“Yaxşı ki, koronavirus yataqxanada daldalanan Qədimalıya yox, villada kef edən Cona, Edikə yoluxur…”

Ramallahda fələstinli tələbələr Almaniya səfirinə hücum edib

Tbilisi polisi "Rusiya qanununa" qarşı etirazları amansızcasına yatırdı... - FOTO/VİDEO

“Balaban ermənilərə aid deyil, amma düdük adı ilə bu alətin istehsalına başlayıblar, bizdə isə fabrik yoxdur” - FOTO + ÖZƏL

Ukrayna səmasında qeyri-adi mavi parıltı göründü...-FOTO

"Koronavorusa qarşı bu peyvənd ciddi travmalara və hətta ölümə səbəb olan tromblar yaradır..."

Köçəryanın oğlunun köməkçisi Rusiyanın adamı olan keşişə görə jurnalisti döydü..-VİDEO

“Dronlar Rusiyanı dağıda bilməz..."

Depardye Parisdə saxlanıldı - Dindirilmədən sonra həbs oluna bilər

“Yaxşı ki, koronavirus yataqxanada daldalanan Qədimalıya yox, villada kef edən Cona, Edikə yoluxur…”

Oxunub: 5901

18 Jun 2020 | 11:53

“Yaxşı ki, koronavirus yataqxanada daldalanan Qədimalıya yox, villada kef edən Cona, Edikə yoluxur…”

...Qarabağdakı Lenin adına kolxozdan qaçqın düşmüş Qədimalı kişi 30 ilə yaxındır ki, ömrünün qalan hissəsini heç kəsə pay vermədən yataqxanada keçirir. Çörəkpulunu zorla çıxardaraq ailəsini bir təhər dolandırır. Ancaq buna rəğmən o, hər şeyə yumor hissi ilə yanaşmağı bacardığından daim nikbinlik ruhunu qoruyub saxlayır. Kiminsə başına bir faciə gələndə, kimsə, hansısa bir qohumu xəstələnəndə, hətta maşın vurub qolunu-qıçını sındıranda mərhum eks-prezident Əbülfəz Elçibəyin məşhur “təbii haldır” ifadəsini xatırladaraq gününü keçirir. 1988 -1990-cı illərdə Vəzirovun çıxışlarına baxıb gülürdü, indi isə hörmətli Elmar Məmmədyarovun görüş və səlist nitqlərindən ilham alaraq deyir ki, Qarabağ qayıtmasa da, Nyu-Yorkda, Londonda, Virciniyada malikanə alanlar, Sürix bankında hesab açanlar mütləq qaytaracaqlar yediklərini...

Tikintidə fəhlə işlədiyindən tez-tez əl-ayağı, baş-gözü yaralanır. Belə olanda da yenə Elçibəyin, Pənah Hüseynin mitinqlərdə başlarıın yarılmasını yadına salıb deyir ki, mən onlardan artıq deyiləm ki... Kimsə nefti-qazı bol ölkədəki çətin yaşayışından şikayətlənəndə eks-spiker Rəsul Quliyevin hələ 1990-cı ilin ortalarında ölkənin ikinci şəxsi olarkən söylədiyi “neftdən-qazdan gözünüzü çəkin” uzaqgörən çağırışını xatırladır...

Qədimalı kişinin son günlər bütün ölkələrin super-qəhrəmanına çevrilmiş “koronavirus pandemiyası” deyilən hadisə barədə də özünəməxsus fikirləri var. Onlardan da bəzilərini nəzərinizə çatdırırıq ki, sabah-sabah kefiniz açılsın...

