Professor Qulu Məhərrəmli Moderator.az-a açıqlamasında tanınmış iqtisadçı alim Qubad İbadoğlunun qızı Jalə Bayramovaya qondarma ittihamlarla cinayət işi açılmasını sərt qınayıb:

"Gənc hüquqşünas və parlament seçkisində müşahidəçi kimi iştirak etmiş Jalə Bayramova barəsində cinayət işimin açılması ölkədə onsuz da bərbad vəziyyətdə olan hüququn ələ salınması, insan haqqlarının açıq və kobud şəkildə tapdalanması, ədliyyə sisteminin böhran içində olmasını göstərir. Əlbəttə, Jaləyə qarşı kobud davranışı əks etdirən videolar sosial şəbəkələrdə yayılmasaydı, bəlkə də bu məsələyə tərəddüdlə yanaşmaq olardı. Amma insanlar ən çox yalan istehsalçısı Məzahir Pənahovun dediklərinə yox, gözləri ilə gördükləri bu videkadrlara inanır. Yəni Jaləyə hücum çəkilməsi, ondan telefonu almağa zorakı cəhdlər və yerlə sürüdülməsi danılmaz faktlardır. İndi bunları bir kənara qoyub öz müşahidəçi funksiyasını qanuna uyğun şəkildə yerinə yetirən hüquqşünas xanıma qarşı cinayət işi açmaq gülüncdür. Məncə, bu zərərli addım gənclərə, ümumiyyətlə, Azərbaycanın gələcəyinə meydan oxumaqdır. Axı körpə uşaq da anlayır ki, Jaləyə qarşı bu ədalətsizlik onun atası, hörmətli Qubad İbadoğlunun tənqidi çıxışları ilə bağlıdır. Bu isə daha pis yanaşmadır və ölkəmizi dünyada rüsvay edən düşünülməmiş addımdır".