“Türkiyənin ildən-ilə güclənən, artan nüfuzunu, inkişaf edən gücünü, bölgənin ən aparıcı, söz sahibi olan dövlətlərindən birinə çevrilməsiini, dünyada nüfuzlu ölkələrdən biri olmasını qəbul edə bilməyən qüvvələr, dövlətlər var”.

 

Moderator.az xəbər verir ki, bunu “Ekspress.az”a açıqlamasında Milli Məclisin deputatı Məlahət İbrahimqızı ABŞ-ın son vaxtlar Türkiyəyə qarşı açdığı iqtisadi savaşa münasibət bildirərkən deyib.

 

“İndiyə qədər Türkiyəyə qarşı aparılan siyasi, iqtisadi, sosial, hərbi savaşlara qarşı, Türkiyə əleyhinə aparılan bu mücadilələrə qarşı Türkiyə dövləti və xalqı qalibiyyətlə çıxıb. Son illər “Gəzi” olaylarından başlamış, 17 dekabr hadisəsindən tutmuş, 15 iyul 2016-cı il hakimiyyət çevrilişinə cəhdlə bağlı olan hadisələrdən Türkiyə dövləti, Türk xalqı zəfərlə çıxıb. Türk milləti tarix boyu qürurlu bir millət kimi tarixə öz adını yazıb və bu günə qədər də qürurlu millət olduğunu öz əməli, fəaliyyəti, qəhrəmanlığı ilə göstərib. Biz Çanaqqala zəfərində Türk xalqının qəhrəmanlıq dastanını bu gün də indi baş vermiş kimi bilirik” -  deyən millət vəkili bu gün Türkiyəyə qarşı ədalətsiz hücumların olduğunu bildirərək qeyd edib ki, qardaş ölkənin sərhədində əvvəl PKK, sonra PYD-YPG kimi müxtəlif terror qruplarını süni olaraq yaradaraq, bununla da Türkiyəni zəiflətmək istəyən, Türk xalqını sarsıtmağa çalışan qüvvələr var. “Türkiyənin içərisində 40 ilə yaxındır ki, PKK və digər terror təşkilatları tərəfindən müxtəlif terror aktları təşkil etməklə Türkiyəni zəiflətmək, parçalamaq, Türk xalqının birliyini pozmaq istəyirlər. Türkiyədə müxtəlif etnik qruplar var. Amma bu xalqlar əsrlər boyu qardaş kimi yaşayıb və bu birliyi pozmaq istəyən qüvvələr hər cür pozucu proseslərə əl atırlar. Onlar dövlət çevrilişinə cəhd qədər çirkli oyunlara əl atdıar. Amma heç birində də onların arzuları gerçəkləşmədi. Necə deyərlər, arzuları gözündə qaldı. 2016-cı ilin 15 iyulunda baş verən çevriliş cəhdi də iflasa uğradı və yenə də Türk xalqı qələbə çaldı. Türkiyə iqtidarı və xalqı birləşdi, xaricdən, daxildən dəstəklənərək hərbi çevrilişə cəhd edən o Türk millətinin düşmənlərinə qarşı qəhrəmanlıq mücadiləsi göstərdi və zəfər də çaldılar”.

 

Türkiyəyə qarşı hazırda yeni bir həmlə, yeni bir projenin başlandığını deyən Məlahət İbrahimqızının sözlərinə görə, bunun hansı formada təzahür edəcəyini hər kəs izləyirdi. 

