- Mən Kollegiyadan xaric olunmamışam. Orada fəaliyyətim dayandırılıb. Bu da mənə heç bir təsir etmir. Ona görə ki peşəmi əlimdən ala bilməzlər. Hüquqşünas kimi fəaliyyət göstərə bilərəm. İyul ayının 20-də Kollegiyada xəbərim olmadan fəaliyyətimin dayandırılması haqda iclas keçirildi. Ayın 18-dən xəstəlik vərəqəm olub, bülletendə olmuşam. Dəfərlələ Kollegiyaya müraciət etdim ki, qərarı verin, məhkəməyə müraciət edim. Amma uzatdılar. Yalnız “Qafqazinfo”da məsələ ilə bağlı ölkə prezidentinə müraciət etməklə bağlı açıqlamam dərc olunandan sonra məni çağırıb qərarı verdilər. Halbuki bir aya yaxın idi ki, qərarı vermirdilər. Yarım səhifədən ibarət qərardır. Bundan sonra mən Nəsimi rayon məhkəməsinə müraciət etdim. İşə baxış keçirildi və haqlı olduğum sübuta yetirildi. Əmək Məcəlləsinin 189- cu maddəsinin tələblərinə əsasən işçi xəstə olanda, ezamiyyətdə və məzuniyyətdə olanda onun haqqında iltizam tənbehi görülə bilməz. Məhkəmə təxirə salındı. İşə baxacaqlar. Hesab edirəm ki, yüz faiz haqlıyam. Xəstəlik vərəqəm olduğu halda heç kimin ixtiyarı yox idi ki, mənim haqqımda tədbir görsün.

- Bəli, amma fəaliyyətimə 6 ay məhdudiyyət qoyulub. Mənim əlimdə işlər həddindən artıq çox idi. Həmin müqavilələr üzrə hərəkət edirəm. Mən çox işləri pulsuz aparıram. “Azad Azərbaycan” kanalında iştirak etdiyim verilişlərdə öz cibimdən pul qoyaraq haqqı pozulmuşların hüquqlarını müdafiə edirdim.

- Ağır cinayət işlərində və Ali Məhkəmənin işlərində bu müddət ərzində iştirak edə bilmirsən. Məsələ ondan ibarətdir ki, hazırda mənim Ali Məhkəmə və cinayət işləri ilə əlaqədar bağladığım müqavilələrim çoxdur. Ona görə də hazırda onlarla məşğulam.

- Kollegiyanın mənə qarşı qərəzi göz qabağındadır. İndiyə kimi hansı bir vəkilin haqqında iltizam tənbehi verib onu internet saytlarına verirlər? İyun ayında Kollegiyada iltizamla bağlı 57 işə baxılıb. Vəkillər Kollegiyasının sədri orda iltizam tənbehi vermək üçün oturub. İyul ayında 38 nəfərin haqqında bu tənbeh verilib. Bunların hansı mediada dərc olunub? Hər hansı şəxs haqqında qanuni qüvvə almamış, məhkəmə hökmü olmadan deyə bilərsən ki, o dələduzdur və yaxud insanları aldadır? Bu ancaq insanın şərəf və ləyaqətini alçatmaq, işgüzar nüfuzunu aşağı salmaqdır. Bunun səbəbi odur ki, ictimaiyyət və xalq arasında həddindən artıq hörmətə nail olmuşam. Ölkədən kənarda da tanınıram. Ona görə də məni istəmirlər. Elə bilirdim ki, indiyə kimi çəkdiyim zəhmətlərə çox yüksək qiymət veriləcək. Bilmirdim ki, insan işlədikcə, kömək etdikcə əslində başından vururlarmış.

- Kollegiya getsin öz adamlarının məsələsini araşdırsın. Mənə qarşı qərəzlərinin səbəbi ictimaiyyət və xalq tərəfimdən sevilməyimlə bağlıdır. Çölə çıxan kimi xanımlar, kişilər qollarını açıb məni qucaqlayır. İnsan qalxdıqca onu vurmaq lazım deyil. Aslan İsmayılov nə etmişdi ki, onu Kollegiyadan kənarlaşdırdılar. Uşaqlar evində böyümüş bir qızın boşanma işinə baxırdım. Kollegiyadan məni çağırıb dedilər ki, o işə baxma. Oğlan tərəfinin hansısa qohumları Kollegiyada işləyirmiş. Mən razılaşmadım və işə baxaraq uddum. Bundan sonra məni çağırıb dedilər ki, icraatda oğlan tərəfinin anasını guya təhqir etmişəm. Dəhşətə gəldim, çünki icrada iştirak etməmişdim. Məsələni araşdırılmağa verdim. Dedim ki, İltizam Komissiyasının sədri Həzi müəllim işi araşdırsın. Araşdırdı və yenə də məlum oldu ki, mən icrada iştirak etməmişəm. Nəticədə Həzi müəllimi dolayı yolla işdən çıxartdılar.

