Vahid Əhmədov: “Baş verənlər göstərdi ki, İlham Əliyev heç nəyi yarıda saxlamağı sevmir”
Məlum olduğu kimi, Prezident İlham Əliyev 15 oktyabr tarixində Ağdərə, Əsgəran və Xankəndidə olub, bu ərazilərdə Azərbaycan Respublikasının Dövlət Bayrağını qaldırıb.
Moderator.az olaraq millət vəkili Vahid Əhmədovla söhbətimizdə baş verənləri müzakirə etməyə çalışdıq:
-Valid bəy, bu gün dövlət başçısı bir sıra torpaqlarımızda, eləcə də Xankəndidə Azərbaycan bayrağını yüksəltdi, xalqa müraciət etdi. Öncə bu mühüm, tarixi hadisənin əhəmiyyəti ilə bağlı düşüncənizi bilmək istərdik.
-Azərbaycan bayrağının Ağdərədə, Əsgəranda və eləcə də Xankəndidə ucaldılması həqiqətən də çox böyük, tarixi və mənəvi hadisədir. Bu, Azərbaycanın uzun illərdir ki, işğal altında qalan tarixi torpaqlarının nəhayət ki, azadlığa qovuşması, yenidən Azərbaycan dövlətinin nəzarəti altına keçməsi deməkdir.
Bu, həm də vətənimizin, dövlətimizin bütövləşməsi deməkdir.
Ümumiyyətlə, Xankəndidə bayrağımızın ucaldılmasını Vətən müharibəsindən sonra dövlətimizin, xalqımızın, Prezidentimizin əldə etdiyi ən böyük nailiyyət hesab edirəm. Düşünürəm ki, eyniylə 8 Noyabr zəfəri kimi 15 oktyabr tarixi də hər zaman xalqımız tərəfindən böyük qürur və məmnunluq hissi ilə xatırlanacaq, Prezidentimizin xalqımız qarşısındakı bu tarixi xidməti əsla unudulmayacaq. Çünki bu, xalqımızın on illərlə həsrətində olduğu bir qələbədir və biz bu qələbəni qəhrəman oğullarımızın qanı və canı bahasına, eləcə də Ali Baş Komandanımızın qətiyyəti sayəsində qazanmışıq.
-Bildiyiniz kimi, Vətən müharibəsindən sonra bəzi qüvvələr Ağdərə, Xocalı, Əsgəran və Xankəndinin faktiki olaraq dövlətimizin nəzarətində olmadığını iddia edir, bununla 8 Noyabr zəfərinə kölgə salmağa çalışırdı. Sizcə bu gün baş verənlər, həm də Ali Baş Komandanın həmin qüvvələrə ən layiqli cavabı sayıla bilərmi?
-Şübhəsiz!
Qeyd etdiyiniz kimi, bəzi təxribatçı qüvvələr Prezident İlham Əliyevin rəhbərliyo ilə şanlı Azərbaycan Ordusunun, Azərbaycan xalqının 44 günlük Vətən müharibəsində əldə etdiyi qələbənin əhəmiyyətini kiçiltməyə çalışır, faktiki olaraq düşmən dəyirmanına su tökürdülər. Onlar iddia edirdilər ki, Vətən müharibəsindən sonra da bəzi yaşayış məskənləri ermənilərin nəzarətindədir və buna görə də 8 Noyabr zəfəri tam, mükəmməl sayıla bilməz. Halbuki, o zaman da hamıya məlum idi ki, bu ərazilər də Azərbaycanın nəzarəti altına keçəcək və bu torpaqların erməni separatçılarının nəzarətində qalması müvəqqəti haldır. Necə ki, cari ilin 19-20 sentyabr tarixində Azəörbaycan lokal antiterror tədbirləri sayəsində Qarabağdakı qanunsuz silahlı birləşmələrə, separatizmə həlledici zərbə vurdu və bütün bu ərazilər praktiki şəkildə Azərbaycanın nəzarəti altına keçdi.
