"Artıq yadplanetlilərdən söhbət getmir" - ABŞ admiralından sensasion UNO açıqlaması

Bizi sosial şəbəkələrdən izləyin:

"Bəzi naməlum obyektlər insan mənşəli olmayan yüksək inkişaf etmiş zəka tərəfindən idarə oluna bilər..."

ABŞ-da Uçan Naməlum Obyektlər (UNO) və naməlum hava hadisələri ilə bağlı müzakirələr yenidən gündəmin əsas mövzularından birinə çevrilib.

Moderator.az xəbər verir ki, bu barədə "Fox News" nəşri yazıb.

Telekanalının yaydığı materialda ABŞ Hərbi Dəniz Qüvvələrinin istefada olan kontr-admiralı Tim Qallode sensasion açıqlamalar verib. Uzun illər hərbi dəniz qüvvələrində xidmət etmiş Qallode bildirib ki, müşahidə edilən bəzi naməlum obyektləri adi insan texnologiyası ilə izah etmək mümkün deyil. Onun sözlərinə görə, hazırda ABŞ-da bu mövzuya yanaşma dəyişir və artıq "yadplanetli" ifadəsindən daha az istifadə olunur.

"Qeyri-insani zəka" anlayışı ön plana çıxır

Keçmiş admiralın fikrincə, "yadplanetli" və ya "kosmik varlıq" terminləri mövcud hadisələri tam izah etmir. Çünki bu obyektlərin haradan gəldiyi, necə işlədiyi və məqsədlərinin nə olduğu barədə konkret məlumat yoxdur.

Qallode qeyd edib ki, ABŞ-də UNO ilə bağlı bəzi rəsmi sənədlərdə artıq "non-human intelligence" - yəni "qeyri-insani zəka" anlayışından istifadə olunur. "Biz onların kim olduğunu və ya haradan gəldiklərini bilmirik. Amma əldə olan məlumatlar göstərir ki, bəzi obyektlər insanlardan daha inkişaf etmiş texnologiyalarla idarə olunur", - deyə o bildirib.

"Bu texnologiyalar nə ABŞ-a, nə də rəqiblərinə məxsusdur"

Admiral xüsusilə okean və hava məkanında müşahidə edilən bəzi obyektlərin hərəkət imkanlarına diqqət çəkib. Onun sözlərinə görə, həmin obyektlər çox yüksək sürətlə sudan havaya qalxır və yenidən okeana daxil olur, lakin suyun səthində demək olar ki, heç bir iz qoymur. Qallode bildirib ki, belə texnologiyalar hazırda nə ABŞ-da, nə də Vaşinqtonun əsas rəqiblərində mövcuddur.

"Mən bu obyektləri videolarda görmüşəm. Onlar nə bizə, nə də rəqiblərimizə məxsusdur. İnsanlar belə texnologiyalara sahib deyil", - deyə admiral vurğulayıb. Onun fikrincə, bəzi UNO-ların quruluşu və hərəkət prinsipi elə səviyyədədir ki, burada müəyyən ağıllı idarəetmə sisteminin olduğu açıq görünür.

ABŞ-da UNO mövzusu niyə yenidən gündəmə gəlib?

Son illərdə "United States Navy" və digər Amerika strukturları tərəfindən yayılan videolar UNO mövzusuna marağı ciddi şəkildə artırıb. Xüsusilə hərbi pilotların çəkdiyi görüntülər və Pentaqonun bəzi materialları təsdiqləməsi ABŞ cəmiyyətində böyük rezonans doğurub. Sosial şəbəkələrdə və mediada UNO-larla bağlı saysız-hesabsız nəzəriyyələr müzakirə edilir.

"Fox News" yazır ki, hələ də bu hadisələrin mənşəyi barədə qəti sübut yoxdur. Lakin yüksək vəzifəli keçmiş hərbçilərin və təhlükəsizlik rəsmilərinin açıqlamaları mövzunun artıq yalnız konspirasiya nəzəriyyəsi kimi qəbul edilmədiyini göstərir.

İnsanlar cavab almağa çalışır

Qallode vurğulayıb ki, özü heç vaxt "qeyri-insani varlıqları" şəxsən görməyib. Buna baxmayaraq, onun fikrincə, mövcud müşahidələr və texniki göstəricilər adi izahla kifayətlənməyə imkan vermir. Nəşr qeyd edir ki, UNO mövzusu insanlar aydın və inandırıcı cavablar əldə etməyənə qədər dünya gündəmindən çıxmayacaq. ABŞ-da isə artıq bu məsələ təkcə sensasiya deyil, milli təhlükəsizlik və texnoloji üstünlük mövzusu kimi də qiymətləndirilir.