“Azərbaycan prezidenti İlham Əliyevin həyata keçirdiyi siyasətin əsas qayəsi ölkə vətəndaşının sosial rifah halının yaxşı olması, təhlükəsizliyinin təmin olunması və iqtisadi cəhətdən təmin olunmasıdır. Cənab İlham Əliyev on ildən artıq ölkəyə rəhbərlik etdiyi müddətdə fəaliyyətində bu siyasəti real olaraq həyata keçirib və  məhz bunun nəticəsidir ki, ölkə vətəndaşı ilə prezident arasında çox etibarlı və qarşılıqlı inam mühiti formalaşıb.”

 

Bu fikri Moderator.az-a açıqlamasında millət vəkili Aydın Hüseynov Azərbaycan prezidenti İlham Əliyevin və ölkənin birinci xanımı Mehriban Əliyevanın Qarabağ bğlgəsinə səfərinin yekunları ilə bağlı mövqeyini açıqlayarkən deyib.

 

Onun sözlərinə görə, bu gün biz artıq Azərbycan prezidenti İlham Əliyevin fəaliyyəti müddətində ölkənin sosial-iqtisadi, müdafiə və təhlükəsizliyi sahəsində gördüyü konkret işlərin bəhrəsini görməkdəyik: 

“Təkcə ölkə sosial-iqtisadi cəhətdən inkişaf etməyib, eyni zamanda ölkənin müdafiə qabliyyəti, təhlükəsizliyi tam təmin olunub və güclü ordumuz formalaşıb. Ölkə başçısı mütəmadi olaraq respublikanın bölgələrində, xüsusən də  cəbhəyanı bölgələrdə olaraq inkişaf dinamikası ilə şəxsən yaxından tanış olur və  bölgələrin daha da inkişaf etdirilməsi ilə bağlı öz tapşırıq və tövsiyyələrini verir. Cənab İlham Əliyev bir prezident və Ali Baş Komandan olaraq  mütəmadi olaraq cəbhəyanı bölgələrə səfər edərək orada ordumuzun vəziyyəti ilə də yerindəcə tanış olur. Məhz onun bu sahəyə yetirdiyi böyük diqqətin və qayğının nəticəsidir ki, Azərbaycanın dünyada seçilən güclü ordusu formalaşıb. Azərbaycan ordusu isə bu gücünü  konkret olaraq aprelin 2-dən 5-dək Qarabağ cəbhəsində gedən döyüşlərdə bir daha sübut etdi. Və Azərbaycan vətəndaşı bir daha əmin oldu ki, ölkə etibarlı əllərdədir. Istər onu rəhbərlik edən şəxs baxımından, istərsə də onun təhlükəsizliyini təmin edən ordusu baxımından. Bu baxımdan Azərbaycan prezidenti İlham Əliyevin Mehriban Əliyeva ilə Qarabağ bölgəsinə  növbəti səfəri də mühüm əhəmiyyət kəsb edir. Prezident  və xanımı səngərdə hərbçilərlə görüşüb, onlara mənəvi dəstək verməklə yanaşı, ordunun  döyüşə hazırlıq vəziyyəti ilə də yaxından tanış olub, müvafiq tapşırıqlarını verdi. Bundan əlavə olaraq ölkə başçısı son günlərdə erməni ordusunun atəşkəsi pozması və təxribatı nəticəsində mülki əhaliyə vurulan vəziyyətlə tanış oldu. Yararsız vəziyyətə düşən evlərdə oldu, onların sakinləri ilə görüşdü. Yararsız binaların yenidən bərpa olunması və əvvəlki vəziyətinə qaytarılması üçün yerindəcə yerli hakimiyyət orqanlarına tapşırıq verdi. Bu bir daha onu göstərir ki, Azərbaycanda  ölkə rəhbərliyi ilə xalq arasında həmrəylik və birlik mövcuddur. Bunu ölkə başçısının bölgədə yerli əhali ilə görüşü və qarşılanması sübut etdi. 

Ermənistanda isə vəziyyət tam fərqlidir. Artıq erməni xalqı öz hərbi xuntasına inanmır və etibar etmir. Məhz ona görə də Serj Sərkisyan işğal olunmuş Azərbaycan torpaqlarına gələn zaman ancaq hərbçilərlə görüşüb geri döndü. Bu bir daha onun həyata keçirdiyi siyasətin iflasa uğramasının göstəricisi idi.  Siyasəti iflasa uğrayan Serj Sərkisyan rejimi artıq qorxusunda  xalqla birbaşa təmasdan qaçır. Çünki onun xalqa deyəcəyi söz və vəd qalmayıb”, - deyə millət vəkili vurğuladı.

Son günlərdə İrəvanın separatçı Dağlıq Qarabağ  rejiminin müstəqilliyini tanımağa hazırlaşması ilə bağlı dövriyyəyə buraxdığı fikirlərə mövqeyini açıqlayan millət vəkili A. Hüseynov bildirdi ki, əvvəla İrəvanın cürət edib belə bir addım atacağına inanmır: 

“Əgər nəzəri olaraq belə, İrəvan separatçı rejimin müstəqilliyini tanısa, o zaman bu birbaşa Ermənistanın  məhvinə gətirib çıxara bilər. Ona görə də Ermənistanın belə bir addım atmağa cürət edə bilməz. Sadəcə olaraq Serj Sərkisyanın hərbi xuntası belə bir fikri ortaya atmaqla Qarabağdakı məğlubiyyətini, uğursuluğunu  pərdələməklə, ölkədaxili ictimai diqqəti yayındırmağa  xidmət edir. S. Sərkisyan hakimiyəti bununla manipulyasiya edərək daxildəki gərgin olan vəziyyətdən özünü xilas etmək üçün manevr edir.”

Millət vəkili deyib ki, İrəvan yaxşı anlayır ki, əgər belə addəm atarsa nəticəsi necə qurtara bilər.”Bundan əlavə bu beynəlxalq hüquq normalarına, prinsiplərinə, eyni zamanda BMT TŞ-nın münaqişənin həlli ilə bağlı qəbul etdiyi qətnamələrə, Ermənistanın üzərinə götürdüyü öhdəliklərə birbaşa ziddir. Ona görə də İrəvan belə bir addım ata bilməyəcək. Yenə də təkrar edirəm ki, bu daxili ictimai diqqəti yayındırmağa hesablanan fikirdir”, - deyə A. Hüseynov qeyd edib.