Moderator.az xəbər verir ki, bu barədə "The New York Times" nəşri yazıb.

 

Nəşr qeyd edir ki, nəticələri öncədən aydın olan "seçkilərin" keçirilməsindən sonra Rusiya əhalisinin başlıca qorxusu səfərbərliyin yeni dalğasıdır.

 

Bununla bağlı söz-söhbətlər çoxdan davam edir, Rusiya vətəndaşları bunun seçkilərdən sonra baş verəcəyindən ehtiyat edir.

 

"Potensial səfərbərliyin narahatlıq üçün ən böyük səbəb qalmasına rəğmən, həmçinin maliyyə və iqtisadiyyatla bağlı həyəcan da mövcuddur. 

 

Bəzi rusiyalılar rublun ötənilki məzənnədən düşməsindən sonra hökumət tərəfindən saxlanılmasına rəğmən yenidən dəyərdən düşəcəyindən və idxalın dəyərinin artacağından ehtiyat edir. Biznesmenləri vergilərin artacağı narahat edir", - jurnalistlər hesab edir.

 

Bundan başqa, nəşr ekspertlərə istinadən yazır ki, Kreml "səsvermənin" nəticələrindən müxalifətin daha çox əzilməsi və Ukraynaya qarşı müharibənin eskalasiyası üçün istifadə edə bilər.

 

"Bu narahatlıqlar bir çoxlarının ən yaxşısına ümid etməyə, amma ən pisini gözləməyə vərdiş edən Rusiyada cari əhval-ruhiyyəni əks etdirir. Qeyri-müəyyənlik getdikcə daha da avtoritar olan hökumət tərəfindən gücləndirilir.

 

İyirmi ildən artıq hakimiyyətdə olduqdan sonra Putini nə parlamentdə müxalifət partiyası, nə də güclü vətəndaş cəmiyyəti dayandıra bilir. Ona görə də o, istədiklərini etməkdə nisbətən sərbəstdir", - məqalədə deyilir.

 

 

Putin seçkilərdə rekord 87 faizlə qalib gəlib, onun rəqibləri birlikdə 13 faizdən az səs toplayıb. Bu barədə Rusiya Mərkəzi Seçki Komissiyası məlumat verib.

 

İkinci yerdə Nikolay Xaritonov (4, 3 %), üçüncü yerdə Vladislav Davankov (3, 8 %), dördüncü yerdə Leonid Slutski (3, 2 %) qərarlaşıb.

 

Putin ən çox Çeçenistanda səs toplayıb, ona seçicilərin 98, 99 faizi səs verib

 

Kemerevo, Tuva, Yəhudi Muxtar Vilayəti, Saratov, Belqorod, Adıgey və Qaraçay-Çərkəzdə seçicilərin 90 faizindən çoxu Putinə səs verib.

 

Moskvada Putin 85, Moskva vilayətində 86 faiz səs toplayıb.

 

İlhaq edilən Sevastopolda Putinə seçicilərin 92, 6 faizi səs verib.

 

Qərb ölkələri Rusiyada seçkiləri azad və dürüst olmayan adlandırıb.

 

"Cənab Putinin öz siyasi opponentlərini həbsə atdığını və digərlərinin namizədliyini irəli sürməyə imkan vermədiyini nəzərə alsaq,  aydındır ki, bu seçkilər nə azad, nə də ədalətli olub", - bunu Ağ Evin Milli Təhlükəsizlik Şurasının nümayəndəsi Con Kirbi brifinqdə deyib.

 

"Rusiyada prezident seçkiləri qanuni, azad və dürüst hesab edilə bilməz. Səsvermə əhaliyə qarşı qəddarcasına repressiyalar şəraitində keçib, bu da azad və demokratik seçimi mümkünsüz edib", - Polşa XİN-in bəyanatında deylir.

 

Almaniya səsverməni "senzura, repressiyalar və zorakılığa söykənən avtoritar hakimin saxta seçkiləri" adlandırıb.

 

Britaniya XİN rəhbəri Devid Kemeron Ukraynanın işğal edilmiş ərazilərində keçirilən qanunsuz seçkiləri pisləyib. "Bu, azad və dürüst seçkilərə bənzəmir", - o, bəyan edib.

 

Ukrayna prezidenti Vladimir Zelenski deyib ki, "Rusiya diktatoru seçkilərin imitasiyası ilə məşğuldur".

 

"Dünyada hamıya aydındır ki, bu adam tarixdə tez-tez olduğu kimi hakimiyyət xəstəsidir və ömürlük hakimlik etmək üçün hər şeyi eddir", - Zelenski axşam müraciətində bəyan edib.