"Avropa İttifaqı hələlik Ukraynanı öz tərkibində görmür" - "Financial Times"

Bizi sosial şəbəkələrdən izləyin:

"Ukraynanın Avropa İttifaqı üzvlüyünə nələr mane olur?.."

Avropa İttifaqının rəsmiləri hesab edir ki, Ukrayna qoşulma prosesini tam düzgün anlamır və korrupsiyaya qarşı mübarizəni yetərincə aparmır.

Moderator.az xəbər verir ki, bu barədə "ft.com" nəşri yazıb.

Gərginlik və anlaşılmazlıq

Nəşr yazır ki, prezident Vladimir Zelenskinin Ukraynanın Avropa İttifaqına (Aİ) tez üzvlüyü ilə bağlı israrı ABŞ-ın Kiyevə dəstəyi yenidən nəzərdən keçirdiyi bir vaxtda Avropa paytaxtları ilə münasibətlərdə gərginliyi artırır.

Aİ liderlərinin sürətləndirilmiş üzvlükdən imtinası Kiyevdə narazılığı artırır, Zelenskinin daha sərt ritorikası isə kompromis axtarışını çətinləşdirir.

Avropanın narazılığı

Diplomatik mənbələrə görə, Ukrayna rəsmiləri Aİ və ABŞ-la görüşlərdə Avropa Komissiyasını tənqid edib və daha sürətli üzvlük tələb ediblər. Onlar bildiriblər ki, Aİ Ukraynaya Kiyevin ona ehtiyac duyduğu qədər ehtiyac duyur.

"Üzvlük hədiyyə deyil. Görünür, Kiyevdə bunu düzgün başa düşməyiblər", - deyə diplomat bildirib. "Onlar deyirlər: Siz bizə borclusunuz. Amma bu kömək etmir", - deyə digər rəsmi qeyd edib.

Təkliflər və rədd cavabı

90 milyard avroluq kredit razılaşması və Kiprdəki Aİ sammiti gərginliyi qismən azaltsa da, fikir ayrılıqları qalır. Fransa və Almaniya mərhələli inteqrasiya modeli təklif edib. Bu modelə görə, Ukrayna islahatlar qarşılığında Aİ mexanizmlərinə tədricən çıxış əldə etməlidir.

Rəsmilər bildirir ki, tam üzvlük üçün ən azı 10 il lazım olacaq. Lakin Zelenski bu təklifi rədd edərək yalnız tamhüquqlu üzvlüyü müzakirə etdiklərini deyib: "Biz bunu hətta müzakirə etməyəcəyik".

Reallıq və tənqidlər

Aİ liderləri Zelenskinin gözləntilərini aşağı salmağa çalışıb: "Bu, düşündüyü qədər asan olmayacaq".

Eyni zamanda Aİ diplomatları bildirir ki, üzvlük yalnız real islahatlara əsaslanmalıdır: "Biz onun yeganə dostlarıyıq, bəlkə bir az susmaq daha yaxşı olar".

Aİ-də əsas narazılıq islahatların zəifləməsi, xüsusilə korrupsiyaya qarşı mübarizənin yetərsiz qalması ilə bağlıdır. Ukraynanın bəzi qanunvericilik öhdəliklərini yerinə yetirmədiyi də qeyd olunur. "Onların daxili islahatları dalana dirənib. Bu pisdir və bunu hamı bilir", - deyə mənbələr bildirib.

Ukrayna 2022-ci ilin iyununda Aİ-yə namizəd statusu alıb. Zelenskinin 2027-ci ilə qədər üzvlük tələbi isə Aİ ölkələri tərəfindən rədd edilib.