Bu xəstəliyin yayılması haqqında yeni hay-küylü xəbərlər çıxanda və İranda vitse-prezidenti, səhiyyə nazirini, generalları, deputatları, paytaxt merlərini, az keçəndən sonra Britaniyanın Baş nazirini yoluxduranda, bəzi vəzifəliləri hətta öldürəndə, Kraliça Yelizavetanın sarayına belə yol tapanda baməzə dostumuz dedi ki, adından da göründüyü kimi, bu, kor virusdu, varlı ilə kasıbı, vəzifəli ilə vəzifəsizi, küçələrdə küncdə-bucaqda daldalanan oliqarxı dilənçidən, “bomj”dan seçə bilmir. Amma varlıların, vəzifəlilərin üzlərinin, qızıllarının, brilyantlarının, maşınlarının parıltısını sezə bildiyindən qara camaatı qoyub daha çox onlara tərəf gedir...

Hər səhər-axşam xəbərlərdə müxtəlif ölkələrdə koronavirusa yoluxmuş xəstələrin sayını, statistikasını eşidəndə heç nəyə təəccüblənmədən deyir ki, sovet vaxtı Moskvaya pambıq planı verirdik, indi isə o ÜST-dü-nədi, ona “korona” planı veririk...

Amma Qədimalı deyir ki, mən hökumətimizin, operativ qərargahın qərar və qaydalarına canla-başla riayət edirəm. Evim olmasa da, karantin günləri “evdə qalıb” bayıra çıxmıram, pulum olmadığı üçün əlim pula dəymir, elə günlərlə evə pul gətimədiyim üçün arvad-uşaq da mənimlə sosial məsafə saxlayıb yaxın da durmurlar... Hər gün də evdən çıxanda söz verirəm ki, sizə filan yeməyi, filan meyvəni, filan şirniyyatı alacam. Amma bilirəm ki, sözümlə əməlim düz gəlməyəcək, ona görə camaatın əksəriyyəti kimi tez maskamı keçirirəm üzümə. Onsuz da nə arvad-uşağın, nə yerli dost-tanışın üzünə çıxmağa üzüm yoxdur.... Ona görə ki, 30 ildi torpağım ermənidə qalıb, nə onu qaytara bilirəm, nə özümə bir koma ala bilirəm, nə də evə adam kimi bazarlıq edə bilirəm... Elə bu səbəbdən maskaya girmək yaxşıdır ki, heç kəs mürdəşir yumuş əsl sifətimi görməsin... Yalançı, ikiüzlü, gopçu, sözü ilə əməli düz gəlməyən adamın üzünü heç görməsələr, yaxşıdır... Nətər ki, son dövrlərdə maskaya girib üzdə dövlətçilikdən, Vətəndən, xalqdan, Qarabağdan danışan, amma əslində ölkəni, xalqı, nefti-qazı, qızılı-gümüşü, pambığı-üzümü basıb talayan nazirləri, icra başçılarının mürdəşir yumuş əsl üzünü görməyə heç kəsin gözü yoxdur...

Bununla belə, Qədimalı naşükür deyil. Bayaq dediyim kimi, koronavirusun oliqarxla dilənçini seçə bilmədiyini desə də, şükür edir ki, elə yaxşı ki, belədir. Yəni şükür ki, bu koronavirus antisanitar şəraitli yataqxanada, çadırda, vaqonda, üfunətli, kanalizasiya xətti olmayan yarımuçuq binalarda daldalanıb ömür çürüdən günlərlə ət, meyvə yemədiyindən immuniteti ölüb sap-sarı saralan Qarabağ köçkünü Qədimalıya, Suriya qaçqını Əbdülməlikə deyil, villada, sarayda kef edən, qar kimi ağappaq yataqlarda, qu tükündən yastıqlarda yatan, ceyran, kəklik əti yeyən, quş südü içən, qara kürü yeyən, itinə qoyun ciyəri, meymununa banan yedirdən Consona, Edikə, İvana yoluxur, yoxsa müsəlmanların, azərbaycanlıların çoxu dünyadan köçüb qurtarardı... Hətta buna görə “COVİD-19” həzrətlərinə bir minnətdarlıq məktubu da yazmağa hazırlaşır...