- Asan deyil.

- O ümumiyyətlə istəyir ki, məni Kollegiyadan çıxartsın. Bir neçə dəfə mənim fəaliyyətimi dayandırıb. Yəqin, istəyir ki, axırda bezib özüm Kollegiyadan gedəm. Mən də 26 ildir ki, bezmirəm. Azər Tağıyev heç vaxt məni tək çağırıb üzümə danışmır. İstəyir ki, məni iclasa çağırsın. İclasda da heç kimin söz demək ixtiyarı yoxdur. O nə desə hamı “hə” deyəcək. Çağıran kimi mənə deyir ki, televiziyaya çıxma. Çıxsan, sənin üçün yaxşı olmayacaq.

- Vəkilliyi görün nə günə salıblar? Vəkil xəstələnir, onun xəstəlik vərəqəsi ödənilmir, məzuniyyətə gedir, heç bir haqqı ödənilmir. Vəkil özünü kimdən qorusun? İstintaqdan qorusunmu, qarşı tərəfdənmi qorusun? Vəkillərin bu gün ən çox qorxduğu yer Vəkillər Kollegiyasıdır. Biz vəkillər ora sığınmalıyıq. Kollegiyada mənə qarşı haqsızlıqlar çox olub. Ən çox da Azər Tağıyev məni şantaj etdirir. Onun mənlə 26 ildir ki, nə problemi var anlamıram və amma bu mübarizə davam edəcək.

- Vəkil kimi öz gücümə inanıram. Dövlətimizə və qanunlarımıza da inanıram. Qanun da mənim tərəfimdədir. Mübarizəmi sona kimi davam etdirəcəm.

- O çıxarılan vəkillərin hamısı çox savadlıdır. Niyə Azərbaycanda savadlı vəkillər vurulur? Mən hazırda mübarizəmdə dövlətimə, xalqıma arxalanıram. Lətifə Əliyevada, Namizəd Səfərovda səbəb nə idi? Amma vəkil var ki təyanatla işləyir, gedib heç işlə tanış olmur, qol çəkir gəlir. Savadlı vəkillə savadsız arasında fərq olmalıdır O vəkili mühakimə etmək lazımdır ki, işi oxumayıb, niyə bədbəxti o günə qoyur.

- Niyə Azər Tağıyevin adamları televiziyaya çıxanda belə demirlər bəs? Niyə ancaq tanınmış vəkillərə qarşı bu cür ittihamlar səsləndirirlər? Mənim televiziyaya çıxıb maarifləndirməklə bağlı qoyduğum yolla nə qədər vəkil ekranlarda çıxış edir. Bu yaxşı haldır ki, vəkillər maarifləndirmə verilişlərində iştirak edir. Vətəndaşlara pulsuz xidmət edirlər. Bu bəyəm pisdirmi? Xarici ölkələrdə ictimaiyyət tərəfindən sevilən vəkilləri çağırıb cəzalandırırlarmı? Bizdə niyə Vəkilllər Kollegiyası belə edir?

- Vəkil öz işini planlaşdırmalıdır. Mən televiziyaya da çıxıram. Nənəyəm. Üç nəvəm var. Evə gedib nəvəmi ayağımın üstündə də yelləyirəm, yoxsa yatmır. Qadınam. Evdə gəlin olsa da, yenə ona kömək etməliyəm. Mən o verilişlərə çıxmaqdan heç nə güdmürəm. Mən Salyana bir ailəni barışdırmaqdan ötrü 4-5 dəfə gedirəmsə, bundan nə güdə bilərəm? Yaxud kiməsə sosial pensiya düzəldirəmsə, buradan nə güdə bilərəm? Azər Tağıyev məni həddindən artıq çox sıxıb, amma mənası yoxdur.

- Qadınlarımızın çoxu bu saat təzyiq altındadır. Çoxuna əzab verilir. Kişilər başqa biriylə də evlənir. Deyirlər ki, ikincini də qəbul eləməlisən. Boşanma ilə bağlı verilən üç aylıq müddət çox azdır. Üç aydan sonra tərəflər razı oldu, olmadı boşanırlar. 10 gündür evlənən şəxs mənim yanıma gəlir ki, boşanırıq. Oğlan evi görür ki, qız evi imkanlıdır. Başlayır istifadə etməyə. Toy edib pul yığır, evə cehiz aldırır. Sonra cehizləri geri vermir. Qız da məhkəmələrə düşür. İndi 10 gündür evləniblər, oğlan qızın cehizini vermir, qız evi də evi bütün cehizlə doldurub. 1 il məhkəmələrdə qalırlar. Yaxud qızlar tanışlıq yolu ilə evlənirlər. Oğlan evi imkanlıdır, brilliantlar aldırır qız, sonra boşanıb geri qaytarmır. Bəzən nəyinsə xatirinə evlənirlər. Şükür ki, uşaqları olmur. Məni nəyə görə şərə-böhtana salıblar? Çünki uşaqları həddindən artıq çox sevirəm. Boşanma hallarında birinci soruşuram ki, uşağın var ? Yoxdusa, ürəyim bir az rahatlaşır.

