“Azadlıq” qəzetinin köşə yazarı Elnur Astanbəyli Facebookda yazdığı statusla AXCP rəhbərliyini ittiham edib. Moderator.az-ın məlumatına görə hər şey AXCP mətbuat xidmətinin rəhbəri, “Azadlıq” qəzetinin əməkdaşı Natiq Ədilovun Facebookda yazdığı statusla başlayıb. Natiq Ədilov Seçki Monitorinq Mərkəzinin rəhbəri Anar Məmmədlini prezident seçkisi ilə bağlı doğru olmayan hesabat yazmaqda günahlandırıb. Bir çox çəbhəçilər də Natiq Adliova dəstək veriblər. “Azadlıq” qəzetinin köşə yazarı Elnur Astanbəyli də məhz buna görə AXCP əleyhinə status yazıb: “İndicə Anar Məmmədlinin statusundan öyrəndim ki, SMDT-nin hansisa hesabatı narazılıqla qarşılanıb, ən çox da AXCP-dən olan dostlar qəzəbləniblər, tənqiddən təhqirədək heç nəyi əsirgəməyiblər. Mən söhbətə vaqif deyiləm, kimin hansı həddəcən haqlı, yaxud haqsız olduğunu bilmirəm. Amma önəmli bir funksionerlərinin - sədr müavinlərinin seçkiyə iki-üç gün qala ittihamedici bəyanatla istefa verməsinə (Asəf Quliyev nəzərdə tutulur-red.) susqun qalıb, nə həmin, nə sonrakı günlər bunu başqalarına qarşı qurduqları mühakimənin mində biri qədər müzakirə etməyən bir partiyanın üzvlərinin kimliyindən asılı olmayaraq heç kimə qarşı belə bir mühakimə qurmağa mənəvi haqlarının çatmadığına inanıram. Öz sədr müavininizə qura bilmədiyiniz mühakiməni başqasına da qurmayın. Ədalətli və vicdanlı olan budur”.

Seçki Monitorinq Mərkəzinin rəhbəri Anar Məmmədli isə cəhbəçilərin yazdıqlarına belə münasibət bildirib: “Dünən SMDT-nin adından yayılmış bəyanat və bu materialda gedən bu cümlə - “ölkə üzrə seçki məntəqələrinin 30-45 faizində pozuntular qeydə alınıb”- AXCP-nin bəzi üzvlərinin etirazına səbəb olub və facebookda müzakirəyə çıxarıblar. Xüsusən də AXCP rəsmiləri Natiq Adilov və Əbülfəz Qurbanlı kobud şəkildə mənim və SMDT-nin ünvanına müxtəlif təhqirlər işlədiblər. Bununla bağlı mən və digər SMDT təmsilçiləri geniş izahat verdik. Əvvəla, bildirdik ki, bu ölkə üzrə pozuntuların ümumi cəmi deyil, ayrı-ayrı pozuntu halları üzrə spesifik göstəricilərdir. İkincisi, bizim müşahidə metodlogiyamız kiməsə aydın deyilsə və ya bunu bəyənmirsə, bu, SMDT və mənim təhqir olunmağım üçün əsas ola bilməz. Üçüncüsü isə meotodlogiyanı istənilən şəxsə oturub geniş təqdim edərik, izah edə bilərik. Dünən facebookda verdiyim izahatımızı bir daha xatırladıram. 9 oktyabr 2013-cü il prezident seçkisi günü Statistikaya Əsaslanmış Müşahidə (SƏM) metodologiyası əsasında seçki məntəqələrinin təşkili, səsvermə və səslərin sayılması prosesinin monitorinqini həyata keçirmişik. Məlumat üçün bildirim ki, SƏM metodu seçki məntəqələrinin milli təmsilçilik əsas götürülməklə təsadüfi seçimini və seçki günü prosesin hüquqi keyfiyyətini dəqiq, tərəfsiz və operativ öyrənməyi hədəf götürür. Bu metodologiya üzrə SMDT tərəfindən ölkədəki 125 seçki dairəsi üzrə təsadüfi seçim əsasında 769 (15 faiz) seçki məntəqəsi müəyyən edilərək seçki günü monitorinqə cəlb edilib. Seçkidən sonrakı bütün rəylərimizdə və Press Relizlərdə bildirmişik ki, qeydə aldığımız pozuntuları seçki prosesinin hüquqi keyfiyyətinə və nəticələrinə ciddi təsir edən pozuntular olmaqla seçkinin qanuniliyini və legitimliyini şübhə altına alan pozuntulardır. Ümumiyyətlə, seçki məntqələrinin 91 faizində müxtəlif növ qanun pozuntuları qeydə almışıq. Ancaq pozuntuları qruplaşdıranda faiz göstəricləri dəyişir. Tutaq ki, bəzi pozuntu hallarını seçki məntəqələrinin 17 faizində qeydə almışqısa, bəzilərində 46 faiz bu cür hallar baş verib. Bu barədə cədvəli əlavə edirəm. Fəqət, nə mənim, nə də digər yoldaşlarımın izahatına adekvat və konstriuktiv reaksiyanın şahidi olduq. Son bir sutka ərzində təhqirlərə görə üzrxahlıq edən olmyıb. Bütün bunları AXCP rəsmilərinin ictimai qaydada özümə və SMDT-yə qarşı hörmətsizliyi kimi qəbul edərək, facebookda ictimai qaydada üzrxahlıq tələb edirəm. Əks təqdirdə bu məsələyə aydınlıq gətirlməsi üçün AXCP-nin rəhbərliyinə rəsmi qaydada müraciət edəcəm”.