Camal İsmayılov 7 iyul 1984-cü ildə Neftçala rayonunun Həsənabad qəsəbəsində anadan olub. 1986-cı ildə Camal İsmayılovun ailəsi Rusiyanın Krasnoyarsk diyarının İqarka şəhərinə köçüb. Camal İsmayılov da 1990-cı ildə İqarka şəhərində V. P. Astafyev adına 1 nömrəli məktəbin I sinfinə gedib. 1991-ci ildə ailəsi Neftçala rayonuna qayıtdığından Camal İsmayılov təhsilini Neftçala şəhərində 1 nömrəli tam orta məktəbdə davam etdirib. 2001-ci ildə həmin məktəbi bitirən Camal İsmayılov həqiqi hərbi xidmətə yollanıb. Həqiqi hərbi xidmətdə olarkən dərin zəkası, xüsusi bacarığı ilə komandanlığın diqqətini çəkən Camal daha sonra Xüsusi Təyinatlı Qüvvələrin sıralarında baş gizir kimi xidmətə başlayıb. 

 

Xidmət dövründə Camal İsmayılov kəşfiyyatçı kimi daim öz üzərində çalışaraq dağ-xizəkçilik, paraşütdən tullanmanın bütün sirlərini öyrənib. Azərbaycan, Türkiyə və Gürcüstanda keçirilən bir çox təlimlərdə iştirak edərək bacarıqlarını daha da təkmilləşdirib. Camal İsmayılov, həmçinin rus, erməni və ingilis dillərini mükəmməl öyrənib. 

 

Camal İsmayılov 2015-ci il mayın 9-da Faşizm üzərində qələbənin 70 illiyi münasibətilə Rusiyada keçirilən parad zamanı mayor Mehdi Mahmudovun rəhbərliyi altında 70 nəfərdən ibarət olan Azərbaycan Silahlı Qüvvələrinin qrupunda yer alıb. 

 

Camal İsmayılov 2016-cı il aprel döyüşlərinin iştirakçısı olub. Aprel döyüşlərində göstərdiyi şücaətə görə üçüncü dərəcəli medalla təltif edilib. Bundan başqa Camal İsmayılov xidməti dövründə “Azərbaycan Silahlı Qüvvələrinin 90 illiyi”, “Qüsursuz xidmətə görə” 3-cü dərəcəli, “Azərbaycan Silahlı Qüvvələrinin 95 illiyi”,  “Qüsursuz xidmətə görə” 2-ci dərəcəli, “Azərbaycan Ordusunun 100 illiyi” yubiley medalları ilə təltif olunub.

 

2020-ci ilin 27 sentyabrında Ermənistan tərəfindən cəbhədə növbəti təxribat törədiləndə ilk gündən döyüşə qatılanlardan biri də baş gizir Camal İsmayılov olub. Camal İsmayılov Füzuli, Cəbrayıl, Zəngilan şəhərlərinin, Ərgünəş yüksəkliyinin, Hadrut qəsəbəsinin azad olunmasında, eləcə də Laçın dəhlizi istiqamətində hakim yüksəkliyin alınmasında şücaətlə vuruşub. Füzulinin azadlığı uğrunda gedən döyüşlərin birində hərbçi yoldaşını xilas edərkən yaralanan qəhrəman döyüşçü bir müddət xəstəxanada müalicə aldıqdan sonra döyüşlərə yenidən qoşulub. 

 

Camal İsmayılov Qırmızı bazar istiqamətində gedən döyüşlərdə xüsusilə fərqlənib. Şəxsi heyəti ilə hər zaman düşmənə ən yaxın təmas xəttində olub, daha çox zərbə vuran, öndə gedən hücum əməliyyatlarında iştirak edib. Hətta 3-5 nəfərlə düşmənin arxasına keçərək çox mühüm tapşırıqları uğurla yerinə yetirib.

 

Hadrut əməliyyatları isə Camal İsmayılovun döyüş yolunun ən parlaq səhifələrindən biridir. Belə ki, Camal İsmayılov gözlənilməz mövqedən düşmənə səssiz yaxınlaşaraq sarsıdıcı zərbə vurub, onları çaş-baş salıb. Ermənilər döyüş mövqelərini qoyub qaçıblar. Ən məşhur əməliyyatı zamanı isə Camal İsmayılov 1500 erməni hərbi qulluqçusuna öz dillərində əmr verərək onları aldadıb. 

 

Döyüş yoldaşları mediaya açıqlamasında bildirir ki, Camal erməni polkovniki qətlə yetirəndən sonra onun sənədlərini, bıçağını və ratsiyasını özü ilə götürüb. Ratsiyaya qoşularaq erməni dilində əmr verib. Güllə atmadan 1500 nəfərlik heyəti aldada bilib və tapşırıq şəhid verilmədən uğurla yekunlaşıb. Bu əməliyyatdan sonra Camal İsmayılov “Hadrut fatehi” kimi tanınıb.

 

Xüsusi Təyinatlıların Camal İsmayılovun da tərkibində olduğu 40 nəfərdən ibarət olan qrupa 2020-ci il oktyabrın 19-da Laçın dəhlizinə nəzarəti ələ almaq üçün ciddi önəmə və strateji əhəmiyyətə sahib olan mövqeləri düşməndən azad etmək tapşırığı verilib. Döyüşlər əvvəlcə Qubadlı rayonu istiqamətində olan əlverişli mövqelər uğrunda aparılıb. Ermənistan tərəfdən 150-200 hərbi qulluqçunun qatıldığı qeyri-bərabər döyüşdə Xüsusi Təyinatlı Qüvvələr Qrupunun şəxsi heyətindən baş gizir baş gizir Camal İsmayılov, Sübhan Cəbrayılov, gizir Şəhriyar Quliyev və gizir Elyar Vəliyev şəhid olub. 44 günlük Vətən Müharibəsində Camal İsmayılovun təkbində olduğu tabor Xüsusi Təyinatlı Qüvvələrin ən çox şəhid verən taboru olub. Camal İsmayılovun da həmin döyüşdə düşmən snayperinin atəşinə tuş gələrək şəhid olub. 

 

Camal İsmayılov doğulduğu Neftçala rayonunda dəfn olunub. Özündən sonra üç övladı yadigar qalıb.

 

Azərbaycanın ərazi bütövlüyünün bərpa edilməsində xüsusi xidmətlərinə və işğal olunan ərazilərin azad olunması zamanı düşmənin məhv edilməsi üzrə qarşıya qoyulan döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09 dekabr 2020-ci il tarixli Sərəncamına əsasən  baş gizir Camal İsmayılova “Vətən Müharibəsi Qəhrəmanı” adı verilib. 

 

Bundan başqa Camal İsmayılov Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulan  tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamına əsasən ölümündən sonra “Vətən uğrunda”, “Cəbrayılın azad olunmasına görə”, “Füzulinin azad olunmasına görə”  və “Xocavəndin azad olunmasına görə” medalları ilə təltif edilib.

 

Vətən Müharibəsi Qəhrəmanı Camal İsmayılovun adının əbədiləşdirilməsi üçün tədbirlər görülür. Belə ki, Neftçala Şəhər Uşaq İncəsənət Məktəbinə “Vətən Müharibəsi Qəhrəmanı” Camal Vidadi oğlu İsmayılovun adı verilib. 2020-ci ildə Camal İsmayılovun Neftçala rayonunun  Həsənabad  qəsəbəsində yaşadığı evdə xatirə lövhəsi qoyulub, 2021-ci il aprelin 12-də isə Neftçala şəhərində Camalın büstünün açılış mərasimi olub.