Dünəndən Azərbaycanda Ramazan ayı başlayıb. Ramazan ayı müsəlman dünyasında ən müqəddəs ay hesab olunur. Bu ayda insanlar oruc tutur, namaz qılır, savab işlər görməyə çalışırlar.

 

Maraqlıdır, tanınmış insanlar arasında bu ayda oruc tutan, savab işlər görən varmı?

 

Moderator.az mövzu ilə bağlı sənətçilərimizin fikirlərini soruşub. 

 

Xalq artisti Alim Qasımov: “15 ilə yaxındır ki, oruc tuturam. Ramazan ayını hər il səbirsizliklə gözləyirəm. Bu ay insanın özü ilə tanış olma ayıdır, paklaşırıq, hər şeyimizi bölüşürük. Ramazan paylaşdıqca gözəldir. Ən gözəl süfrə də Ramazan ayında açılandır, çünki o Allahın adına açılan süfrədir, Allah süfrəsidir” deyə xalq artisti bildirib.

Xalq artisti Firəngiz Mütəllimova: “Öncə bütün Azərbaycan xalqını Ramazan ayı münasibəti ilə ürəkdən təbrik edirəm. Allah bütün oruc tutan insanların orucunu qəbul etsin. Kim nə niyyətlə tutursa Allah savaba yazsın. Mən 2013-cü ildən bu yana, yəni beyin əməliyyatı olunadan oruc tuta bilmirəm. Çünki gündə neçə dənə dərman qəbul edirəm. Bu dərmanları saatla qəbul edirəm, ona görə də heç cür vaxtını dəyişə bilmərəm. Çalışıram ki, başqa cür o borcdan çıxım. Özüm oruc tutmasam da, iftar süfrəsi verəcəyəm. Anamın, atamın adına quran oxutduracağam” deyə aktrisa bildirib.

Xalq artisti Həmidə Ömərova: “Hər il olduğu kimi bu il də oruc tutmuşam. Hazırda çəkilişdən qayıdıram. Bu gün orucluğun ilk günü idi, “Ata ocağı” serialının kollektivindən də 10 nəfər insan oruc tutmuşdu. İftar süfrəsini birgə açıb, dualarımı etdik. Təxminən 15-18 il olar ki, oruc tuturam, amma o dönəmlərdə hər ayı tuta bilmirdim. Amma 10 il olar ki, bütün ayı tuturam” deyə xalq artisti bildirib.

Xalq artisti Gülyaz Məmmədova: “Oruc tutmağa dünən başladım, axşam tərəfi məni öskürək tutdu. 2 dəfə dedim ki, orucam, dözməyib dərman içirtdilər mənə. Dedim ki, deyəsən axı orucam? Dedilər ki, eybi yox, bilməmisən, yenidən tut. Daha sonra Gülyanaq bizə gəldi, dedi ki, ay Gülü, nə qəşəng tortdur, içində nə var bunun? Tortu götürüb yedim və dedim ki, banandı da. Beləliklə iftarın vaxtına 1 saat qalmış orucum pozuldu. Dedim ki, ay qızlar, deyəsən axı mən oruc idim (gülür). Səhər yenidən davam edəcəm” deyə müğənni bildirib.

Müğənni Roza Zərgərli: “Allah oruc tutan hər bir kəsə güc-qüvvət versin. Təəssüflər olsun ki, səhhətimdəki problemə görə heç bir il mənə oruc tutmaq qismət olmur. Bu il də zatən qismət olmadı. İnşallah ki, iləliləyən illərdə tutmaq nəsib olsun. Hər il olduğu kimi bu il də iftar süfrəsi açıb, oruc tutan insanları dəvət edəcəm” deyə Roza Zərgərli deyib.

Əməkdar artist Sevinc Sarıyeva: “Özümü tanıyandan oruc tuturam. Bu artıq məndə ən-ənə halını alıb. Təbii ki, bu il də orucluyam. Allah hamının orucunu, dualarını, niyyətini qəbul etsin, bu bəlaları tezliklə başımızın üstündə aparsın. O gün olsun ki, işğaldan azad etdiyimiz torpaqlarda, ana yurdum Ağdamda oruc tutub, Ramazan süfrəsi açaq. O günlərə də az qalıb” deyə xanəndə bildirib.