- Hər bir halda insana qarşı o cür hərəkətlər dözülməzdir. Bunlar insani hərəkətlər deyil. Bu yaxınlarda bir nəfər ana öz qızını boğub öldürmüşdü. Deyilənə görə, qızı bədbəxt etmişdilər. Mən o ananı qınayıram. Özü həbs olundu, əzab-əziyyətlə böyütdüyü qızını da öldürdü. Bəlkə, sənin qızını kimsə aldatmışdı? Oğlan da özü üçün keyflə yaşayır. Bir əvvəlcə məsələni araşdır, polisə müraciət et. Bunu etməmiş qızı öldürdü ki, namusumuza ləkədir. Sən axı anasan. Və yaxud icraçılar 10 yaşlı uşağı anaya vermişdi. Ata da bununla razılaşmayıb uşağın başını kəsmişdi. Bu dəhşətdir, mən həmin hadisəyə neçə gün ağlamışam. Həmin adam mənim yanıma gəlmişdi ki, uşağı vermirlər. Dedim ki, qərardan apellyasiya, kassasiya şikayəti verə bilərsən. Durdu getdi, sonra da uşağın başını kəsdi. Demək istəyirəm ki, indi sən atasan? Ömrün boyu vicdan əzabı çəkəcəksən.

- İlhamə Quliyeva ilə biz çox yaxın olmuşuq. Mən onun işlərinin hamısını udmuşam, təmannasız vəkillik etmişəm. Sonralar isə İlhamə Quliyevanı məndən uzaqlaşdırdılar. Ola bilsin ki, elə bu miras məsələsinə görə uzaqlaşdırdılar. Bir yandan da sevinirəm ki, yaxşı ki uzaqdayam. Ancaq məsələ ondan ibarət idi ki, mən İlhamə Quliyevanın yanında olsaydım, bu hadisələr baş verməyəcəkdi. Mən ona deyirdim ki, belə məsələlərə baş qoşmasın. İradə adlı bacısı ona həddindən artıq çox kömək edirdi. Xəstə olanda da yanında idi. Elə olurdu ki, gecələr evə də getmirdi, yanında qalırdı. Amma onun oğlu da var idi axı. Hansı ki Orxan da onun əziyyətini çox çəkib. Amma hər şeydən məhrum oldu. İradəgil də yaxşı adamdırlar. Bəlkə də paylarına düşən hissədən Orxana nəsə veriblər. Düzdür, İlhamə xanım Orxanı övladlığa rəsmi qaydada götürməmişdi. Orxan gəlib mənlə müqavilə bağlasaydı, mən mütləq ona əmlak verdirəcəkdim.

- Ali Məhkəmədə Nazpəri xanımla bağlı iş qurtarandan sonra bizim onunla əlaqəmiz kəsildi. Daha doğrusu, kəsdirdilər. Kimlərsə ona yaxın olub məsləhət vermək istədi. Mən bunu hiss etdim və çəkildim qırağa. Mənim uşaqlara həddindən artıq sevgim var. İlhamə xanım demişdi ki, Nazpəri xanımla bağlı məhkəməni udub pulunu uşaq evlərinə keçirdəcək. Udduq, amma keçirib keçirmədiyi mənə məlum olmadı.

- Cavanşir Məmmədovun, Flora Kərimovanın, Hüseyn Abdullayevin vəkili olmuşam. Hərdən mənə müğənnilər tərəfindən yenə müraciətlər edilir. Amma mən götürmürəm. Çünki götürəndə o biri tərəflə pis düşürəm. Nazpəri xanıma da mənim böyük hörmətim var. Sonradan öz-özümə dedim ki, əgər sənin bu adama hörmətin varsa niyə bu məsələlərə qarışırsan? Amma İlhamə xanımı da çox istəyirdim. Hərdən özümü qınayıram ki, gərək axıra kimi İlhamə xanımının yanında olardım. O içində çəkdi. Bütün başına gələnləri o heç vaxt görməmişdi. O ancaq onu görmüşdi ki, tərifə layiqdir, birincidir, heç kim ona heç nə demir. Birdən ki belə şeyləri gördü, saldı ürəyinə. Ürəyi də xəstə idi, əməliyyat olmuşdu. Ona görə də belə oldu. O zaman məndən, Faiq Ələkbərlidən, Ülvidən, Orxandan başqa onun yanında qeyriləri yox idi. Hara gedirdiksə, bir yerdə idik. Həmişə süfrəsinin başında idim.(qafqazinfo)