Rusiyanın ilk olaraq Qərbə inteqrasiya yolunu seçməklə MDB-dən ayrılmağa israrlı görünən GUAM ölkələrinə dərs verməkdə qərarlı olduğu açıq-aydın görünür və bu sırada Azərbaycan da var. Düzdür, Rusiyanın aparıcı rəsmi şəxslərindən anti-Azərbaycan xarakterli  mövqelər eşidilmir. Ancaq Rusiya telekanalında Azərbaycanı aşağılayan filmin nümayişi, Jirinovskinin ölkəmizi və xalqımızı təhqir etməsi, Qarabağın Rusiyaya birləşdirilməsi təşəbbüsünü səsləndirməsi və sair faktlar Moskvada Azərbaycan planının olmasına şübhə yeri qoymur. 

Bu mərhələdə rəsmi Bakının olduqca ehtiyatlı davranışları başadüşüləndir. Çünki Rusiyaya meydan oxuyan Gürcüstan və Ukraynanın sonrakı taleyi hər kəsə məlumdur. Ancaq təəccüb doğuran həm də odur ki, Azərbaycan müxalifəti də bu mərhələdə susqun görünür. Hesab olunur ki, faktiki olaraq imperiyaya qarşı mücadilə illərində siyasi kimliyini müəyyənləşdirən, milli azadlıq hərəkatında bütün təhdidlərə baxmayaraq, ön sıralarda olan müxalifətin bu gün də Rusiyadan gələn təhlükələrə qarşı çıxmasına ciddi ehtiyac var.   

Bu arada Müsavat Partiyasının başqanı İsa Qəmbər Rusiyanın Ukraynaya hərbi müdaxiləsi və Azərbaycan məsələsi haqda danışıb. Modern.az xəbər verir ki, İsa Qəmbər bildirib ki, Rusiyanın təcavüzü, Ukrayna ərazisi Krımı işğal və ilhaq etməsi beynəlxalq münasibətlər sisteminə dəhşətli zərbə vurdu: “Çoxtərəfli və ikitərəfli sazişlər pozuldu. BMT Təhlükəsizlik Şurasının gücsüzlüyü bir daha aşkara çıxdı. Ən təhlükəlisi odur ki, hətta böyük dövlətlər arasında imzalanmış sənədlərin də heç bir gerçək təminat yaratmadığı bəlli oldu. Çağdaş siyasətçilər bu gün sadəcə Rusiyanın Ukraynaya təcavüzündən doğan problemlərin həlli ilə deyil, həm də (daha çox) dünyanın yeni təhlükəsizlik düzənini qurmaqla məşğul olacaqlar. 

Məhz buna görə bir həftə əvvəl yazmışdım ki, “16 martdan 17 marta keçən gecə ”Ən yeni böhran" dövrü başlayır. Hər bir böyük böhran böyük risklər, təhlükələr və eyni zamanda böyük fürsətlər, imkanlar yaradır. Hamı üçün. Və təbii ki, həm də Azərbaycan üçün". Müsavat başqanının fikrincə, hər bir dövlət bu böyük risklərdən qorunmaq və bu böyük imkanlardan yararlanmaq üçün yeni təhlükəsizlik düzənində öz yerini, mövqeyini müəyyənləşdirməlidir: “Ermənistan artıq bunu etdi, Rusiyanın yanında yer aldı. Ermənistanın bu addımı Ukrayna tərəfdən də, beynəlxalq birlik tərəfindən də qeydə alındı. Bu addım Ermənistana fayda gətirməyəcək, ciddi problemlər yaradacaq. Amma Ermənistanın seçim imkanı yox həddində idi”. 

İsa Qəmbərin fikrincə, Azərbaycanın seçim etmək imkanı var və bunu etmək lazımdır: “Ümumi olaraq ”biz bütün dövlətlərin ərazi bütövlüyünü dəstəkləyirik" demək kifayət deyil. Dəfələrlə dediyimiz kimi, Azərbaycan Avroatlantik inteqrasiya kursunu açıq şəkildə bəyan etməli, bu istiqamətdə konkret rəsmi addımlar atmalı, GUAM üzvü və müttəfiq dövlət olaraq Ukraynanın suverenliyinə, ərazi bütövlüyünə tərəfdar çıxdığını birmənalı şəkildə bildirməlidir. Azərbaycan bunu həm Ukrayna xalqı və Krım tatarlarını nəzərə alaraq, həm də öz köklü maraqlarını, Qarabağ məsələsini nəzərə alaraq etməlidir".

