Dünən Ukrayna üzərində Rusiyanın "Su-34" qırıcı-bombardmançı təyyarəsi vurulub.

 

Moderator.az xəbər verir ki, bu barədə "Forbes" nəşri məlumat verib. Məlumatı "nv.ua" nəşri yayıb.

 

Rusiyanın populyar "Fighterbomber" "Telegram-kanal"ı vurulan qırıcının fotoşəklini dərc edib. Bununla bağlı Rusiya Müdafiə Nazirliyi və Ukrayna tərəfindən rəsmi bəyanatlar verilməyib. Lakin bəzi Moskvayönümlü "Telegram-kanal"lar məlumat verib ki, təyyarə cəbhə xəttindən təxminən 50 km aralıda Amerikanın "F-16 Fighting Falcon" qırıcısı ilə vurulub.

 

 

ABŞ prezidenti Co Bayden Ukraynaya çoxhədəfli döyüş təyyarələrinin verilməsini təsdiq etdikdən sonra Belçika, Danimarka, Niderland və Norveç Ukraynaya 90-dan artıq "F-16" qırıcılarını verməyi vəd edib. İlk "F-16"-lar Ukraynaya avqust ayında daxil olub. Əgər bu məlumat təsdiqini taparsa, Amerika təyyarəsinin Rusiyanın pilotlu qırıcı təyyarəsi üzərində ilk qələbəsi olacaq.

 

 

"Su-34" ikimotorlu, iki yerli səsdən iti qırıcı-bombardmançı təyyarədir, 1980-ci illərdə SSRİ Hərbi-Hava Qüvvələri üçün işlənib hazırlanıb, silahlanmaya rəsmən 2014-cü ildə daxil olub. Bu təyyarə Rusiya arsenalında ən güclüsü hesab edilib, onun itirilməsi Moskva üçün ciddi zərbədir.

 

 

Rusiyanın "Telegram-kanal"larında fəal iş aparan və tez-tez açıq şəkildə rusiyalı hərbçiləti tənqid edən hərbi müxbirlər təyyarənin itirilməsinə dərhal münasibət bildirib. "VDV for Honesty and Justice" kanalı xəbərdarlıq edib ki, "NATO "F-16"-nı ova göndərib" və belə itkilər yalnız artacaq.

 

Maraqlıdır ki, hərbi müxbirlər diktator Vladimir Putinin ünvanına tənqiddən yan keçərək öz narazılığını hərbi komandanlığa yönəldir. Milli təhlükəsizlik üzrə ekspertin qeyd etdiyi kimi, onlar ordunu səriştəsizlikdə ittiham edir, amma Putinə dəstək verir, ona hərbi qurumlarda kadr dəyişiklikləri etməyə çağırır.

 

 

"Telegram-kanal"lar və digər sosil mediada xəbərlərin sürətlə yayılması Kremlin rəsmi bəyanatlarını geridə qoyur.

 

Sosial media üzrə analitik Rocer Ertner qeyd edib ki, "smartfonlar və sosial şəbəkələr hər kəsə məlumatın ani olaraq yayılmasına kömək edən meqafona çevrilib", bu da informasiya axınlarına nəzarətə bel bağlayan totalitar rejimlərə meydan oxunması deməkdir.

 

 

Avqust ayında ukraynalı müdafiəçilər Kursk vilayəti ərazisində Rusiyanın "Su-34" qırıcı-bombardmançı təyyarəsini vurub. 

 

Sentyabrın 11-də ukraynalı kəşfiyyatçılar Qara dəniz akvatoriyasında əməliyyat zamanı Rusiyanın "Su-30CM" döyüş təyyarəsini vurub.

 

Müharibə başlanandan USQ Baş Qərargahının məlumatına görə, Rusiya artıq 369 təyyarəsini itirib.