Milli Şura yaranmazdan hələ xeyli əvvəl hakimiyyət nümayəndələri və ona yaxın siyasətçilər müxalifətin birliyinin baş tutmayacağını bəyan edirdi. Ancaq bu proqnozlar özünü doğrultmadı. Milli Şura yarandı və prezidentliyə vahid namizədini elan etdi. İndi isə hakimiyyət təbliğaçıları Milli Şuranın sonadək vahid namizəd məsələsində qərarlı olmayacağına dair bəyanatlarla çıxış edir. Moderator.az AVP sədri, millət vəkili Fəzail Ağamalının seçkiqabağı durumlıa bağlı “Bizim Yol”a verdiyi müsahibəni təqdim edir.
- Fəzail müəllim, Siz və hakimiyyət rəsmiləri Milli Şuranı “vurmaqla” məşğulsunuz. Müxalifət bunu belə qəbul edir ki, hakimiyyət müxalifətin birliyindən ciddi narahatdır.
- Mən belə düşünməzdim. Azərbaycanda hansısa fövqəldadə hadisə olmayıb. Hər zaman birləşib, sonradan parçalanan qüvvələr indi Milli Şura adı altında birləşib. Bu tipli qurumlar Azərbaycanın seçki təcrübəsində çox yaranıb. Amma sonradan zaman göstərib ki, bu qurumu yaradanlar bir-birlərinə səmimi deyil. Onlar sonradan özlərini ittiham ediblər. Bu bizim çox yaxın tariximizdə yaşananlardır.
- Bəs o zaman Milli Şura əleyhinə davamlı tənqidlərin arxasında nə dayanır?
- Mən güman etmirəm ki, Milli Şuranı ictimai nüfuzdan salmaq üçün hansısası xüsusi siyasi plan olsun, ya da hansısa xüsusi texnologiyadan istifadə olunsun. Milli Şuranın xalq tərəfindən hansısa dəstəyi yoxdur ki, hakimiyyət də bundan narahat olsun. Sadəcə olaraq, siyasət qaydası var və buna uyğun da olaraq, deyilənlərə hakimiyyət tərəfindən reaksiya verilir. Yoxsa hansısa xüsusi narahatlıq yoxdur. Milli Şura öz ömrünü başa vurub dağılacaq.
- Nəyə əsasən bunu deyirsiniz? Milli Şura hətta prezident seçkisinə vahid namizədlə gedir...
- Bunu hələ zaman göstərəcək. Bu gün Milli Şuranın daxilində ciddi narazılıqlar var. Konkret olaraq, Müsavat Partiyası funksionerlərinin fərqli mövqeləri var. Rüstəm İbrahimbəyovun özünün də namizədliyi üçün hüqiqi maneələr mövcuddur. Onun ikili vətəndaşlığı və sair məsələlər qalır. Ona görə Müsavat Partiyasında belə hesab edirlər ki, Rüstəm İbrahimbəyov namizəd olmayacaqsa İsa Qəmbərin namizədliyi irəli sürülsün. Bütün bunlar onu göstərir ki, Milli Şura daxilində yekdil mövqe yoxdur. Ona görə də gözləniləndir ki, bu qurum seçkiyə qədər dağılsın. Cəmiyyətin sosial sifarişindən irəli gəlmədiyinə, yaranmadığına görə də Milli Şura bəri-başdan iflasa məhkumdur. Milli Şuranın guya Azərbaycan cəmiyyətinə müsbət dəyişikliklər gətirəcəy ilə bağlı fikirlərin də heç bir əsası yoxdur. Azərbaycanda bu seçkilərin qalibi yenə də İlham Əliyev olacaq. Bu gün hakimiyyət özünə arxayındır.
- Hakimiyyət özünə güvənirsə, o zaman həbsləri niyə davam edir? Hər keçən gün az qala bir müxalif düşüncəli adam həbs edilir. Bölgələrdə müxalifətin camaatla görüşlərinə basqınlar təşkil edilir. Özünə arxayın olan hakimiyyət bunu edərmi?
