Namibiyada rusiyalı balıqçıların gəmisi saxlanılıb

Namibiyada göyərtəsində 13 rusiyalı olan balıqçı gəmisi saxlanılıb.

Moderator.az xəbər verir ki, bu barədə Rusiyanın Namibiyadakı səfirliyi özünün Teleqram kanalında məlumat yayıb.

Hadisəyə səbəb "Hodago Fishing" şirkəti ilə ekipaj arasında yaranan əmək mübahisəsidir.

Diplomatik nümayəndəlik bildirib ki, problem mülki-hüquqi mübahisədən qaynaqlanır və onun həlli üçün Namibiyanın Xarici İşlər Nazirliyi və digər dövlət qurumları ilə əməkdaşlıq edilir.

Məqsəd iki ölkə arasında ənənəvi dostluq münasibətləri çərçivəsində məsələnin tezliklə həllinə nail olmaqdır və rusiyalı vətəndaşların qanuni hüquq və maraqlarının qorunacağı gözlənilir.

Səfirlik həmçinin qeyd edib ki, rusiyalı diplomatlar gəminin kapitanı və ekipaj üzvləri ilə daim əlaqə saxlayır. Gəmi və heyətin yanacaq, ərzaq və digər zəruri təminatla təmin olunması üçün lazımi tədbirlər görülür.

Rusiyalı vətəndaşların həyat və sağlamlığı üçün təhlükə yoxdur. Namibiya tərəfi onların Rusiyaya qayıtmasına da heç bir maneə yaratmır.

Səfirlik rusiyalı balıqçılara lazımi dəstəyi göstərməyə və yaranmış münaqişənin tezliklə həllinə nail olmağa davam edəcəyini bildirib.