Moderator.az xəbər verir ki, Türkiyənin Uluslararasi Aktivist Sənətçilər Birliyinin (UASB) Azərbaycan təmsilçiliyinin Bakıda yerləşən “Sedet ART” rəsm akademiyasının Cəlilabad rayonunda şöbəsi fəaliyyətə başlayıb. 

“Sedet ART” rəsm akademiyasinin Cəlilabad şöbəsinin açılışı ilə əlaqədar rayonda geniş tədir təşkil olunub. Tədbirdə UASB-nin Azərbaycan şöbəsinin rəhbəri, “Sedet ART” rəsm akademiyasının rəhbəri, tanınmış rəssam Nevai Metin, həmçinin, Əməkdar incəsənət xadimi Ziyadxan Əliyev, Əməkdar rəssam, Rəssamlıq Akademiyasinin professoru Asif Azərelli, Cəlilabad rayonunun istedadlı rəssamları və incəsənət adamları iştirak ediblər. 

Tədbiri giriş sözü ilə açan UASB-nin Azərbaycan şöbəsinin rəhbəri Nevai Metin əvvəlcə tədbirə təşrif buyurmuş qonaqları salamlayıb. Daha sonra “Sedet ART” rəsm akademiyasının, eləcə də yeni açılan Cəlilabad şöbəsinin qarşıya qoyduğu məqsədləri, perspektivləri haqqında danışıb. Qeyd edib ki, rəhbərlik etdiyi akademiya xüsusi istedadlı şagirdlər üçün nəzərdə tutulub. Məqsəd rəssamlıq qabiliyyəti olan uşaqların, gənclərin üzə çıxarılması, onlara doğru istiqamət göstərməkdir. Cəlilabad filialının yaradılmasında da əsas hədəf bölgədə yaşayan istedadlı gənclərə, məktəblilərə yardım etməkdir. Rəssamlıq Akademiyası üçün istedadlı tələbələr yetişdirməkdir. Nəvai Metin onu da bildirib ki, yeni yaradılmış şöbədə gənclər rəssamlıq sənətinin 11 şöbəsi üzrə dərs alacaqlar. 

Azərbaycanın paytaxtdan xeyli uzaq məsafədə yerləşən ir bölgəsində belə bir rəssamlıq akademiyasının açılmasını həm tədbir iştirakçıları, həm rayon gəncləri, həm də ictimaiyyət yüksək qiymətləndirib. Ölkədə ilk olan belə bir addımın atılmasında zəhməti olan hər kəsə təşəkkür ediblər. 

Tədbirin rəsmi hissəsi başa çatdıqdan sonra qonaqlar, eləcə də tədbir iştirakçıları rayon məktəblilərinin əl işlərindən ibarət sərgisi ilə tanış olublar. Şagirdlərin müxtəlif janrlarda çəkdikləri rəsm əsərləri çox rəğbətlə qarşılanıb, yüksək qiymətləndirilib.