Hər birimiz öncə Vətənimizi, daha sonra ailəmizi müqəddəs hesab edirik və hər zaman da qoruyuruq, lazım gəldikdə müdafiəsinə belə hazır oluruq. Yaş ötdükcə müqəddəs hesab etdiklərimizin siyahısı genişlənir, ail təhsil aldığımız ocaq, çalışdığımız müəssisə və s. müqəddəs bildiklərimizin sırasına əlavə olunur. Mənim üçün də belədir. Öncə ailəm, daha sonra isə birinci sinifdən ta indiyə qədər oxuduğum məktəblər, ali təhsil ocaqları, çalışdığım müəssisələr hər zaman müqəddəs hesab etdiklərimdir. Hətta övladlarımın təhsil aldıqları məktəblər belə mənim üçün dəyərlidir. Və onları qorumaq, müdafiə etmək, bacardığım qədər köməklik etmək boynumun borcudur. 

Bunları yazmaqda da məqsədim var. Bu gün ikinci ali təhsil aldığım Azərbaycan Dövlət Aqrar Universitetinin (ADAU) mətbuat xidmətinin rəhbəri Qalib Rəhimlinin bir yazısını oxudum və çox pərişan oldum. Sən demə hansısa bir saytda ADAU-nun rektoru İbrahim Cəfərov haqqında xoşagəlməz ifadələrlə dolu yazı yayımlanıbmış. Və bunu qəbul edə bilməyən Qalib Rəhimli də həmin yazıya cavab verib. Qalib Rəhimlinin yazıdığını oxuduqdan sonra ilk növbədə elə onun özünü qınadım. İlk öncə ona görə qınadım ki, dəyərli vaxtını və zamanını ayırıb yerindən qalxan “cücə”lərə cavab yazıb. İkincisi, ona görə qınadım ki, ADAU-nun bizim kimi haqqı deməklə yanaşı haqsızın cavabını verməyi də bacaran tələbələri dura-dura bu işə nəyə görə o özü əl buraşdırıb. Evin qapısına daş atan uşaqların payını ev sahibi özü verməz axı, elə evin ən xırda uşaqlarına tapşırar. Üçüncüsü ona görə qınadım ki, ADAU bu və ya bu kimi yazıların cavabını neçə illərdir ki, öz işiylə, fəaliyyətiylə verir. Bu gün dünya universitetləri sırasına çıxmağa iddialı olan ADAU-nun gördüyü işlərin xoş sorağı nəinki bizim ölkədən, hətta ölkə xaricindən də gəlməkdədir. Heç görübsünüzmü ki, bar verməyən ağaca daş atan ola?! Əlbəttə ki, bar verən ağacı daşlayarlar və bu gün ADAU-nun ünvanına atılan “daşları” sizlər də anlayışla qarşılamalısınız. Çünki o daş atanların “məqsədləri” nəinki sizlərə, eləcə də hər kəsə tam aydındır. Daşı atıb gözləyirlər ki, bəlkə İbrahim Cəfərov da onların cibinə “paydan-puşdan” tullayacaq. Ancaq bu dəfə yanılıblar, ünvanlarını düz seçməyiblər, başa düşməyiblər ki, İbrahim Cəfərovun, ümumiyətlə ADAU-nun ört-basdır etməyə çalışdığı hansısa açığı yoxdur. 

