Biz gələcəkdə, dinc yolla, sülh yolu ilə, dövlətlərin qarşılıqlı razılığı əsasında əzəli və əbədi torpaqlarımızın birləşəcəyinə,  Bütöv Azərbaycanın yaranacağına ümidimizi itirmirik!

      

Moderator.az saytında İran parlamentinin milli təhlükəsizlik və xarici siyasət komissiyasının sədr müavini, general Mənsur Həqiqətpurun"Siyavuş Novruzovu Araz kənarına çağırdım, gəlmədi!" başlıqlı yazısını oxudum. İran rəsmisi öz yazısında xislətinə uyğun olaraq növbəti dəfə Azərbaycan dövlətini və xalqını aşağılayan ifadələrə yol verib.Mənsur Həqiqətpur yazır ki:

”Uzun müddətdir Azərbaycan Milli Məclisinin deputatı Siyavuş Novruzova müraciət edib onu Araz kənarında, canlı yayım şərti ilə iki ölkə arsındakı problemlərin müzakirəsinə çağırmışam. Çox istəyirdim ki, həm Azərbaycan, həm İran əhalisi bu müzakirələri canlı izləsin və şahid olsun ki, münasibətlərin soyuqluğu yalnız düşmən fitnəsidir, bu iki xalq qardaşdır və sevgidən savayı bölüşəcəyi bir şey yoxdur”. Görünür  Mənsur Həqiqətpurun qardaşlıq və sevgi haqqında elementar təsəvvürü belə yoxdur və ya elə bilir ki, bizlər İran rəsmilərinin, o cümlədən elə onun özünün Azərbaycanla bağlı yeritdiyi siyasətdən bixəbərik! Biz İranın bizlərə bəslədiyi “qardaşlıq” hisslərini Qarabağ müharibəsi zamanı gördük. Biz “qardaşlıqdan” dəm vuran Mənsur Həqiqətpurun Azərbaycanın hərbi hissələrinə gedərək ölkəmizə aid hərbi məntəqələrin yerlərini müəyyənləşdirib gizli ermənilərə ötürdüyünü də unutmamışıq. 

Mənsur Həqiqətpur yazır ki, “İranın Ermənistanla məhdud ticari və iqtisadi əlaqələri var. Bu adi şeydir. Mən rəsmi şəkildə demişəm, sübut etməyə də hazıram ki, Qarabağ müharibəsində Azərbaycana hər növ yardımlar etmişik, İslamın və Azərbaycanın xeyrinə vuruşmuşuq”. Bərəkallah Mənsur Həqiqətpur! Biz Sizin bu dediklərinizə inanaq, yoxsa Ermənistanın sabiq prezidenti Levon Ter-Petrosyan “İran olmasa idi bizim qələbəmiz də olmazdı.İran sayəsində biz çətin vəziyyətdən çıxa bildik. Rusiya bizim silahımızı, İran isə çörəyimizi verdi” fikirlərinə? 

Mənsur Həqiqətpur Azərbaycanı İsraillə və ABŞ-la dostluqda suçlayır və bu dostluğun güya İranın əleyhinə olduğunu qabardır. Cənab Mənsur Həqiqətpur! İsrail İran ərazilərini işğal etməyib. Əgər etsə idi əmin ola bilərsiniz ki, Azərbaycan İrandan fərqli olaraq Sizin düşməninizlə heç bir əlaqə yaratmazdı! O ki, qaldı ABŞ-na. Biz ABŞ-ın Azərbaycana olan münasibətini çox gözəl bilirik. 907-ci düzəlişin səbəblərini də, ABŞ-ın Dağlıq Qarabağ münaqişəsində faktiki olaraq xristian  Ermənistanı dəstəklədiyini də görürük. Bəs İslamdan, müsəlman qardaşlığından dəm vuran İranın müsəlman Azərbaycana deyil, xristian Ermənistana havadarlıq etməsini necə başa düşək? Bəs İranın qardaş adlandırdığı Azərbaycana faktiki olaraq ərazi iddiaları irəli sürdüyünü, bu səbəbdən Xəzərin yekun statusunun razılaşdırılmasının müşkülə çevrildiyini necə başa düşək?