Bu baxımdan bu gün Ağdərədə, Əsgəranda, Xankəndidə ucaldılan bayraq bütün təxribatçı qüvvələrə sanballı cavabdır. Bununla yanaşı, bu, həm də Ermənistana, ona havadarlıq edən qüvvələrə ünvanlanan mesaj kimi də dəyərləndirilə bilər. Azərbaycan bununla bütün dünyaya, eləcə də ermənipərəst dairələrə göstərdi ki, onu heç kim, heç nə dayandıra bilməz.
Bundan başqa, baş verənlər göstərdi ki, İlham Əliyev heç nəyi yarıda saxlamağı sevmir. O, başlatdığı işi hökmən və hökmən sona çatdırır. Necə ki, biz bu gün bir daha bunun şahidi olduq.
-Vahid bəy, Prezident xalqa müraciətində bildirdi ki, bu gün Xankəndində olmağımıza səbəb Azərbaycan xalqı, Azərbaycan övladıdır. Dövlət başçısının bu sözlərini Azərbaycan Silahlı Qüvvələrinə, onun qəhrəmanlığına verilən ən yüksək qiymət hesab oluna bilərmi?
-Əlbəttə.
Prezident öz müraciətində Azərbaycan Ordusunun, Azərbaycan xalqının fədakarlğını, cəsarətini, qətiyyətini və müvarizliyini yüksək qiymətləndirdi, vətənimizin azadlığı uğruda həlak olan şəhdilərimizi ehtiram hissi ilə yad elədi. Ali Baş Komandan bildirdi ki, Azərbaycan Silahlı Qüvvələri həm Vətən mühahribəsi dönəmində, həm də post-müahribə dövründə böyük qəhrəmanlıqlara imza atıb, erməni faşizminin başını əzib. Prezident cari ilin 19-20 sentyabr tarixlərini əhatə edən lokal antiterror tədbirlərində ordumuzun göstərdiyi yüksək peşəkarlığı da ayrıca qeyd etdi, ordumuza öz minnətdarlığını bildirdi.
Təbii ki, Prezidentin məlum açıqlaması Azərbaycan Ordusunun gücünə, peşəkarlığına və vətənpərvərliyinə verilən yüksək qiymətdir.
Doğrudan da, istər Vətən müharibəsində, istərsə də lokal antiterror tədbirləri zamanı məhz ordumuzun qüdrəti, xalqımızın fədakarlığı bu böyük, çoxsaylı uğurların təminatçısı oldu. Lakin unutmamalıyıq ki, bütün bu nailiyyətlərin, zəfərlərin mərkəzində dayanan əsas amili güclü sərkərdə - Ali Baş Komandan amili oldu. Məhz İlham Əliyevin bir siyasətçi və bir sərkərdə kimi peşəkarlığı, uzaqgörənliyi və çevik manevr qabiliyyəti ordumuzun, xalqımızın apardığı mübarizənin qələbə ilə başa çatmasını təmin etdi. İlham Əliyev çox böyük əzm, çox böyük qətiyyətlə xalqı və ordunu qələbəyə doğru apardı. Yekun zəfəri, həlledici qələbəni təmin etdi. Bu qələbəni diplomatik müstəvidə də davam və inkişaf etdirdi. Və bütün bunlar dünyanın, yerli və beynəlxalq ictimaiyyətin gözləri önündə baş verdi. Buna görə də Azərbaycan xalqı haqlı olaraq İlham Əliyevi öz tarixi qələbələrinin baş memarı hesab edir.
Mən Xankəndi və digər tarixi ərazilərdimizdə Dövlət Bayrağımızın ucaldılması münasibəti ilə xalqımızı, ordumuzu və bizə bu sevinci bəxş edən Prezidentimizi təbrik edirəm. Hər bir Azərbaycan vətəndaşı kimi əminəm ki, Azərbaycan bayrağı o torpaqlarda sonsuza kimi dalğalanacaq, əbədi olaraq xalqımıza sevinc və qürur bəxş edəcək!
Seymur ƏLİYEV
