Şanlı keçmişə malik uca millətimiz zaman-zaman bəşəriyyətə işıqlı şəxsiyyətlər bəxş edir. Bu şərəfli  millətin bağrından qopan belə şəxsiyyətlər mənsub olduqları etnosun pasionarlıq enerjisinə stimul verirlər. Milli özünə inam və özünü dərkin güclənməsində bu cür nümunələrin rolu olduqca önəmlidir. Dövlət quruculuğunda, ədəbiyyatda, texnki elmlər və musiqi sahəsində olduğu kimi bu cür şəxsiyyətlərin təhsil, elm və səhiyyə sahələrində də var olmaları olduqca vacibdir.Türk dünyasının son yüz ildə yetirdiyi belə şəxsiyyətlərdən biri də dünya tibb və təhsil çevrələrində HOCABƏY kimi tanınan prof. Dr. İhsan Doğramacıdır. O, İhsan Doğramacı ki, uzun illər Beynəlxalq Pediatriya Assosiyasiyasının (İPA) İcraiyyə Komitəsinə və Birləşmiş Millətlərin Uşaq Fondunun (UNİSEF) İcraiyyə Şurasına başçılıq etmiş, 1946-cı ildə Dünya Səhiyyə Təşkilatının qurulmasına imza atmışdır. İhsan Doğramacı ki, Türkmənelinin Ərbil şəhərində zəngin və soylu bir Osmanlı ailəsində dünyaya gəlmiş İhsan Doğramacı ailəsində, Ərbil İbtidayəsində, Beyrut Amerika Kollecində, Bağdad İstanbul Tibb fakultəsində, Harvard və Vaşinqton unversitetlərində mükəmməl təhsil gördükdən sonra, həyatını Türkiyədə müasir tibb və təhsil sistemi yaratmağa həsr etmişdir. Hocabəy İhsan Doğramacı Türkiyədə siyasi partiyalar tərəfindən təklif edilmiş nazir, baş nazir, ölkə prezidenti vəzifələrindən imtina etmiş, alimlərin alimi, müəllimlərin müəllimi kimi qəbul edilən Hocabəy olmağı üstün tutmuşdur. Ailəsinin böyük maliyyə imkanlarını və fitri istedadını səfərbər edərək, dünyada böyük şöhrət qazanmış Hacəttəpə və Bilkənd unversitetlərini qurmuş, bayrağı uca olan qardaş Türkiyədə ən müasir tələblərə cavab verən tibb və ali təhsil sistemi yaratmışdır. Həyatda ikən Türkiyədə, Azərbaycanda heykəlləri, büstləri qoyulmuş, adına İhsan Doğramacı beynəlxalq mükafatı təsis edilmişdir. Hocabəy özü üçün dünyanın ən xoşbəxt insanı formulunu bu cür ümumiləşdirmişdi: Əsil xoşbəxtlik almaqda deyil, verməkdə olduğunu göstərmişdi. O, malik olduğu bütün varidatını, biliyini, tükənməz enerjisini millətinə verməklə həqiqi xoşbəxtliyə nail olmuşdur.

  Pediatriyada olduğu kimi, iqtisadiyyatda da dahi olan Hocabəy İhsan Doğramacının ailəsinin maddi texniki imkanları ilə qurduğu fondalar və yaratdığı Bilkənd Holdinq vasitəsi ilə Hacattəpə, Bilkənd unversitetlərinə, başqa təşkilatlara və şəxslərə indiyə kimi etdiyi yardım 6 milyard dollara yaxındır. İbadət kimi çalışan, çalışaraq dincələn, liderlik-təşkilatçılıq dahisi olan Hocabəy son dərəcə təvəzökar, comərd, yaradıcı və dostcanlı xarakteri ilə, işıqlı şəxsiyyəti ilə sözün həqiqi mənasında bizlərə-çağdaş Türk gəncliyinə daim örnək olacaqdır. 

Bu günlərdə neftçi həmkarım Həmid Qaralovun əlində gördüyüm bir kitab diqqətimi çəkdi. Nəfis tərtibatla işıq üzü  görmüş  kitabın üzərindən dünya şöhrətli şəxsiyyət olan Hocabəy İhsan Doğramacının nurlu çöhrəsi boylanırdı. Hocabəy adlı bu nəfis nəşrə olan marağım həmkarımın da gözündən yayınmamışdı. Həmid bəy haqlı olaraq, kitabın qiymətinin təkcə kimin haqqında yazılmasında deyil həm də kimin tərəfindən yazılmasında olduğunu dedi. Məlum oldu ki, kitabın müəllifi hörmətli alimimiz 1992-2005-ci ilərdə ölkəmizin qardaş Türkiyədə səfiri vəzifəsini şərəflə yerinə yetirmiş. Türkiyə cəmiyyətinə, ictimai-siyasi-elmi aləminə yaxından bələd olan, İhsan bəyin sayqın dostlarından olmuş prof. Dr Məmməd Novruzoğludur. Şübhəsiz ki, Məmməd bəyin  bu kitabın müəllifi olması çox şeylərdən xəbər verirdi. Dostum kitabı oxumaq üçün mənə verərkən Türkün gəcliyinə örnək  ola biləcək bu böyük şəxsiyyət haqqında bir məqalə yazmağı qarşımda şərt qoydu . Mən həmin gündən  bu günə kimi sevgili Məmməd bəyi çox qiymətli kitabının xoş təəssüratları altında həmin məqaləni yazıram... Tanrı Türkü qorusun!