“Biz Türkiyəyə qarşı aparılan bu siyasətin izlərini görürdük. Lirənin dəfələrlə dəyərdən düşməsi, bu, artıq yeni bir iqtisadi müharibənin, yeni bir cəbhənin açılmasını sübut edirdi. Və türk lirəsi hədsiz dərəcədə inflyasiyaya uğradıqda bütün Türk xalqı ayağa qalxdı, Türkiyənin prezidenti hörmətli Rəcəb Tayyib Ərdoğan Türk milləti ilə bir yerdə Türk xalqının, millətinin qürurunu qorudu. Çox təəssüf ki, sosial şəbəkələrdə, bəzi mətbuat orqanlarında Türkiyə Cümhuriyyətinin prezidenti Ərdoğanın və onun komandasının nə üçün həmin o imperialist ölkələr, təşkilatlar qarşısında baş əymədiyini, tabe olmadığını bəzən tənqid edirlər. Yazırlar ki, nə üçün Türkiyə və Türkiyənin iqtidarı, şəxsən Ərdoğan bu qüvvələr qarşısında gedib baş əymir, tabe olmur, onların diqtəsini yerinə yetirmir? Yəni bilirsiniz, bu, bir millətin qürurunun çeynənməsi deməkdir. Bu, bir millətin, bir ölkənin bugünkü qloballaşan dünyada, beynəlxalq aləmdə nüfuzunun çökməsi, ləkələnməsi deməkdir. Biz bu günlərdə gördük ki, Türk xalqı necə bunu qarşıladı. Bütün siyasi partiyalar, tutduğu vəzifədən asılı olmayaraq hər kəs, bütün xalq bu iqtisadi savaşa qarşı ayağa qalxdı. Bunu bütün beynəlxalq təşkilatlar, dövlətlər də gördü. Bir neçə gündür ki, Almaniyanın rəsmiləri, şəxsən xanım Merkel Türkiyənin müdafiəsinə qalxdı. Bundan başqa İtaliya, ərəb ölkələrindən Qətər Türkiyəni müdafiə etdi. Azərbaycan Xarici İşlər Nazirliyinin mətbuat xidməti bizim dövlətin mövqeyini bir daha açıqladı ki, Azərbaycan həmişə Türkiyənin yanındadır, Azərbaycan xalqı da Türkiyə xalqının yanındadır və Azərbaycan dövləti, hökuməti Allah eləməsin, hər-hansı hadisə baş verərsə, ən pis günündə belə Türkiyənin yanındadır və hökumətimiz, Azərbaycan dövləti Türkiyədə bundan sonra da iri sərmayə qoyuluşlarını davam etdirəcək. Yəni Azərbaycan hər zaman Türkiyənin yanındadır. Azərbaycanla Türkiyənin gücü birlikdədir” – deyən Məlahət İbrahimqızı hesab edir ki, son illər Türkiyəyə qarşı aparılan bu hərbi, iqtisadi, siyasi əməliyyatlar gələcəkdə başqa dövlətlərə qarşı da aparıla bilər: “Belə ədalətsizlik, belə haqsızlıq, başqa dövlətlərin daxili işlərinə qarışmaq, başqa ölkələrə, xalqlara Allahın verdiyi təbii sərvətləri mənimsəməyə cəhd etmək, bu gün Türkiyəyə qarşı aparılırsa, sabah başqa ölkələrə qarşı da aparıla bilər. Heç bir ölkə bu cür sümürgəçi imperialist qüvvələrin, güclərin, təşkilatların hədəfindən sığortalanmayıblar.

Türkiyənin hökuməti, Türk xalqı səfərbər oldular və Türkiyənin dünyada olan dostları ona dəstək verdi və artıq Türkiyədə bu iqtisadi savaşa qarşı dayanış gətirdilər və demək olar ki, bu iqtisadi böhran çözülmək üzrədir. İnşallah Türkiyənin bu iqtisadi müharibədən də, iqtisadi hücumdan da özünü müdafiə etmək qabiliyyəti var. Buna qarşı qələbə də çalacaqdır. İnşallah Türkiyə qarşısında qoyduğu hədəflərinə çatacaqdır. Təkrar edirəm, bu, bu gün təkcə Türkiyəyə qarşı deyil, sabah başqa bir ölkəyə qarşı olacaqdır. Ona görə mütərəqi ictimaiyyət, mütərəqqi dünya, demokratik yolla inkişaf etmiş, bəşəri dəyərlərə sadiq ölkələr bu hücumlara qarşı birgə dayanışma göstərməli, bu haqsız hücumları birgə dəf etməlidir. İnşallah həmin qüvvələr yenə də biabır və ifşa olacaqlar. Necə ki, 2016-cı ildə ifşa olundu. İnşallah Türkiyənin yolu açıqdır, Türkiyə daha böyük hədəflərə çatacaqdır!”