“Azərbaycan, paytaxtımız Bakı yenə iki mühüm təbdirə, beynəlxalq toplantıya uğurla evsahibliyi etdi. Eyni gündə həm Qara Dəniz İqtisadi Əməkdaşlıq Təşkilatının (QDİƏT) Xarici İşlər Nazirləri Şurasının 39-cu iclası, həm də Parlamentlərarası İttifaqın (PAİ) Gənc Parlament Üzvlərinin 5-ci Qlobal Konfransı öz işinə başladı.Hər iki tədbirdə də bölgəmiz, regionumuz, dünyamız üçün çox önəmli məsələlər müzakirə olundu, fikir mübadilələri aparıldı, ən əsası da hər iki təbdir çox konstruktiv məcrada, qarşılıqlı anlaşma şəraitində keçdi”. 

Bunu mətbuata  açıqlamasında Parlamentlərarası İttifaqın (PAİ) Gənc Parlament Üzvlərinin 5-ci Qlobal Konfransının iştirakçısı, millət vəkili Eldəniz Səlimov deyib.

Millət vəkili Azərbaycanın bütün beynəlxalq və regional qurumlarla əməkdaşlığa üstünlük verdiyini, eyni zamanda, parlament diplomatiyasının önəminə diqqət yetirdiyini qeyd edərək, bildirib ki, hər iki təşkilatla da əməkdaşlıq, münasibətlər yüksələn xəttlə inkişaf etməkdədir.

“Azərbaycan həm QDİƏT-in, o cümlədən, həmin qurumun Parlament Məclisinin, həm PAİ-nin fəal  üzvlərindəndir. Hər iki qurumda da Azərbaycan nümayəndə heyəti çox layiqincə təmsil olunur. Bunlar çox önəmli məqamlardır, Azərbaycan reallıqlarının, Qarabağ həqiqətlərinin olduğu kimi, dünyaya çatdırılması baxımından mühüm tribunalardır. Xüsusilə də, PAİ kimi dünyanın bütün qitələrini özündə birləşdirən biri qurumla əməkdaşlıq çox faydalı və gərəklidir.

Təsadüfi deyil ki, PAİ-nin GənC Parlament Üvlərinin 5-ci Qlobal Konfransında  dünyanın 44 ölkəsindən 250-yə nümayəndə iştirak edirdi. Hansı ki, onların çoxu ilk dəfə idi ki, Azərbaycanda olurdu, ölkəmizlə ilk tanışlıq fürsəti əldə edirdi, həmçinin, Azərbaycanın inkişafının sözdə deyil, əməldə özünü göstərdiyini öz gözləri ilə görmək şansı qazanırdı. Gəldilər, öz gözləri ilə gördülər ki, Azərbaycan bu gün dünyanın ən dinamik və ən sürətli inkişaf yolunda olan ölkəsidir, ətrafı qazan kimi qaynamasına, 30 ildən artıq haqsızcasına, ədalətsizçəsinə Qarabağ münaqişəsi yaşamasına baxmayaraq, yerləşdiyi regionun, coğrafiyanın sabitlik və təhlükəsizlik adasıdır. Tədbirə layiqincə evsahibliyi edən Bakı dünyanın ən gözəl və ən təmiz şəhərlərindəndir. Bunu elə ikigünlük konfrans zamanı PAİ üzvü olan ölkələrin parlamentariləri də özləri dilə gətirdilər, hətta, Bakıdan öyrənilməli, götürülməli olan çox şeylərin olduğunu vurğuladılar. Bunları eşitmək, dinləmək də təbdirə evsahibliyi edən ölkənin nümayəndələri, vətəndaşları olaraq bizim üçün çox xoş, məmnuniyyətverici idi. Bunları, ölkəmiz, məmləkətimiz, xalqımız, millətimiz, baş şəhərimiz haqqında xoş sözləri dinlədikcə fəxr edir, qürür, iftixar hissi keçirirdik ki, azərbaycanlıyıq, Azərbaycan vətəndaşıyıq.