Daha sonra Qalib Rəhimlinin etirazına səbəb olmuş yazını oxudum, əvvəlcə xeyli güldüm. Yaxşı bir el misalımız var: “Aşığın sözü qurtaranda nanay-nanay edər”. Bu yazının müəllifi də eyni o aşığı təkrarlamışdı. Yazmağa bir şey tapmayıb siyasi məsələləri ortalığa atmışdı, onu da yaxşı bacarmayıb üz-gözünə bulaşdırmışdı. Yazı müəllifinin “məharətinə”, atdığı böhtanlara bir xeyli güləndən sonra yenə də qınamağa başladım. Bu dəfə də şikayət edən valideyni, tələbəni (təbii ki, əgər belə biri varsa, çünki nə ad, nə də soyad qeyd olunmayıb) qınadım. Ona görə qınadım ki, əgər elə bir məsələ var idisə, hansısa müəllim rektorun adından pul istəmişdisə, nəyə görə birbaşa rektorun qəbuluna getmirdi? Axı İbrahim Cəfərovun kabineti iş günlərinin bütün saatlarında tələbələrin üzünə açıqdır. İ.Cəfərov tələbədən qaçan rektorlardan deyil, əksinə tələbəyə daha yaxın olmağı, qayğı və problemləri ilə maraqlanmağı, tələbərlə diskusiyalar, fikir mübadilələri aparmağı sevən rektordur. O tələbə şikayət etmək üçün hansısa saytı axtarana qədər, elə birbaşa rektorun yanına üz tutardı, gerçəkdən də elə bir hadisə baş vermişdisə rektoru agah edərdi. Əgər rektor müəllimin dediklərini təsdiq etsəydi, ondan sonra düşərdi əl-ayağa, üz tutardı saytlara. Bu məqamda bir məsələni nəzərinizə çatdırmağı özümə borc bilirəm. İkinci kursun sonunda imtahanları yüksək qiymətlərlə bitirdiyim üçün rektor prorektorla birlikdə məni qəbul etmişdi. İki uşağını Bakıda qoyub, bir ay Gəncədə qalıb dərslərə girən, sesiyanın sonunda 7 imtahan verib və hamısından da yüksək nəticələr qazanan tələbəsinin əlini sıxıb təbrik etmişdi. Borcu falan yox idi mənə, əksinə mənim tələbə kimi borcum idi ki, dərslərdə iştirak edim, imtahandan yüksək nəticələr əldə edim. Hansısa rektorun belə etdiyini eşitmişdinizmi, görmüşdünüzmü? Əlbəttə ki, yox, çünki mən özüm də ilk dəfəydi belə rektor görürdüm. Hələ digər məsələləri sadalamıram, yüksək nəticələr göstərən tələbələrə pul və digər mükafatlar ayırmasını, bayramları yataqxanada qalan uşaqlarla birlikdə qeyd etməsini, imkansız tələbələrə ərzaq yardımları verməsini demirəm. Edilən yaxşılıqları demək çirkinlikdir, amma bunları deməyə məcbur oldum. 

İndi də həmin şikayət edən tələbədən bir xahişim, ricam var. Mən də sənin kimi ADAU-nun tələbəsiyəm, ancaq səndən fərqli olaraq qarşıda hələ iki ilim daha var. Özüm Bakı şəhərində yaşayıram, ailəliyəm, iki övlad anasıyam. Hər sessiyada bir ay ailəmdən, uşaqlarımdan, işimdən ayrılıb Gəncəyə getməyə məcbur oluram. Hər həftənin altıncı günü dərsdən çıxıb Bakıya qayıdıram, birinci gün də ilk çıxan aftobusla yenidən Gəncəyə dərsə gedirəm. Gördüyün kimi mənim üçün ikinci ali təhsil almaq elə də asan deyil. Və mənim kimi orada yüzlərlə tələbə var, aralarında da xeyli sayda yüksək rütbəli polis məmuru, idarə rəisi, nazirlik məmuru, icra məmuru, jurnalist, biznesmen olanlar, hətta Kənd Təsərrüfatı Nazirliyinin özünün belə işçiləri var. Ancaq indiyəcən heç birimizə nə ailəli olduğumuza, nə yaşımızn çox olduğuna, nə vəzifəmizə, nə pulumuza görə güzəşt edilməyib, nə də vasitəçi saldığımız adamların tapşırığına məhəl qoyulmayıb. İndi səndən xahiş edirəm ki, həmin o pulla iş aşıran, diplom verən müəllimlə bizi də tanış edəsən. Beş yüz nədir, lap beş min də verərik, yetər ki, gedin, bir də iki ildən sonra gəlib diplomunuzu apararsınız desinlər. İnan ki, bunu bizim üçün edə bilsən ən böyük savabı qazanmış olarsan, lap sənin də xəcalətindən biz tələbələr çıxarıq.

Yenidən yazımın əvvəlində qeyd etdiyim məqama qayıdıram, ADAU mənim üçün müqəddəs ocaqdır, çünki orada qiyabi şöbə, iqtisadiyyat fakültəsinin üçüncü kurs tələbəsiyəm. Nəinki təhsil aldığım müddətdə, buranı bitirdikdən sonra da ADAU mənim ikinci evim olaraq qalacaq və nə qədər ki, varam ADAU-nu qoruyacağam, yazılan hər bir böhtanın layiqli cavabını verəcəyəm. Bu həm də ondan irəli gəlir ki, İbrahim Cəfərov əsl rektordur, Azərbaycanın təhsil naziri postuna layiq olan bir şəxsiyyətdir və bunu da feysbuk istifadəçiləri adından deyirəm. Arada feysbukda İbrahim Cəfərovu qarabaqara izləməkdən başınızı qaldırın, dostlarının kimliyini analiz etməkdən vaxt ayırın, heç ADAU-ya aidiyyatı olmayan şəxslərin onun haqqında yazdığı müsbət fikirləri də oxuyun. 

Sonda ADAU-ya şər atmağa çalışanlara çox bəsit bir söz demək istəyirəm, çünki dəyərli sözlərə ancaq dəyərli insalar layiqdir. Gedib topunuzu başqa yerdə oynadın, cocuqlar, ADAU sizinçün uşaq bağçası deyil...