“İkinci çörək” sayılan kartof bazarda birdən-birə 2 dəfə bahalaşaraq 1 manat, 1 manat 20 qəpik olub. Eyni zamanda yumurtanın da qiyməti birdən-birə artıb.  Dekabrın 16-dan topdansatış ünvanlarına gedən ticarətçilərə yumurtanın ədədi 13-14 qəpiyə təklif edilib. Satıcıların sözlərinə görə, sonuncu dəfə broyler yumurtasını 10 qəpiyə alıb 12 qəpiyə satırmışlar. Ötən gün Bakının ən böyük bazarlarından olan “8-ci kilometr bazarı”nda olub qiymətlərlə maraqlandıq.

Yeni il öncəsi “8-ci kilometr” bazarında nisbətən canlanma müşahidə olunur. Xüsusi ilə ərzaq məhsullarının satıldığı hissədə alver gurdur. Amma hamı qiymətlərdən narazıdır. Həm alıcılar, həm də ki, satıcılar... Satıcıların fikrincə, benzinin qiymətinin qalxması bazarlara çox böyük təsir edib. Arzuman Hüseynov adlı satıcının  sözlərinə görə, benzinin qiyməti  qaldırılandan sonra ikinci əldən aldıqları kənd təsərrüfatı məhsullarının qiyməti artıb: “Biz istəməsək də, qiymətlər qalxır. Alıcı gəlir, baxır, qiyməti görür və gedir. Onları qınamırıq. Qiymət artımının nə bizə, nə də alıcılara xeyri var. Kartof, soğan, kələm kimi məhsullar qiyməti qalxdığından bu məhsulların alışı nisbətən zəifləyib. Naringi 30 qəpikdən 50 qəpiyə qalxıb, banan 1 manat 50 qəpiyə, üzüm 70 qəpiyə, alma isə 50 qəpiyə satılır. Digər məhsullarda da artım müşahidə etmək mümkün idi. Düyü bazarda 1 manat, şabalıd 4-5 manat, kişmişin qiyməti 3-6 manat, ərik qurusu isə 3-5 manat arasında dəyişir. Qozu 3 manat, fındığı isə 2 manat 50 qəpiyə satırıq”.

Satıcının sözlərinə görə, benzinin qalxmasından sonra bahalaşma dalğasının qarşısı alınmır: “Hər gün eşidirik ki, bir məhsulun qiyməti qalxır. Bunun axırı hara gedir, bilmirik. Yeni il qabağı camaat bazara gəlir ki, evinə bazarlıq etsin. Qiymətləri görəndən sonra çıxıb gedir. Ya da bir kilo alacaqdısa, yarım kilo alır”.

Satıcılar kimi alıcılar da qalxan qiymətlərdən narazıdır. Yeni il qabağı bazarlıq edən Sabir Hüseynli adlı paytaxt sakininin sözlərinə görə, qiymətlərin artması yalnız monopolistlərin cibini doldurur: “Xalq isə acından ölür. Bir baxın görün, nəyin qiymətini artırıblar. Soğanın, kartofun, meyvələrin, yumurtanın. Bunlar hamısı monopoliyadadır. Bu alverçiləri də qınamırıq. Bunlar da çörək qazanmalıdır. Bu bazardan bir qədər ucuz ”Sədərək" yarmarkasıdır. 1-2 kilo kartof üçün ora getmək də olmur. Məcburuq bayram alış-verişimizi burdan  edək".

Bakının market və bazarlarında 11 qəpikdən 13-15 qəpiyə qalxan yumurtanın 25 qəpik olacağı gözlənilir. Bu “8-ci kilometr bazarı”nda çalışanların proqnozudur. Satıcılar yumurtanın qiymətinin bu dərəcə artmasını da benzinə bağlayırlar. Sahilə adlı satıcı deyir ki, 11 qəpiyə satdıqları yumurta bir gecədə 13-14 qəpik oldu: “Özümüz də bilmədən səhər 1-2 saat  yumurtanı köhnə qiymətlə satdıq. Gördük hamı bizdən alır. Sən demə, gecə ilə qiymət qalxıbmış. Sevinmişdik ki, alverimiz gur gedəcək. İndi biz də yumurtanı 13 qəpikdən satırıq. Broylerlər yumurtanın dənəsini bizə 11-12 qəpikdən verir. Bir yumurtadan bizə cəmi 1 qəpik qalır”.

Satıcının sözlərinə görə, bayramqabağı toyuq və hinduşka ətlərinin qiyməti də artıb: “Bud dibi kilosu 3 manat 50 qəpiyə, broyler  kilosu 3 manat 80 qəpiyə, file 4 manat 50 qəpiyə satılır. Bayramqabağı balığa da tələbat böyükdür. Amma qiymətlər elə də ucuz deyil”.

Ekspertin fikrincə isə enerji daşıyıcılarının qiymətinin qaldırılması sahibkarlara əsas verdi ki, onlar da hətta anbarda olan malın belə qiymətini qaldırsınlar. Məlumat üçün bildirək ki, Tarif Şurasının məlum qərarından sonra İqtisadiyyat və Sənaye Nazirliyi məlumat yaydı ki, yanacağın qiymət artımının istehlak bazarına təsir etməməsi üçün bazarlarda mütəmadi reydlər aparılacaq və süni qiymət artımına yol verilməyəcək. Hətta ilk yoxlamalar zamanı qiymət artımlarının müşahidə olunmadığını da bildirdilər.  Amma gördüyünüz kimi, təkcə benzinin qiymətinin qalxmasının digər sahələrə necə təsir etdiyi göz qarşısındadır.