn xətt üzrə inkişaf edir və bu dostluq münasibətlərini kimsə poza bilməz.

Deputat bildirib ki, Jirinovski kimilər, onları “yemləyən” Erməni lobbisi  və ermənilərin havadarları Azərbaycanın hazırki yüksək mövqeyni həzm edə bilmirlər. Həzm edə bilmirlər ki, necə ola bilər ki, elə də böyük olmayan Azərbaycan dövləti cənab Prezident İlham Əliyevin rəhbərliyi altında 44 günlük Vətən müharibəsində belə tarixi zəfərə imza atdı və artıq azad edilmiş torpaqlarımızda sürətlə quruculuq işləri gedir.  Azərbaycan təkçə öz torpaqlarını azad etmədi, regionda yeni geosiyasi reallıq yaratdı. Azərbaycan və Türkiyə arasında Şuşa Bəyannaməsinin, onun ardıca Azərbaycan, Türkiyə və Pakistan Parlamentləri arasında Bakı Bəyannaməsinin imzalanması düşvənlərimizi çox narahat edir və qoca  təlxəyin səmrəmləməsinin də məhz Bakı Bəyannaməsinin imzalanması vaxtında baş verməsi təsadüfi deyildir. 

Tamam Cəfərova həmçinin onu da qeyd etdi ki, heç kim bizimlə təhdid dili ilə danışa bilməz.  Azərbaycan regionun ən güclü dövləti və diqtə edən tərəfidir. Azərbaycan xalqı 44 günlük müharibədə öz kimliyini ortaya qoydu. Azərbaycan Prezidenti cənab İlham Əliyev artıq tarix yazmış bir şəxsiyyətdir və arxasında birmənalı şəkildə xalqı dayanır. Əldə etdiyimiz tarixi Qarabağ Zəfəri Azərbaycan xalqını öz Müzəffər sərkərdəsi və qalib Lideri İlham Əliyev ətrafında elə səfərbər edib ki, bu birliyi və həmrəyliyi heç bir qüvvə poza bilməz. Ortada ölkə Prezidentinin siyasi iradəsi, Azərbaycan xalqının monolit birliyi var.

“Jirinovski kimi klounların verdiyi sərsəm açıqlamaların heç bir siyasi, mənəvi və hüquqi yükü yoxdur. Ən başlıcası, qarşı tərəfin nəticə çıxartmayacağı təqdirdə cənab Prezidentin artıq bizim gücümüzün və iradəmizin simvoluna çevrilmiş "dəmir yumruğu" var. Bunu Jirinovski və onun kimilər heç bir zaman yadından çıxartmasınlar”. Millət vəkili Tamam Cəfərova belə deyib.