- Sualınızın qoyuluşu doğru deyil. Əvvala Azərbaycan hakimiyyəti özünə ona görə arxayındır ki, ötən illər ərzində həyata keçirilən siyasət xalqın maraqlarına, rifahına yönəlik siyasət olub. Xalq da bundan razıdır. İlham Əliyev növbəti dəfə xalqın dəstəyi seçkinin qalibi olacaq. Dediyiniz məsələlərə gəlincə, imkan vermək olmaz ki, kimsə ona verilən hüquqdan sui-istifadə etsin. Əvvala seçki təşviqatının zamanı var. Bu seçki qanunverciliyi ilə müəyyən edilir. Təşviqat kampaniyası zamanı hər bir prezidentliyə namizəd gedib, öz kampaniyasını aparacaq. Bu gün isə bəzi müxalifət funksionerləri bölgələrə gedib, müəyyən şou düzəldirlər. Bununla beynəlxalq ictimaiyyətə göstərmək istəyirlər ki, guya Azərbaycanda azad seçki mühiti yoxdur. Axı onlar özləri də bilir ki, bu belə deyil. Həbslər məsələsinə gəldikdə deyə bilərəm ki, onların nə dərəcədə günahkar olub-olmamasını hüquq-mühafizə orqanları bilir. Hələ onların məhkəməsi də olmadan siyasi məhbus müzakirələri açılır. Kimin günahkar, cinayətkar olub-olmamasını məhkəmə müəyyən edir. Məhkəmə qərarını gözləmədən seçkiqabağı şəraitə kölgə salmaq cəhdlərindən başqa bir şey yoxdur.
- Amma Azərbaycanda siyasi fəalların qanunsuz həbsini təkcə müxalifət deyil, həm də dünyanın ən nüfuzlu qurumları, o cümlədən ABŞ kimi ölkələr pisləyir və bunu siyasi addım kimi dəyərləndirirlər...
- Bu da başadüşüləndir. Son zamanlar bəzi xarici dairələr Azərbaycan hakimiyyətinin imicinin korlanması üçün əllərindən gələni edirlər. Təəssüflər olsun ki, bu işdə onlara yerli qüvvələr də dəstək verir. Ancaq bunlar bilməlidir ki, Azərbaycan Ermənistan deyil ki, kənar diqtələrlə dövlət idarə olunsun. Azərbaycan güclü dövlətdir və onun güclü lideri var.
- Hakimiyyət seçkiqabağı tənqidlərin azalması naminə siyasətində dəyişiklik edəcəkmi?
- Azərbaycan dövlətinin apardığı siyasət yenə də təkrar edirəm ki, xalqın maraqlarına cavab verir. Əlbəttə narazı olanlar da ola bilər. Demokratik cəmiyyətdə yaşayırıq. Əks fikirləri də eşidirik. Bu gün elə bir vəziyyət yaranıb ki, verilən azadlıqlardan sui-istifadə halları da artıb. Sosial şəbəkələrdə təhqir, böhtan ənənə halını alıb.
- ATƏT, Avropa Şurası və Avropa İttifaqının seçki islahatları ilə bağlı çağırışı da deyəsən çağırış olaraq qalacaq. Xalqa güvənən hakimiyyət nəyə görə, ictimai etimada əsaslanan seçki komissiyaları formalaşdırmır?
- Bu mövzu barəsində çox danışılıb. Azərbaycanda seçki qanunvericiliyi kifayət qədər təkmil və demokratik prinsiplərə cavab verən bir seçki sənədidir. Seçki komissiyalarının mövcud formatı da günün tələblərinə cavab verir. Orada həm partiyaların həm də bitərəflərin təmsilçiləri var.
- Hazırda həbsxana həyatı yaşayan sabiq nazir Əli İnsanovun seçkilərdə Milli Şuraya dəstək bəyanatı Qərbi Azərbaycanlıların mövqeyinə nə dərəcədə təsir edəcək?
- Qərbi Azərbaycanlılar ölkə siyasətində, ölkənin ictimai həyatında fəal olan bir kəsimdir. Onların dövlətçilik təcrübələri də var. Onlar hər zaman olduğu kimi bu seçkilərdə də prezident İlham Əliyevi dəstəkləyəcəklər. Mən güman etmirəm ki, bizim soydaşlarımız Əli İnsanovun çağırışına qoşulacaq. Əli İnsanov öz şəxsi mövqeyini sərgiləyə bilər. Onun başqaları adından fikirlər səsləndirməsi də düzgün deyil