“Paşinyan hakimiyyətə gəldikdən bəri biz zaman-zaman Ermənistandakı prosesləri dəyərləndirmişik. Və mən həmişə demişəm ki, növbəti seçkilərdə real məğlubiyyəti, yaxud Allahın onun şəxsi həyatı ilə bir qəzavü-qədəri, məsələn, sui-qəsd-filan olmasa, Paşinyan hakimiyyətdən getməyəcək”. 

 

Bu fikirləri Moderator.az-a açıqlamasında “Son Paşinyan-Putin görüşündən sonra və ümumiyyətlə, qlobal beynəlxalq hadisə və proseslər fonunda əsasən Rusiyanın “5-ci kalonu”ndan, o cümlədən erməni kilsəsindən ibarət müxalifətin Azərbaycanla sərhədlərin müəyyənləşməsinə çalışan Paşinyan hakimiyyətinə qarşı dirəniş göstərdiyi Ermənistanda baş verənlərin sonunu necə görürsüz?” sualını cavablandırarkən beynəlxalq məsələlər üzrə analitik Teymur Qasımlı ifadə edib.

 

“Və bir daha təkrar etmək lazım gəlir ki, əgər Paşinyan 2020-ci ilin 44 günlük Ermənistan-Azərbaycan savaşından məğlub çıxmasına rəğmən Ermənistandakı növbəti seçkilərdə qalib gəlibsə, deməli, erməni cəmiyyətində onun yetərincə reytinqi və dəstəyi var. Əvvəla, öncələr də dediyimiz kimi, hazırkı Ermənistan siyasi meydanında ona alternativ lider yoxdur. İkincisi, erməni xalqı dırnaqarası “Qarabağ klanı”ndan bezib.  Paşinyan isə erməni cəmiyyətini Qərbə doğru, korrupsiyasız-filansız iqtisadi inkişafa, rifaha aparmaq üçün praqmatik bir siyasət yürütdüyündən toplumun böyük bir hissəsi onun arxasındadır. O, Qərb dairələrindən, ABŞ, Fransa və s. dövlətlərdən gözəl ustalıqla dəstək alır. Və paralel olaraq Rusiya ilə də lap dərinliyədək konfrontasiyaya getməməyə çalışır”, - deyə davamında politoloq bildirib. 

 

“Hesab edirəm ki, mayın 8-də Paşinyanın Rusiya lideri Putinlə görüşünün nəticələri də rəsmi İrəvanın seçdiyi ümumi geo-politik istiqamətə ciddi təsir göstərməyəcək və bu siyasət sonda Ermənistanın Qərbə tam inteqrasiyası ilə nəticələnəcək. Bu mənada düşünürəm ki, Rusiyanın “5-ci kalonu”nun da Ermənistandakı çabaları əbəsdir. Bu saat revanşistlərin əsas bəhanəsi Azərbaycanla sərhədlərin delimitasiyasıdır.  Dünyanın bir çox ölkələrində sərhədlərin dəqiqləşdirilməsi zamanı müxalif qüvvələr meydana çıxır. Amma bu apaaçıq aydındır ki, Ermənistandakı son gərginliyin arxasında məhz Rusiya dayanır. Lakin onu da nəzərə almaq lazımdır ki, Paşinyan və onun komandası Moskvanın “5-ci kalon”u ilə artıq 6 illik mübarizə təcrübəsi toplayıb. O, hakimiyyət eşelonları kimi, ordunun içərisindəki Rusiya agentura şəbəkələrini çətinliklə olsa da, təmizləyir. Eyni zamanda Paşinyan yaxşı anlayır ki, Qərbə inteqrasiya olunmaq üçün o, ilk növbədə Azərbaycanla və NATO üzvü Türkiyə ilə münasibətləri normal məcraya salmalıdır və bu mənada rəsmi Bakının da sərhədlərin müəyyənləşməsi ilə bağlı haqlı tələblərini yerinə yetirməyə məcburdur”, -deyə siyasi şərhçi izah edib. 

 

“Nəhayət, onu da nəzərə almaq lazımdır ki, bizim bəzən istehza ilə baxdığımız Nikol Paşinyan əslində qlobal güclərdən yetərli dəstək alan bacarıqlı bir siyasi oyunçudur. Onun kifayət qədər bilikli, təcrübəli müşavirləri, məsləhətçiləri var. Onlardan ən məşhuru  2004-cü ildə Türkiyədən mühacirət edərək Massaçusets Texnologiya İnstitutunda işləməyə başlayan, dünya şöhrətli türkiyəli iqtisadçı, erməniəsilli Daron Acemoğludur. Acemoğlu  dünyanın nümunə göstərilən 10 ən yaxşı iqtisadçısından biri sayılır. Həmçinin Levon Ter-Petrosyanın müşaviri olmuş Jirayr Libaridyan, elə Ter-Petrosyanın özü də Paşinyana məqamında dəyərli məsləhətlər verir və o da bunlara uyğun düzgün gedişlər edir, addımlar atır. Bu və digər səbəblərdən nə qədər ki, növbəti seçkilərdə uduzmayıb, yaxud komandası ciddi korrupsiya faktlarına yol verərək erməni cəmiyyətində nüfuzunu itirməyib, Paşinyan hökumətinin Ermənistanda iqtidarda qalacağını düşünürəm”, - deyə analitik vurğulayıb.

 

Sultan Laçın