Ekologiya və Təbii Sərvətlər Nazirliyi “OBA Market” MMC-ni cərimələyib.

 

İqtisadiyyat.az-ın əldə etdiyi məlumata görə, şirkətin cərimələnməsinə tullantıların emalı yerlərinin müəyyənləşdirilməsi, layihələndirilməsi, tikintisi, icrası və ya dəyişdirilməsi normalarını və qaydalarını pozması səbəb olub.

 

Buna görə də Nazirlik tərəfindən şirkət barəsində İnzibati Xətalar Məcəlləsinin 266.2-ci maddəsinə əsasən cərimə protokolu tərtib edilib.

 

Daha sonra protokol baxılması üçün Xəzər Rayon Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb. 

 

Hakim İlham Cəfərzadənin sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.

 

Protokol tərtib olunan maddəyə əsasən, tullantıların emalı yerlərinin müəyyənləşdirilməsi, layihələşdirilməsi, tikintisi, istifadəsi və ya ləğv edilməsi normalarının və qaydalarının pozulmasına görə vəzifəli şəxslər üç min beş yüz manatdan dörd min beş yüz manatadək məbləğdə, hüquqi şəxslər on min manatdan on beş min manatadək məbləğdə cərimə edilir.

 

Qeyd edək ki, Veysəloğlu Şirkətlər Qrupuna daxil olan “OBA Market” MMC 2016-cı ildə Azərbaycanda pərakəndə satış bazarına daxil olub. MMC-nin qanuni təmsilçisi İdarə Heyətinin sədri İbrahimova Natəvan Yusif qızıdır.

 

Xatırladaq ki, “OBA Market” daha əvvəllər də müxtəlif maddələr üzrə inzibati xəta törətdiyinə cərimələnib.