Azərbaycan xalqının şanlı tarixində bir çox qələbələr var. Fərqli tarixi dövrlərdə biz özümüzü hər zaman qürurlu, vətənpərvər bir xalq kimi tanıtmışıq. Müasir dünyamızda hər bir sahədə köklü dəyişikliklər olduğu kimi hərb sahəsində də bu cür dəyişikliklər baş verir.

 

Müharibə qanunlarının, metodlarının dəyişdiyi bir dövrdə yaşayırıq. Bir Azərbaycanlı kimi həyatım boyu ən sevindiyim məqamda məhz yenidən bütün dünyaya öz mübariz ruhumuzu və qorxmaz iradəmizi müasir muharibə qanunları çərçivəsində göstərməyimiz oldu. İldırım sürətli qələbənin, qısa müddətdə mənfur düşmən tapdağında olan ərazilərimizin azad olunmasının əsas səbəbkarı isə müasir dünyamızın siyasi arenasında özünü yüksək liderlik keyfiyyəti ilə tanıtmış dahi şəxsiyyət Cənab Prezident İlham Əliyevdir.

 

Cənab Prezident İlham Əliyevin uzun illərdir yürütdüyü uğurlu xarici siyasət nəticəsində Azərbaycan regionun aparıcı dövlətinə çevrilmiş, beynəlxalq arenada irihəcmli layihələrin əsas tərəfdaşlarından olmuş və bütün münaqişələrin beynəlxalq hüquq prinsipinə bağlı həllinə tərəfdar olmuşdur. Mənfur düşmənin 30 ilə yaxın müddətdə öz kirli əməllərindən əl çəkməməsi nəticəsində bütün region sabitliyi təhdid altında olmuşdur. 44 gün ərzində əldə etdiyimiz möhtəşəm qələbə həm tarixi ədalətin bərpasına gətirib çıxarmış və həm də terrorçu mahiyyətli addımlar ilə beynəlxalq hüquq normalarını pozan düşmən layiqli cavabını almışdır. Azərbaycanın dinc əhalisinə qarşı hərbi cinayətlər törədmiş, 1 milyon insanı öz yurdundan didərgin salmış qatil Ermənistan rejimi həm diplomatik arenada, həm də hərb meydanında öz liderliyi ilə seçilən Cənab Ali Baş Komandanın rəhbərlik etdiyi ordumuz qarşısında aciz qalmışdır.

 

Öz əməllərindən əl çəkməyən düşmən 27 Sentyabr 2020-ci il tarixində yenidən təxribata əl atmış və ordumuzun əks-hücum əməliyyatı nəticəsində sülhə məcbur edilmişdir. Azərbaycanın daxilindəki birlik, rəhbərinə olan inam, ordumuzun yüksək hazırlığı, dövlət başçısının bütün sahələrdə yüksək idarəetmə keyfiyyətinə sahib olması faşist-terrorçu mahiyyətli cinayətkar rejimin açıq şəkildə məğlubiyyəti ilə yekunlaşmışdır.

 

Bu tarixi qələbə güclü Azərbaycanın güclü lideri Müzəffər Ali Baş Komandanın rəhbərliyi ilə hər qarış torpağımız üçün şücaətlə vuruşmuş igid əsgərlərimiz, arxa cəbhədə ürəyi vətən eşqi ilə döyünərək ordumuza dəstəyini nümayiş etdirən xalqımız, informasiya muharibəsində düşmən provakasiyalarına qarşı mübarizə aparmış media mənsublarımız, qələbəmiz üçün dualarını əsirgəməyən analarımız, qısacası bütün Azərbaycan xalqının unudulmaz zəfəri oldu. Bütün Azərbaycan bir yumruq kimi birləşərək öz haqq mübarizəsində qalib gəldi.

 

Bu mübarizə müddətində hər kəs dayanmadan həm xarici media mənsublarına verdiyi müsahibələrində tarixi ədalət və beynəlxalq hüquq normalarını bütün dünya ictimaiyyətinə çatdıran, həm diplomatik arenada beynəlxalq təşkilatlara gerçəkləri ifadə edən, həm də hərb meydanında ordumuzun möhtəşəm qələbəsinə rəhbərlik edən Cənab Ali Baş Komandanın ustalığına, vətən sevgisinə, xalqı ilə birliyinə şahid oldu. Hər bir Azərbaycanlı Müzəffər Ali Baş Komandan və yenilməz ordumuz ilə fəxr edir!

 

Yaşasın Azərbaycan xalqı!

 

Yaşasın Cənab Ali Baş Komandan!

 

Qarabağ Azərbaycandır!