Onu da əlavə edim ki, ikigünlük müzakirələr zamanı çox mühüm məsələlər nəzərdən keçirildi, hər bir ölkəyə öz mövqeyni ortaya qoymaq imkanı verildi, dünyamızla, gələcəyimizlə bağlı ən müxtəlif və maraqlı çağırışlar edildi, ideyalar, təkliflər irəli sürüldü, mesajlar verildi. Həmçinin, maraqlı məqamlardan biri kimi, gənclərin cəmiyyətlərin, toplumların, dövlətlərin həyatlarındakı önəminə, perspektivinə, onların verə biləcəyi töhfələrə xüsusi diqqət yetirildi. Gənclərlə, gənclər siyasəti ilə bağlı məsələdə də Azərbaycanın örnək, nümunə ola biləcəyi söylənildi.Odur ki, hər iki tədbiri, xüsusən də, iştirakçısı olduğum Qlobal Konfransı çox yüksək qiymətləndirir, dəyərləndirir və hesab edirəm ki, bunlar Azərbaycanın növbəti siyasi-diplomatik uğurlarıdır. Bu uğurlar isə ölkəmizin gələcək inkişafında, o cümlədən, ağrılı problemimiz olan Qarabağ münaqişəsinin ədalətli həllində mütləq öz rolunu oynayacaq, öz töhfəsini verəcək”-deyə, E. Səlimov sözlərinə əlavə edib.

Konfransın digər iştirakçısı, millət vəkili Naqif Həmzəyev də bildirib ki, dünyanın gənc siyasətçilərinin aktual qlobal məsələlərin müzakirəsi üçün məhz ölkəmizin seçilməsi heç də təsadüfi deyil:

“Azərbaycan bu gün dünyada, region ölkələrində davam edən maliyyə böhranına, bir sıra qaynar nöqtələrə rəğmən sabitlik adası kimi özünü təsdiq edib. Dövlət başçısı cənab İlham Əliyevin həyata keçirdiyi düzgün siyasət nəticəsində əldə edilən tərəqqi, sabitlik və təhlükəsizlik şəraiti dünyanın diqqətini ölkəmizə cəlb etməyi bacarıb”.

Deputatın sözlərinə görə, dünyada dayanıqlı inkişafın təmin edilməsində gənclərin, xüsusən gənc parlament üzvlərinin rolunun gücləndirilməsi yollarını araşdırmaq üçün ölkəmizə gələn gənc siyasətçilərin  konfransdan əvvəl ölkəmizin azadlığı və ərazi bütövlüyü uğrunda mübarizədə canlarından keçmiş qəhrəman Vətən övladlarının uyuduğu Şəhidlər xiyabanını ziyarət etmələri çox müsbət haldır. 

“Həmkarlarını müşayiət edən millət vəkilləri 4 qitənin gənc palamentarilərinə keçdiyi şərəfli yol, Ermənistanın Azərbaycana qarşı silahlı təcavüzünün ağır nəticələri, ölkə ərazisinin 20 faizinin işğal edilməsi, 1 milyondan çox soydaşımızın doğma yurdlarından didərgin düşməsi barədə ətraflı məlumat verdilər.

Söhbətlər zamanı bir daha əmin olundu ki, Azərbaycan öz təklif və təşəbbüsləri ilə dünyada sülhün və təhlükəsizliyin möhkəmlənməsinə, milli və ümumbəşəri dəyərlərin, ayrı-ayrı istiqamətlərdə müşahidə olunan problemlərin həllinə dəyərli töhfələr verən sülhsevər, dünyaya açıq bir ölkə kimi tanınır.

Gənc parlamentarilərin dünyada baş verən münaqişələrə, fəlakətlərə, müharibələrə son qoyulması, gələcək nəsillərin maraqlarının müdafiəsi üçün təkliflərinin Azərbaycanın paytaxtı Bakıda səsləndirmələri isə bir daha təsdiq etdi ki, ölkəmiz qlobal səviyyəli tədbirlərə ev sahibliyi edən, bütün dünyanın diqqət mərkəzində olan mühüm məsələlərin müzakirə olunduğu siyasi, iqtisadi və humanitar mərkəzdir”-deyə, millət vəkili sonra sözlərinə əlavə edib.