Mənsur Həqiqətpur yazır ki: “Soruşan gərək ki, cənab Novruzov, bu qədər gücün varsa, Qarabağı nə üçün almırsan? Sən 20 ildir supergüclərin qarşısında ikiqat olmusan ki, Qarabağı alıb sizə qaytarsınlar.” Cənab Mənsur Həqiqətpur! 1.Siyasət mümkün olanı həyata keçirmək vasitəsidir! 2.Azərbaycan gözəl başa düşür ki, şimalda onu faktiki olaraq ərazisini işğal edən və bu gün də Ermənistanı hərtərəfli müdafiə edən  Rusiya, cənubdan isə sözdə özünü dost, həqiqətdə isə, yumşaq desək, dost olmayan İran əhatə edir. Və müharibə başlayacağı təqdirdə İranın faktiki olaraq Ermənistana dəstək verməyəcəyinə kim zəmanət verə bilər? 3. Həzrəti Əlinin (Allah ondan razı olsun!) məşhur bir kəlamı var. Yazır ki: ”Sərçə balası deyil ki, qanad açmamış uçmağa çalışsın, fəqət dəvə balasıdır ki, güc toplamamış səsini çıxarmaz!” İnşallah Azərbaycan zamanında öz gücünə torpaqlarını yağı düşməndən azad edəcəkdir!

Mənsur Həqiqətpur yazır ki: “Bütün dünya bilir ki, Azərbaycanda Milli Məclisə deputatlar necə seçilir. ...Təbriz isə Bakı deyil ki, kimsə rüşvətlə, yaxud yuxarıdakıların tapşırığı ilə deputat seçilsin”. Mənsur Həqiqətpur elə bilir ki, bizlər İranda seçkilərin necə keçirildiyini izləmirik. İranda kimin seçkilərə buraxılması seçki başlamamışdan öncə müəyyən edilir. İranda nəinki, mövcud rejimə müxalifətdə olanlar, hətta rejimi dəstəkləyib amma ölkədə bir az islahatlar aparmaq istəyənlər belə müxtəlif bəhanələrlə seçkiyə buraxılmırlar. Ona görə də seçkiyə buraxılanlardan kimin qalib olacağının heç bir əhəmiyyəti qalmır! Biz Azərbaycan keçirilən seçkilərdə müəyyən qanun pozuntularının olduğunu inkar etmirik. Ancaq  İrandan fərli olaraq Azərbaycanda  mövcud iqtidara qatı müxalifətdə olanlar belə seçkilərdə iştirak edirlər.

 

Mənsur Həqiqətpur qeyd edir ki, “Qarabağı unutdurmaq üçün Böyük Azərbaycan fantaziyasını atırlar ortaya. Mən tarixçilərlə danışmışam, soruşmuşam ki, bu Böyük Azərbaycan nə vaxt və harada yaranıb? Gəlirlər Səfəvilər üzərinə. Soruşuram Səfəvilər Azrəbaycan dövləti idisə, İran harada idi?” Cənab Mənsur Həqiqətpur! Səfəvilər dövləti mövcud olan illərdə İran adlanan ərazinin harada olmasını öyrənmək üçün tarixçilərdən soruşmağa ehtiyac yoxdur, Səfəvilər dövlətinin xəritəsinə baxmaq kifayətdir!

Bəli, bizlər Böyük və  Bütöv Azərbaycan arzusundayıq! Ancaq bu gün biz Bütöv Azərbaycan dedikdə hansı dövlətin ərazisində yaşamasından asılı olmayaraq xalqımızın dil, mədəniyyət, mənəvi bütövlüyünü nəzərdə tuturuq! Biz əzəli və əbədi Azərbaycan torpaqlarının bir qisminin qonşu dövlətlərin ərazisinə daxil edildiyini bilirik. Ancaq buna baxmayaraq Azərbaycan heç bir dövlətə qarşı ərazi iddiaları irəli sürmür! Amma biz gələcəkdə, dinc yolla, sülh yolu ilə, dövlətlərin qarşılıqlı razılığı əsasında əzəli və əbədi torpaqlarımızın birləşəcəyinə,  Bütöv Azərbaycanın yaranacağına ümidimizi də itirmirik!