Əvvəlki məhkəmə proseslərində mən Sizə dəfələrlə ictimai formada müraciət etmişəm və bunun nəticəsində müəyyən qədər obyektivlik göstərilərək, məhkəmələrdə işim qismən də olsa obyektiv formada araşdırılmışdır. Lakin çox maraqlı hal ondan ibarətdir ki, hər hansı bir qurumun qüsurunu ortaya çıxarmamaq üçün məqsədli şəkildə bir nəfər şəxsin həyatını ləkələyən məmurlarımız da vardır.

Əvvəlki yazdığım müraciətlərdəki məlumatları təkrarən qeyd etməyi lüzum bilmədim.

Sizin dəfələrlə məmurlara ictimai formada vətəndaşlara qarşı qanunsuzluq, haqsızlıq etməmələrini tapşırmağınıza baxmayaraq, hələ də bəzi məmurlar öz hikkələrindən əl çəkməyərək, vətəndaşları incitməkdə, həyatlarını məhv etməkdə davam edirlər.

Mənim Sizə müraciət etməkdə əsas məqsədim ondan ibarətdir ki, qanunlara riayət etməyən və qanunlardan öz mənafeləri üçün istifadə edən məmurlar ən azından bu müraciətimi görərək işlərinə məsuliyyətlə yanaşsınlar. Lakin, təəssüf ki, bəzi məmurlar qanunlara riayət etsələr də, bəziləri isə ümummilli liderimizin “Hər kəs qanun qarşısında eyni məsuliyyəti daşıyır və statusuna görə heç kimə üstünlük verilə bilməz!” və Sizin dəyərli kəlmələrinizə əhəmiyyət vermədən statuslu şəxslərdən “tapşırıq” alaraq onların xeyirlərinə qərar verirlər.

Cənab Prezident!

Təsəvvür edin ki, mən 6 məhkəmə prosesindən keçmişəm və 7-ciyə doğru gedirəm:

1.Bakı Ağır Cinayətlər məhkəməsi AZ CM-nin 178.3.2 və 313-cü maddələri ilə məni təqsirli bilərək 8 il azadlıqdan məhrum edilmə barədə hökm verdi (hakim Rauf Əliyev).

2.Bakı Apellyasiya Məhkəməsi bu hökmü dəyişdirmədən qüvvəsində saxladı (hakim Həsən Əhmədov).

3.Azərbaycan Respublikasının Ali Məhkəməsi bəraətverici əsaslarla işi yeni apellyasiya baxışına qaytardı (hakim İlham Cəfərov).

4.Bakı Apellyasiya Məhkəməsi tam əsaslarla bəraət hökmü verdi (hakim Faiq Qasımov).

5.Azərbaycan Respublikasının Ali Məhkəməsi ağır ittihamlarla işi yeni apellyasiya baxışına təyin etdi (Fərhad Kərimov).

6.Bakı Apellyasiya Məhkəməsi 1 nəfər şəxsi əsas tutaraq əməlimi AR CM-nin 178.2.4-cü maddəsinə tövsif edərək cərimə cəzası tətbiq etdi (hakim Qədim Babayev).

7.18 fevral 2016-cı ildə yenidən Ali Məhkəmə təyin olunmuşdur (hakim İnqilab Nəsirov).

Gördüyünüz kimi, mən sanki “voleybol topu”yam, bu hissədən o hissəyə, o hissədən bu hissəyə...

Çox güman edirəm ki, yenidən oyun hazırlayıblar ki, işi yenidən ləğv edib yeni apellyasiya baxışına təyin etsinlər. Prokurorluğun bəzi əməkdaşları dayanmır, çünki dayandıqları təqdirdə qanunsuzluq edən müstəntiqin başı ciddi şəkildə ağrıyacaqdır. Əlbəttə ki, dövlət ittihamçılarına sadə bir Azərbaycan vətəndaşını taleyi maraqlı olmalıdır, yoxsa statusuna görə hörmət qazanmaq naminə hər hansı bankın rəhbərliyinin sifarişini böyük məmnuniyyətlə icra edən müstəntiq? Təbii ki, müstəntiq. Vətəndaşın taleyi necə olursa olsun, əsas odur ki, qanunsuz əməllər ört-basdır olunsun.

