NATO-nun Cənubi Qafqazdakı xüsusi nümayəndəsi Ceyms Appatura Gürcüstanın STV telekanalına geniş müsahibə verib. 

Moderator.az NATO-nun Cənubi Qafqaz siyasətində müəyyən detalları, nüansları bilmək, hətta düşmən Ermənistan barədə niyyətlərini öyrənmək baxımından müsahibənin bu hissəsini diqqətinizə çatdırmağı məqsədəuyğun hesab edir.

“İlk növbədə icazə verin Ermənistanın yeni hakimiyyəti haqqında danışım. Əlbəttə, bizim yüksək səviyyədə əlaqələrimiz artıq əvvəldən var idi. Baş katibin də əlaqələri olub. Onlar adamı ürəkləndirirlər. Yeni hakimiyyət NATO ilə birgə əlaqələrinin səviyyəsini saxlayır. Biz yaxşı tanıdığımız bəzi nazirlərlə də danışıqlar aparırıq ki, onlara daha yaxşı dəstək olaq. Misal üçün, yeni hakimiyyət korrupsiya ilə mübarizəyə ciddi girişib. Hakimiyyətin özünü müəyyənləşdirməsinə kömək məqsədilə inteqrasiyanı inkişaf etdirmək üçün bizim proqramımız var və bu onlara daha yüksək standartlar, daha çox şəffaflıq, korrupsiyaya qarşı mübarizədə beynəlxalq standartlar üçün lazımdır.

Və yeni hakimiyyət bizim nəzərimizə çatdırdı ki, Ermənistan xalqı həqiqətən bu istiqamətdə tərəqqidən ötrü alışıb-yanır. Bu sahədə biz birlikdə işləyə bilərik. Amma, Ermənistan bizim üçün həmişə sabit tərəfdaş olub. Biz onlara siyasi orientasiyalarını dəyişməyə məcbur etmirik. Rusiya ilə yaxşı münasibətlərin olması bizimlə münasibətlərdə ziddiyyət yaratmır. Bu həmişə belə olub və biz belə olacağına da ümid edirik. Və biz Ermənistanın bizim hər zaman olmuş əməliyyatlarımıza verdiyi töhvəni dəyərləndiririk. Bizim həqiqətən də heç bir problemimiz yoxdur. Mən Ermənistanın səfirinə həmişə deyirəm: bizim aramızda problem yoxdur və problem olmayacaq. Hər zaman belə olub.

Bu Azərbaycana da aiddir və mən bunu Azərbaycanın da səfirinə deyirəm. Azərbaycan-bizim ardıcıl tərəfdaşımızdır. Biz prinsipcə və NATO-nun Əfqanıstanda möhkəmlənməsində onların beynəlxalq təhlükəsizliyə verdikləri töhvəni alqışlayırıq. Misal üçün, Əfqanıstanda təhlükəsizliyi təmin etmək üçün nəqliyyat fonduna az vəsait qoymayıblar, onlar bizə tranzit imkanları yaradıb. Onlar başqa yollarla da töhvələrini verirlər. Nə isə, hər şey yaxşı gedir. Xüsusi çətinlik olmadan. Bizim yaxşı əməkdaşlığımız var və ümid edirəm ki, davam edəcək."