Müsavat Partiyası Mərkəzi İcra Aparatının rəhbəri Arif Hacılı isə “Yeni Müsavat”a bildirdi ki, Müsavat Partiyası Rusiyanın təhdidlərinə kifayət qədər ciddi reaksiya verib: “Biz mövcud resurslar çərçivəsində müəyyən işlər görmüşük. Rusiya səfirliyi qarşısında piket təşkil etmişik və hadisələri daim diqqət mərkəzində saxlamışıq. İsa Qəmbər Gülağa Aslanlı ilə birlikdə Kiyevdə, Maydanda çıxış edərək Ukrayna demokratlarına dəstək verib. Mən Gülağa bəylə birlikdə Krımdakı dostlarımızla daim əlaqə saxlayırıq və onların bizə olan bütün xahişlərini imkanlarımız və resurslarımız çərçivəsində həyata keçiririk. Eyni zamanda biz Krıma gedərək bilavasitə Simferopolda olaraq Krım tatarlarına, Avrointeqrasiya tərəfdarlarına dəstək vermək istədik. Ancaq Rusiya xüsusi xidmət orqanları buna imkan vermədi”. 

A.Hacılı qeyd etdi ki, Azərbaycan özünün 20 ildən artıq müstəqilliyi dövründə ilk dəfədir belə situasiya ilə rastlaşır: “Əgər Rusiya Krımda atdığı addımlara görə ciddi müqavimətlə üzləşməsə və Krımı işğal etməsinə görə onun bədəlini ödəməsə, təbii ki, yeni çağırışlar ola bilər. Rusiya imperiyasının sərhədlərinin genişləndirilməsi kimi ağlasığmaz təkliflər səslənməkdədir. Bu gün Azərbaycan hakimiyyəti belə məsələlərə çox biganə yanaşır. Hətta Azərbaycandan bəzi kommunistlər, Rusiya xüsusi xidmət orqanlarının Azərbaycandakı şəbəkəsi ciddi şəkildə fəallaşıb. Onlar SSRİ-nin bərpa edilməsi, Rusiyanın sərhədlərinin genişləndirilməsi, hətta Azərbaycanın Rusiyanın tərkibinə daxil edilməsi kimi çağırışlar edirlər. Təəssüf ki, Azərbaycan hakimiyyəti bütün bu məsələlər barədə susur. Hakimiyyət nəinki Rusiyada, regionda, dünyada gedən proseslərə reaksiya vermir”.

KXCP sədri Mirmahmud Mirəlioğlu hesab edir ki, Azərbaycan hakimiyyətinin indiki halda yürütdüyü siyasət rus təhlükəsinin “qarşısını alır”. Partiya lideri bunu rəsmi Bakının Rusiyaya qarşı hər hansı çıxış və hərəkət etməməsi ilə izah edir: “Məsələn, Rusiyada Azərbaycana qarşı həqarət dolu film göstərilir, ancaq bizim diplomatik korpus belə buna cavab verə bilmir. Deməli, bu siyasət hələlik Rusiyanın Azərbaycana qarşı təhlükəli addım atmasını saxlayır. Amma bu saxlama dırnaqarası və müvəqqətidir”. KXCP sədri deyir ki, hələlik müxalifətçi və istiqlalçı deputat olaraq onların əlindən gələn yalnız etiraz bəyanatları verməkdir: “Amma Azərbaycan hakimiyyətinin yürütdüyü siyasət müxalifəti də silahsız qoyub. Bu gün müxalifət meydansız, silahsız qalıb. Müxalifətin silahı sözüdür, kütləvi aksiyaların keçirilməsi, meydan ayrılmasıdır, bunları da Azərbaycan hökuməti öz aləmində artıq ”həll edib". Bu hakimiyyətin siyasətinin nəticəsidir ki, Rusiyanın Azərbaycana qarşı siyasəti filmlər vasitəsi, yaxud Jirinovskinin dili ilə deyilsə belə, Domokl qılıncı Azərbaycanın təhlükəsizliyinin və suverenliyinin başının üstündə asılı qalıb".

müsavat.com