Hətta bu məhkəmələrdən o qədər bezmişəm ki, inşallah, nə vaxtsa məhkəmələr bitərsə, mən Ginnesin Rekordlar kitabına müraciət edərək, adımı o siyahıya saldırmaq niyyətindəyəm. Hər halda məhkəmələrim dünya üzrə rekord həddə çatmaq ərəfəsindədir.

Hər kəsə aydın şəkildə məlumdur ki, Azərbaycan Respublikasının Cinayət Məcəlləsi, Cinayət Prosessual Məcəlləsi birbaşa Sizin imzanızdan sonra qüvvəyə minir. Yəni ki, bu kitablardakı hər bir cümlə Sizin tərəfinizdən yoxlanılır və qəbul edilir. Lakin bəzi məmurlar və hakimlər Sizin dəyərli imzanıza hörmət etməyərək, əhəmiyyət vermədən bəzi qanunları tətbiq etmir və ya da ki, öz istədikləri formada tətbiq edirlər.

AR CM-nin 14.2-ci maddəsində qeyd olunur ki: “Cinayət qanununda nəzərdə tutulmuş hər hansı əməlin (hərəkət və ya hərəkətsizliyin) əlamətləri formal cəhətdən mövcud olsa da, lakin az əhəmiyyətli olduğuna görə ictimai təhlükəli sayılmayan, yəni şəxsiyyətə, cəmiyyətə və yaxud dövlətə zərər yetirməyən və ya zərər yetirmək təhlükəsi yaratmayan əməl (hərəkət və ya hərəkətsizlik) cinayət hesab edilmir”. Yəni, bu maddənin açıq aydın izahı ondan ibarətdir ki, əgər hər hansı bir əməldə formal olaraq cinayət əlaməti vardırsa, lakin bu əməl ictimai təhlükə yaratmırsa, cinayət hesab edilmir. Mənim əməlimdə 3 nəfər öz doğmalarımın adına kredit rəsmiləşdirib, kredit şəklində pulu özüm götürmüşdüm və bu pulları da şikayət olunmamışdan çox əvvəl öz istəyim və məsuliyyətimlə artıqlamasıyla ödəmişəm. Burada hansı cinayətdən söhbət gedə bilər? Lakin bəzi hakimlər “Unibank” KB ASC-nin tam məğlubiyyətini ört basdır etmək naminə AR CM-nin 14.2-ci maddəsini tətbiq etmir və bununla da mənə ləkə vurmaqla yanaşı, Sizin imzaladığınız qanunlara da riayət etmirlər.

Ümumiyyətlə, AR CM-nin 14.2-ci maddəsinin hər hansı bir şəxsə tətbiq edilməsi də praktikada ya yoxdur, ya da nadir hallardadır.

Eyni zamanda, məhkəmə baxışlarında da dəfələrlə aparılmış araşdırmalardan aydın göründü ki, mənim işim mülki məsələdir. Şahid və zərərçəkmiş qismində tanınmış şəxslərin də ifadələri bunu sübut etdi.

Ailəmiz çox ağır durumdadır. Hətta vəziyyət o hala gəlib çıxmışdır ki, yaşadığımız evin kirayə haqqını belə ödəyə bilmirik. Üzərimdə olan bu məhkəmə prosesləri, tarixçəmin ləkələnməsi işləməyimə böyük əngəllər yaradır. Vəziyyətimiz çox ağırdır. 

18 fevral 2016-ci il tarixdə hakim İnqilab Nəsirovun sədrliyi ilə Ali Məhkəmə baxışı təyin edilmişdir. Sizdən çox xahiş edirəm, bu məhkəmə prosesində haqq-ədalətin bərqərar olunmasında, işimə qanunla baxılmasında və sübutlarıma düzgün hüquqi qiymət verilməsində mənə köməklik göstərəsiniz.

Mənim, bir Azərbaycan vətəndaşı olaraq, heç bir məmurlara inamım qalmamışdır. Mən bir tək Sizə və Sizin zəhminizə inanıram.